Adeside so Kaso Sumpad Tastasi nen Jehova

KAYARI naulit-ulit a panangiguntang, say Court of Appeals ed Tesalonica, Gresya, so diad kaunoran et nanaabet nen Hunyo 8, 1995, pian dengeley kason sumpad apatiran bibiin Tastasi nen Jehova. Say ipapakasalanan ed sikara? Proselitismo, ya isesebel na Griegon ley ed loob na masulok lan limaran dekada.

Balet, diad panaon na impantitipon ed korte, say manunan tasi ed panamakasalanan​—say pari ya angisugsog ed kaso sumpad saraman ya apatiran bibii—​so inatey la. Sananey a pari so analin mantestigo bilang kasalat to, balet ag-inawat na korte so kerew to. Kanian, agmakapasurpresan nansumpal lambengat ed 15 minuto so bista! Inusisa na huis so arum a tastasi ed panamakasalanan tan nalmoan iray idedepensa ya ag-ira nankasalanan ed impangagamil na sumlang ed ley a proselitismo. Sayan desisyon so mangipapatnag a saray Griegon korte so mabulos a manrespeto tan ontulok ed desisyon ya adampot nen 1993 na European Court of Human Rights.

Nagkalalo lan makapasurpresa so pakanengneng ed taloran bibii a nantestigo ed panamakasalanan ya asinggeran iramay Tasin idedepensa, a sigpot-puson mamapasamano ed sikara. “Onkekerew kami na despensa parad amin na sarayan bengatlan agawa,” so inkuan na sakey ed sikara. Kuanto ni: “Agmi itan kasalanan. Say pari so amaskar ed sikami a mamakasalanan ed sikayo. Natan ta inatey la, labay min onla kayo ed baryo mi tan ed saray ayaman mi.”

Diad ontan et si Jehova so angiter lamet na makapakelkelaw ya impanbiktorya ed totoo to ed Gresya. Saray proselitismon ley so nipasa ed Gresya nen 1938 tan 1939. Inganggan nen 1993 na European Court of Human Rights a lingoy pangusar ed sayan ley pian pasegsegangey Tastasi nen Jehova.​—Nengnengen so The Watchtower, Setyembre 1, 1993, pahina 27-31.