Report na Saray Manangiyabawag na Panarian

‘Sakey a Baleg a Kaput na Aktibidad so Alukasan La’ ed Cuba

SI APOSTOL Pablo so matalonggaring a managpulong na maong a balita na Panarian na Dios. Inanamot ton amin so pankanawnawan inabang ed arum so sipan na Manamalsa ya andi-anggaan a bilay parad matulok a katooan. Diad pamibisita ed kadaanan ya Efeso, anengneng nen Pablo so balon situasyon a mangiyabuloy ed sikaton natulongan ni dakel a totoo. Inkuanto: “Ontunda ak ed Efeso . . . , lapu ed sakey a baleg a kaput [na aktibidad, NW] . . . so alukasan ed siak.”​—1 Corinto 16:8, 9.

Naeksperiensia met na Tastasi nen Jehova ed Cuba iratan a balon situasyon. Anggaman agni opisyal a nirehistro, bulos lan ninanabang natan na Tastasi so ilalo ra unong ed Biblia ed saray kabaleyan da. Diad agano ni et imbalikas na gobierno ed Cuba so impapuson interes to ed pangiyabuloy ed ikurang na nanduruman relihyoson grupo tekep na kawayangan. Sipupublikon sinalambit nen Presidenti Castro a panggagayagaan la natan na gobierno na Cuba so maaligwas a siglaotan na Tastasi nen Jehova bilang relihyoson grupo.

Sayan balon situasyon so angilukas ed ‘baleg a kaput na aktibidad’ parad Tastasi. Alimbawa, agano ni et angilukas so Tastasi nen Jehova na opisina ed Cuba, ya ontutulong itan ed sikaran napantutunosay panagpulong a kimey ed satan a bansa. Masulok a 65,000 Tastasi so ontutulong ed totoo pian naaralan tan natalosan so Biblia. Uusaren day literatura na Biblia a singa say Panag-Bantayan tan Awake! iran magasin. Dakel ya onkiling ed inkatunong a taga Cuba so nagugunggunaan ed panangiyaral ed Biblia na Tastasi nen Jehova.

Regular a manmimiting iray Tastasi ed ankelag a grupo ed interon isla. No maminsan et panggagayagaan da ni ingen so pantitipon ed ankabaleg ya asamblea a titibukelen na ngalngali 150. Talagan aapresyaen da so permison naawat da manlapud saray autoridad na Cuba, a mangiiter ed sikara na pankanawnawa a makapandaragup a kaiba iray agagi ra ed espiritual, a mankakanta na panagdayew ed Dios, tan saniiban manpipikasi.

Agano ni et say “Maridios a Takot” a Distriton Kombension so agawa ed masulok nen say 1,000 danay legan na taloran sampot-simba. Kuan na sakey a report a napatnagan so “uksoy, disiplina, tan kareenan” ed amin a kombension. Kinomendaan na saray autoridad so Tastasi ed sayan pamaakaran.

Diad sankamundoan, panbabanikelan na tuan Kristianos a sumpalen so inter na Dios a ganggan ya ipulong so maong a balita na Panarian na Dios. Ontan met, panbabanikelan dan pansiansiaen so siglaotan da ed saray autoridad na gobierno. (Tito 3:1) Tutumboken na Tastasi nen Jehova so simbawa nen apostol Pablo, ya insulat to: “Ipure ’ko sirin, a manonaan, a nagawa komon so saray pangitagleey, pikakasi, panangyesel, pisasalamat, nisengeg ed saray amin a totoo, nisengeg ed saray arari tan amin a wala ed atagey a betang; pian napalabas tayo so sakey a bilay a mareen tan mapayapa ed amin a kasimpitan tan kabintaan.”​—1 Timoteo 2:1, 2.