Saray Gungguna na Mareen a Puso

KABAT lan abayag na modernon siensia a say agnapokpokan a sanok et makapuy so epekto to’d laman na too. Masulok lan sanlasus a taon so apalabas, inkuan na The Journal of the American Medical Association (JAMA): “Nalokbob ed patey so too a walad kiaktangan na sanok, tan ibabagan, anganko, et maletey so puso to, ya agnatepelan na satan so irap a pinawalay mental a kipapasen to. Anggapoy ompatnag a manisip a say sengegan na impatey to et say binmayag a mantutumbokan a sanok, a mismon sengegan na inletey na puso to.”

Saratan a salita so agnankelawan na saray estudyante na Salitay Dios, say Biblia. Ngalngalin 29 siglo sakbay a sinaglawi na JAMA so kapeligroan na pirmin isasanok, apuyanan si Arin Solomon a mangisulat: “Say mareen a puso sikato so bilay na laman.” (Uliran 14:30) Siansian tua ni irayan salita natan.

Diad panmantini ed mareen a walna, naliktaran tayo so dakel a beblay a maslak a nisisiglaot ed desdes, a singa say atagey a presyon na dala, pansakit na ulo, tan problema ed panaglinawa. Anggaman ontan, niarum ed maabig a bunigas et ombulaslas so siglaotan tayo ed arum no panggunaetan tayon “tundaan so petang na ulo, tan ikaindan so sanok.” (Salmo 37:8) Maasasingger iray totoo ed si Jesus lapud inkamatamoy to tan impapuson panagpaga to ed sikara. (Marcos 6:31-34) Ontan met, magmaliw itayon lapuan na pakarepreskoan na arum no bayuboan tayo so mareen a puso.​—Mateo 11:28-30.