Sakey a Magasin a Manetenyeg ed Puso

AGNABILANG a magasin so nipapalapag ed interon globo pian napenek so pakakaerasan na managbasa parad impormasyon odino panliliket.

Anto so manggawan nikadkaduma ed magasin ya egnam? Say onggendan a sulat, a naawat na sangan opisina ed Watch Tower Society ed Alemanya, so makapangiter na ebat:

“Misalamat ak ed sikayon maong, pinablin agagi, ed saray sagpot tan kimey yo. Sanen saray duaran anak kon lalaki tan siak so sinmempet manlapud miting, anggaman saman so 9:30 n.l., kinaliktan kon talinengen so sankabaloan a Panag-Bantayan [ed audiocassette]. Legan a sisinopen koray plato, ginapoan kon tinalineng so unonan aaralen ya artikulo (Abril 1, 1995). Aliknak a kaukolan kon talinengen lamet iya, kanian intundak so kimey ko ed kusina tan binasa so artikulo [“Sikayo So Mabli ed Imaton na Dios!”] ed Say Panag-Bantayan a kabansag so tape. Tinenyeg to so pusok, nagkalalo la ed komapat tan komalima iran parapo. Tan insan tinmedter iray luak​—balet agnambayag. Misalsalamat ak ed si Jehova a siak so mabilay tan kabiangan na totoo to tan siak, kaiba so dakerakel ni, so makapangipaamta ed ngaran to. Talagan anggapo so rason pian manliknan andi kakanaan. Say espiritu nen Jehova so walad totoo to. Mankakasakey tayon amin komon a mansungdo tan onalagey a malet ed pananisia. Tekep na Kristianon liknaan, say agi yo ed pananisia.”

Say Panag-Bantayan so mangiiter na nagkalalo nin impormasyon. Satan so manetenyeg ed kapusoan na saray managbasa tan pepeneken toray pilalek da parad espiritual a pakatagano tan nipanpanaon a panamaseseg. On, Say Panag-Bantayan so mangitatarya na “tagano ed suston panaon.”​—Mateo 24:45.