“Iner Sirin so Kawalaay Simbaan Yo?”

MABETBET a nitetepet iya ed Tastasi nen Jehova a taga-Mozambique. Diad tua, agni abayag et mairap ya ebatan itan a tepet. Saya so lapud agnanggayagaan na Tastasi nen Jehova so legal a pakabidbiran ed sayan bansa anggad 1991. Kanian, aliwan posibli so pakawalaan na sankapatnag tan permaninti iran pasen a pandayewan.

Anggaman ontan, anguman itan a kipapasen nen Pebrero 19, 1994. Diad satan ya ampetang tan masnag ya agew a nidedika so sankaunaan a duaran Kingdom Hall ya impaalagey ed kapiganman diad Mozambique. Sakey a dagup na 602 so inmatindi diad dedikasyon na sarayan maabig a pasen na pantitipon diad daongan a syudad na Beira, a manpeglepegley ed gilig na baybay na Mozambique. Sapotan na saratan so pankaukolan na taloran kongregasyon ed satan a syudad.

Say intiron proyekto, manlapud impangiletneg na pundasyon anggad impakakompleto na saray bilding, et asabi toy sakey taon tan duaran bulan na impasyan kimey. Mabetbet a 30 odino onsulok ni iran boluntaryo manlapud kabangibang a Zimbabwe so linma tan nankimey a benebenek a kaibay Tastasin taga diman. Lapud ag-ira onsusto ed panmisioneron ayaman ed Beira, a pinagkasentro na panangipakurang, arum so temporaryon nanayam ed liber na abung legan na saray sampot simba tan no maminsan et diad loob na pigaran simba.

Naromog so Kingdom Hall na saray kongregasyon na Massamba tan Munhava ed pinagkasentron kalsada na Beira. “Diad sakey a matrabahon agew, sano say kimey et maples a nasusumpal tan say aligwas et sankaimanon tuloy,” kuan na sakey a misionero, “anengneng miray dawitdawit ya aksidinti lapud kakalingaw na saray drayber diad Kingdom Hall, imbes diad aarapen na manibila ra.” Amayamay so tinmunda pian manbantay ed kimey, tan nagkalautlan nandinayewan da so kiwawala na nanduruman rasa a mankikimey a nankakasakey.

Asaglawi so malaknab a panagplano tan panangorganisa. Aliwan singa ed arum iran proyekto diad sayan parti na mundo, a ditan et daiset so materyales tan pangalaan, agbalot tinmunda so kimey ed saray Kingdom Hall lapud kakulangan na saray suplay. Diad sakey ya inkagawa, kaukolan so 800 a sako na semento, tan say ultimon makapangisuplay ed saratan so kinmulang ed sakon pangikargaay semento. Tinmawag so agagi ed sangan opisina na Watch Tower Society diad kabisira, Maputo; inpa-eroplano iray sako, inawit ed pabrika na semento, tan kinargaan. Nantultuloy so kimey ya andi-abala.

Diad sananey nin inkagawa, sanen saray pamasakan na atep so ikakabit la, saray komikimey so kinmulang na saray bigan balatyang. Lapud pirmin pankaukolan, say balatyang parad proyekto so nanlapu ni’d arum a bansa a 600 kilometro so kaarawi to! Inasinggeran na sakey ed saray komikikimey so sakey a toon manbabantay tan tinepetan no wala so kabat ton napangalaay balatyang pian nakompleto so trabaho. Inmebat so too: “Masulok lan sakey oras a manalalageyak dia, tan aliwan lapud nibanbana iya. Agko napokpokan a pandinayewan so kimey a gagawaen yo tan say mamapakiwas a prinsipyo ed sayan proyekto. Walaan ak na balatyang a nakakaukolan yo, tan panliketan kon iregalo itan ed sikayo.” Nagmaliw itan a nipanpanaon a tuloy a probisyon.

Panumamengan na dakel a maniimaton no anto kasi baleg a konstruksion a mangaasikaso ed proyekto. Siempre, nanliketan a tuloy na saray komikimey so pangipaamta ed sikara a saraya so Tastasi nen Jehova a mangiboboluntaryo ed serbisyo ra. Anto so nagkalautlan nandinayewan na saray maniimaton? “Nankakasakey kayon totoo,” inkuan na sakey. “Anggaman nanlapu kayo’d nanduruman rasa, saniiba kayon mankikimey bilang sanaagi.” Say nansumpalan et dakel so impaiyaralan na Biblia. Walaan met na epekto ed saray pantitipon. Alimbawa, say promedyon onaatendi ed pantitipon dia ed Kongregasyon na Manga, so masulok a dobli ed bilang na Tastasi.

Pinaneknekan na saray balon Kingdom Hall a baleg a bendisyon ed Tastasi diman. Maslak so manaabet nen saman ed saray karaanan a pasen ya inaatepay dika odino lata, diad beneg na abung, odino diad melag a kuarto na sakey a pribadan abung. Mabetbet iran nababasa sano onuran; siansian anggapoy saew ya inatendian daray miting. Pigaran dekada la a saraya lambengat so kabat na Tastasi ed Mozambique a bilang saray “Kingdom Hall.” Inkuan nen Brother Caetano Gabriel, sakey a matatken ed Kongregasyon na Massamba: “Misalsalamat kami ed agagi tayo ed intiron mundo a tinmulong diad pakagawa na sayan proyekto.” Anonotan na sakey a malangwer a Tasi: “Sanen wala kami’d Carico (“panangibangatan lamet iran kampo” no iner pinan-ayam iray Tastasi ed loob na manga 12 taon), niyugali mi lan ibaga, ‘Mansiansia tayon matoor, tan si Jehova so manumang ed sikatayo.’ Say balon Kingdom Hall so sakey a tumang a nanlapud si Jehova.” Ipapabitar na saray salita ra so aralem ya otang a linawa tan determinasyon dan dayewen si Jehova.

Nisagyat so espiritu na panagpayunir ed dakel a tobonbalo ya akibiang ed konstruksion tan saginonor diad regular payunir a panagministro. Inkuan nen malangwer ya Isabel, sakey a regular payunir ed Kongregasyon na Manga, legan a nenengnengen to so agaylan linis a Kingdom Hall ed samay agew sakbay na dedikasyon: “Parad siak saya so sankarakpan a pasen ed syudad na Beira. Panliketan kon tuloy so kiwalak dia.” Impaliwawa nen Adão Costa, sakey a misionero, a saray lokal ya autoridad so kooperatibon maong ed impangiyabuloy na nikabiig iran paraan na panagsaliw ed arum a bansa lapud kabkabat da so inkamatua na Tastasi. Insan inyarum ton: “Anggan naknaksawan kami, sakey a gayaga so pakanengneng ed resulta na amin na sayan kimey diad kagalangan tan kigloriaan nen Jehova.”

Natan, no bilang ta walay makaaron manaayam ed syudad na Beira a mantepet, “Iner sirin so kawalaay simbaan yo?” sikatoy idirehi na Tastasi ed sakey ed saray duaran balon Kingdom Hall tan onebat ed saray balikas a singa, “Wala ed International Road, Avenida Acordo de Lusaka, petek a mismo na Fourth Squadron Police Station.” Insan, iyarum so sakey a korihe, “Balet aliwa itan a simbaan. Sakey itan a Kingdom Hall!”

[Mapa/Saray litrato ed pahina 20]

(Parad aktual a format, nengnengen so publikasyon)

APRIKA

Mozambique

Beira

Maputo

[Credit Line]

Map: Mountain High Maps® Copyright © 1995 Digital Wisdom, Inc.