Ligliwa Legan na Apatiran Taon a Bakal
LEGAN na apatiran taon a bakal ed sakop na datin Yugoslavia, dakel a totoo so anagmak na kairapan tan pirmin kakisiran. Kaiba ed sikara so nilasus a Tastasi nen Jehova, a sitotoor a nantultuloy a nandayew ed “Dios na ami ligliwa.”—2 Corinto 1:3.
Diad Sarajevo, anagmak iray totoo na sananey nin kairapan ed panaayam ed baleg a syudad a satan so kinobkob legay bakal. Wala so kakisiran na koryienti, danum, itungo, tan tagano. Panon a nantultuloy so Kongregasyon na Tastasi nen Jehova ed Sarajevo ed silong na onia’ran masyadon kipapasen? Saray Kristiano ed kabangibang a daldalin so angirisga ed bilay da pian nitarok so dakel a tulong. (Nengnengen so The Watchtower, na Nobyembre 1, 1994, pahina 23-7.) Ontan met, saray agagi ed Sarajevo so naniiteran ed no anto so walad sikara, a manunaan so pananginabang ed espiritual iran bengatla. Diad panaoy inkakobkob sakey a Kristianon manangasikaso ed satan a syudad so angiter ed onggendan a report:
“Papablien min tuloy iray miting mi. Sikamin sanasawa, pati arum nin 30 totoo, so manaakar na 15 kilometro paonla ed saray miting. No maminsan et niyanunsio a say danum so nisuplay sano panaon na saray miting. Anto so gawaen na agagi? Mansiansia ta ira ed ayaman odino onatendi ed saray miting? Mas lablabayen na agagi so onatendi ed saray miting. Naynay a mantutulongan iray agagi; antokaman so wala ed sikara, inabang da. Sakey ya agin bii ed kongregasyon mi so manaayam ed paway na syudad, asingger ed takel; kanian medyo mainomay toy mangalay itungo. Sikato met so mantratrabaho ed sakey a panaderya, tan say upa to et arina. Sano posibli, sikatoy manluto na baleg a tinapay tan awiten itan ed miting. Kayari na miting, diad pasempet la, ipisagan toy balang sakey.
“Importanti ya anggapo ed agagi so manliknan nakakaindanan. Anggapoy mikabat no siopa ed sikami so ontumbok a mankaukolan na tulong lapud agmaabig a kipapasen. Sanen mayelo iray kalsada tan sakey ya agin bii so maletey ed bunigas to, saray kalangweran tan mabibiskeg ya agagin lalaki so angiguyor ed sikato ya akalugan ed sakey a sleigh pian naatendian toray miting.
“Amin tayo so mibibiang ed panagpulong, tan benendisyonan nen Jehova iray sagpot mi. Naimano to so pakaskasin kipapasen mi ed Bosnia, balet ta benendisyonan to kami tekep na indaak—indaak ya agmi nin balot anengneng sakbay na bakal.”
Ontan met, diad arum a natatabek-na-bakal iran parti na datin Yugoslavia, panggagayagaan na Tastasi nen Jehova so idaraak anggaman ed pirmin kairapan. Onia so report a nanlapud opisina na Tastasi nen Jehova diad Croatia nipaakar ed sakey a grupo na Tastasi: “Saray agagi a manaayam ed Velika Kladuša so walaan na masyadon mairap a panaon a pidenengan. Say baley so nilusob ed aminpigan danay. Kaukolan ya ipaliwawa na agagi so neutralidad da ed saray taga-Crotia, taga-Serbia, tan nanduruman sundalo a Muslim. Segurado, kaukolan dan sungdoan so dakel—kipriso, panagpekpek, eras, kapeligroan ed ipapatey. Siansia, amin da so mansiasiansian matoor tan walaan na matalonggaring a pribilihyo ed pakakanengneng ed pamibendisyon nen Jehova ed aktibidades da.”
Anggaman ed sarayan kairapan, tuloytuloy a panggagayagaan na Tastasi nen Jehova ed Velika Kladuša tan kaabay a Bihać so indaraak legan a siseseseg dan inanabang so mensahe na Dios nipaakar ed ligliwa diad kakaabay da. Sakey a dagup na 26 a manangipalapag na Panarian manlapud sarayan duaran paspasen so mangikokondukta na 39 a panangiyaral na Biblia!