Tuan Kaligenan—Sakey a Kalat a Mairap a Dampoten
LABALABAY na ugaw ya Arnold so stuffed toy ton tigre. Inerman so laen to, awit-awit to itan—diad panggalaw, diad pananganan, diad dukolan to. Parad sikato, say tigre so mangiiter na ligliwa tan kaligenan. Sakey ya agew et linmesay problema. Nababalang so tigre!
Legan ya onaakis si Arnold, sinukisok na ina, ama, tan taloran kuya to so maawang ya abung da pian anapen imay tigre. Diad kaunoran et sakey ed sikara so akalmo ed satan ed sakey a drower. Ompapaway, ya inyan diman nen Arnold tan kayari to et alingwanan toy kawalaan na saman. Say tigre so nipawil, tan pinunasan nen Arnold iray lua to. Sikato lamet so maliket tan maligen.
Agaylan abig komon no amin a problema et onman kainomay a naresolbi—a singa kasimple pananap na galawgalaw a tigre ed drower! Balet, parad maslak a totoo, mas seryoson tuloy tan komplikado nen say saya iray problema ed kaligenan. Singa ed inerman, manuumameng so totoo, ‘Magmaliw ak ta a biktima na krimen odino karawalan? Walaak ta ed kapeligroan ed pakaandiay trabaho? Segurado ta’n nawalaay pamilyak na magenap a tagano? Paliisan ak ta na arum lapud relihyon odino lapud etnikon abenegan ko?’
Say bilang na totoon andian na kaligenan so abalbaleg. Unong ed Nasyones Unidas, ngalngalin taloran bilyon so aglambengat makasarag a manpatambal na ordinaryo iran sakit noagta ontan met ed nakakaukolan iran tambal. Masulok a sakey bilyon a totoo so maniirap lapud pirmin inkaduka. Ngalngalin sakey bilyon, anggaman sarag day mantrabaho, so walaay melag a sueldo. Say bilang na saray refugee so ondaraak. Diad sampot na 1994, ngalngali 1 ed kada 115 a totoo ed dalin so napapaskar a taynan so ayaman da. Minilyon a bilay so nagegetel lapud $500-bilyon ed kada taon a negosyon narkotiko a mansusumpal ed dakerakel a krimen tan karawalan. Say bakal so manederal ed bilay na minilyon. Nen 1993 labat, 42 a bansa so akibiang ed ankabaleg iran labanan, bangta 37 nin arum so akasagmak na mapulitikan karawalan.
Nansisiglaotan so bakal, inkaduka, krimen, tan arum nin mamapagyaw ed kaligenan na too, tan saratan so ondarakel ni. Saratan a problema so andian na singa tigre-ed-drower iran solusyon. Diad katuaan to, agbalot naresolbi na totoo iratan.
“Agmo ipapasen so talek mo ed saray dederlengan, nisay ed anak na mangaraldalin a too, a diad sikato et anggapo so kilalaban,” so pasakbay na Salita na Dios, say Biblia. Diad siopa, sirin, so pakapanmatalekan tayo? Intuloy na sayan kasulatan: “Maliket so sakey a say tulong et walad Dios nen Jacob, a say ilalo to et walad si Jehova a Dios to, say Managgawa na tawen tan dalin, ed dayat, tan ed amin a walad saratan.”—Salmo 146:3-6.
Akin a sikatayo so makapanmatalek ya itarok nen Jehova so kaligenan ed sayan dalin? Posibli ta so panggayaga na maligen tan maliket a bilay natan? Panon ya ekalen na Dios iray babeng ed kaligenan na too?