Sakey ya Okasyon ya Agmo Nepeg a Saewen

“Kada ayadyarin regalo tan kada ayadyarin palangkap” so manlalapud Dios, say mangatatawen ya Ama tayo. (Santiago 1:17) Say sankabalgan a regalo ya inter na Dios ed makasalanan a katooan et say probisyon parad kipawil da ed dati diad panamegley na bogbogtong ya Anak to, si Jesu-Kristo. Say impatey nen Jesus bilang Mananondon tayo so gawaen ton posible so andi-anggaan a bilay diad paraison dalin. Diad Lucas 22:19, ginanggan itayo a nodnonoten so impatey to.

Ampetapetang ya iimbitaan ka na Tastasi nen Jehova a mibiang ed sikara diad italineng ed ganggan nen Jesus. Sayan tinaon a panngilin a nagawa kaselek na agew diad petsa a mipetekan ed Nisan 14 ed say lunar a kalendaryo na Biblia, a satan so nagawa ed Martes, Abril 2, 1996. Tandaan iyan petsa ta pian agyo nalingwanan itan. Saray Tastasi nen Jehova ed lugar yo so mangibaga na eksakton pasen tan oras a pantitiponan.