Sioparay Magmaliw ya Ebanghelisador?

DIAD sakey a miting na World Council of Churches ngalngalin 40 taon lay linmabas, pinaseseg iray membron “pabilayen so espiritu na ebanghelismo” tan bangatan iray pulok dan “onla a man-ebanghelyo.” Limaran taon ed saginonor si John A. O’Brien, sakey a Katolikon klerigo, so angisulat ed pankaukolan a mamawalay balo iran babangatan “diad panamegley na iyakar ed sikara” tan aliwan basta “onyurong ed saray abung tayo.” Tan nen Enero 1994, inkuan nen Pope John Paul II ya “aliwa lan panaon pian ibaing so Ebanghelyo, panaon la pian ipulong itan ed amin.”

Mabitar ya agdedengeley karaklan iyan aminpigan panadagdag ed pankaukolan na saray ebanghelisador. Inkuan na sakey ya artikuloy peryodiko ed Australia ya Illawarra Mercury: “Saray prominentin taga-Abalaten Baybay a Katoliko so agmagunaet a mangadapta’d paraan-na-Tastasi nen Jehova a panangiyasingger ed pananisia ra.” Imbaga na sakey a too a say ebanghelismo so “agkabiangan ed mentalidad na Katoliko.” Inrason na sananey: “Maabig ed Simbaan so mangiyalibansa’d inkasikato, balet aliwan diad pantoktok ed puerta. Anganko ta magmaong no diad relihyoson panagbangat odino diad koreo.” Anggan say dean na sakey a katedral diman so agtanton segurado no panon ton ipakabaliksan so ibabaga na papa. “Ipapaseseg mi ed saray totoo ya agamilen day amta ran Ebanghelyo diad mismon bilay da,” inkuanto. “Balet say paraan ya itotoktok ed puerta so sananey lan bengatla.” Sustoy impanegek na paulon balita ed sakey ya artikuloy peryodiko: “Agtatalinengen na saray Katoliko so kerew na Papa.”

Anggaman ed insaew na Kakristianoan a man-ebanghelyo, masulok a limaran milyon a Tastasi nen Jehova so manguunor ed ganggan nen Jesus ya “onla kayo . . . tan manggawa kayo na saray babangatan ed amin a nasyones.” (Mateo 28:19, 20; ikompara so Gawa 5:42.) Say puerta-ed-puertan panagpulong da so nagagawa la’d masulok a 230 a daldalin. Positibo so mensahen tarok da, a mangipapabitar ed makapakelaw iran sipan na Biblia parad arapen. Akin ya agmitongtong ed sikara diad ontumbok ya idalaw da?