Say Katuaan na Ebanghelyo

SAY taloran ankekelag a kabiangan na sakey a manuskrito na Ebanghelyo nen Mateo, a kabkabat bilang P⁶⁴, so walad panangasikaso na Magdalen College diad Oxford, Inglatera, nanlapulad 1901. Diad apalabas et sisiaen na saray iskolar a satan et apetsaan na bandad saginonor a kabiangan na komaduan siglo K.P.

Agano ni, inkondukta nen Carsten P. Thiede, sakey ya eksperto na papyrology ed Paderborn, Alemanya, so sakey a maalwar ya eksaminasyon ed P⁶⁴, a laktipen na saya iray kabiangan na 10 bersikulo manlapud Mateo kapitulo 26. Say resulta? Diad impansulat ed Zeitschrift für Papyrologie und Epigraphik (Journal of Papyrology and Epigraphics), dedeskribien nen Thiede iray kabiangan na Oxford a bilang “sakey a kabiangan na Kristianon codex na inmunan siglo, anganko (anggaman agmaseguro) et apetsaan na AD 70.”

Saray obserbasyon nen Thiede so sengegan na sangsangan diad medya tan diad sirkulo na saray iskolar. Akin? Lapud say kaplesan ya aawaten bilang sankadaanan a natitilak nin kabiangan na teksto manlapud Ebanghelyo et say P⁵², sakey a kabiangan na Ebanghelyo nen Juan a nanlapu ni’d ngalngali 125 K.P., odino asasakbay na say komaduan siglo.

Balanglan say balon petsan initer ed saray kabiangan na papiron P⁶⁴ so malaknab ya awaten so nanengneng ni. Anggaman kuan, say asasakbay a petsa so aglambengat manggawa ed P⁶⁴ a say sankadaanan a piraso na Ebanghelyon wala; mangiiter met iya na kaaruman ya ebidensya a say Ebanghelyo nen Mateo so talagan nisulat nen inmunan siglo, ompan sakbay ni ingen na 70 K.P., sanen dakel ya akatasi ed saray ebento na bilay nen Jesus et mabilay ni pian pekderan so katuaan na Ebanghelyo.

[Picture Credit Line ed pahina 32]

Diad panangiyabuloy na President and Fellows of Magdalen College, Oxford.