“Agmo Ira Patataboyen!”

“NO SAKEY ed Tastasi nen Jehova, odino anggan duara ni, so mantembri ed puertam, agmo ira patataboyen!” so isisimbawa nen Corriere della Sera. Say peryodiko so manutukoy ed sakey ya eksena ya agawa ed Treviso, amianen ya Italya, a ditan et sakey a negosyante so abalangan lawari na masulok a sakey milyon a lire (masulok a $600, U.S.) lapud impamataboy ed duaran Tastasi a binmisita ed sikato.

Unong ed peryodiko, inkabat na duaran Tastasi so inkasikara ed laki ed onia iran salita: “Natan et maong ya agew parad sika. Sikami so Tastasi nen Jehova, tan walaan kami na mablin bengatlan iter ed sika.” Kabekta, say agmakaaron negosyante so angikapot a bigla ed puerta, ya agto la pinasumpal so ibabaga ra.

No tinmalineng labat komon so laki, naamtaan to komon a saray Tastasi so linma ed abung to pian ipawil so pitaka to, ya aromog da ed sakey a bangko ed parke. Kanian say nagawaan labat na Tastasi et awiten so pitaka to tekep na saray karga to ed sankaasinggeran ya estasyon na pulisya. Diad kaimbuasan to, impawil itan na pulis ed makankien.

“No sananey so walad ontan a kipapasen na duaran pakaskasin [Tastasi],” kuan na Il Gazzettino di Treviso, “sikato anganko so . . . angisinop ed baleg a kantidad a karga na pitaka. Balet aliwan saray Tastasi nen Jehova, a talagan sigpot a matua.”

Anto so mamapakiwas ed Tastasi nen Jehova a magmaliw a “sigpot a matua”? Say aro ra ed Dios tan ed kakaabay da, a mitunosan ed saray bangat nen Jesu-Kristo. (Mateo 22:37-39) Satan no akin met a saray Tastasi nen Jehova so oonla ed kabkaabungan pian iyabawag so maong a balita nipaakar ed makapakelkelaw a “balon dalin” ya insipan nen Jehova a Dios. Say ontan a mensahe na ilalo so makanan tuloy nen say antokaman a materyal a kayarian!​—2 Pedro 3:13.