Agka Manemem na Imbel na Linawa

OMPASEN a satan so makapaangat nen kapiganman so ipaliis na ag-iyembel ed siopaman ya akaopendi ed sikatayo. Say Biblia so walaan na praktikal a simbawa ed ontan iran situasyon. “Manpasnok kayo,” inkuan nen apostol Pablo, tan “ingen et agkayo mankakasalanan; ag-abuloyan ya onselek so agew a sikayo so sipapasnok ni.”​—Efeso 4:26.

Sano walay akagawa na lingo ed sikatayo, normal labat so pakapasnok. Satan ya imbaga nen Pablo a “onsanok kayo” so mangipapanengneng a say sanok so no maminsan et manepeg met​—anganko diad kiwas lapud agmakatunongan a tratamento odino lingon hustisya. (Ikompara so 2 Corinto 11:29.) Balet sano agnaresolbe, anggan say makatunongan a pasnok so mansumpal ed makaderal a pansumpalan, mangitonton ed baleg a kasalanan. (Genesis 34:1-31; 49:5-7; Salmo 106:32, 33) Kanian, anto so gawaen mo sano naliknam a sikay makapasnok?

Diad maslak iran kaso a nasasaglawi so melag iran pakaluksoan, palabas mo lay agawa “tan mandeen” odino asinggeran so akaopendi tan pantongtongan so isyu. (Salmo 4:4; Mateo 5:23, 24) Dinanman a dalan, sankaabigan no nauksoy a tampol so pamaakaran ta pian say imbel na linawa so agla ombales tan mamawala na makapasinagem iran resulta.​—Efeso 4:31.

Mabulbulos a peperdonaen nen Jehova iray kasalanan tayo, anggan saray kasalanan lapud agpikakabat et nayarin agnaamtaan ya agawaan. Agtayo ta nayarian met a perdonaen so melag ya impakalukso na kaparan too?​—Colosas 3:13; 1 Pedro 4:8.

Makapainteres, say Griegon salita a “perdona” so literal a mankabaliksan a “palabasen.” Agkakaukolanen na panamerdona a paraiseten odino konsintien so lingo. No maminsan et say kaukolan labat et say pamalabas ed situasyon, a moriaen a say panemem ed imbel na linnawa so mangarum labat na awit mo tan buyaken to so pankakasakey na Kristianon kongregasyon. Niarum ni, say panemem na imbel na linawa so maneral na bunigas mo!​—Salmo 103:9.