Tastasi nen Jehova ed Interon Mundo—New Zealand
KASIN makapangidayew iray isla ed si Jehova? On, unong ed Isaias 42:10: “Mankanta ed si Jehova na sakey a balon kanta, say dayew to manlapud sankaarawian na dalin, . . . sikayoran isla tan sikayon manaayam ed saratan.” Saray isla a manitibukel ed New Zealand so maseguron mangidadayew ed si Jehova. Kabkabat ed mundo lapud saray linok, fjord, atagtagey a palpalandey, glacier, kadayatan, masalumpapak a katakelan a napnoy pako, tan maawang iran panagpastolan, say New Zealand so talagan mangipapatnag ed karlangan tan kabalgan na Manamalsa na tawen tan dalin.
Nanlapulad kagapo na koma-20 siglo, ondarakel a taga New Zealand so angiyarum ed saray boses da pian mangidayew ed si Jehova diad pangipapaarap ed sikato na puron panagdayew tan diad panginanabang ed arum na maong a balita na Panarian na Dios. Diad agano ni, sakey a Tasi ya akadngel na maong ya eksperiensia nipaakar ed panagtasi ed kakanayon so nandesiden mantasi ed pamilya to. Angiregalo na saray libron Makapambilay Kayo na Ando lan Ando ed Paraiso diad Dalin ed pigaran kapamilyaan. Say nagmaliw a resulta? Inreport to a sakey ya agin bii tan sakey ya agin laki so manaaral la natan na Biblia, sakey a kaanakan a laki so abautismoan la bilang sakey ed Tastasi nen Jehova, tan say arum natan so mas mangawat na katuaan na Salitay Dios. Dakel ni so kaukolan ton pulongan; nilikud ed atateng to, sikatoy walaan na anemiran agagin lalaki tan siameran agagin bibii!
Nidadayew met si Jehova sano mantutulongan so Tastasi ed panangipaalagey na saray Kingdom Hall. Alimbawa, sakey a kolumnista na peryodiko a si Roy Perkins so nansulat diad Opotiki News na Mayo 17, 1994: “Bilang sakey ya agmananisia, pandinayewan kon tuloy iray kimey tan sagpot na amin a dedikadon komikimey ya angusar na dakel a panaon tan sagpot ed proyekto lapud panangaro ra’d Dios da.
“Agak balot akanengneng odino akadngel na sakey a grupo-grupon pantataloan ed amin ya oras ed sayan impankimey ya inusar ed sampot-simba . . . Mankikimey iray bibii a kaampar iray lalaki ed tapew na andamyo, mamabaklas, mangaalsa, manasakbat, amin diad sakey a relaks tan maliket a kipapasen.
“Tan anggapoy anggan adarak a sakey a minuto lapud panagsigarilyo na anggan sakey labat ed sikara. Malinis so dagem parad amin a komikimey a walaay kapasidad nilikud lambengat ed angob na pintura tan dabok na laryo.”
Oniay insulat na ulop na mamatatken na Opotiki Congregation: “Say interon proyekto so amawala na ungol ed baley. Ompatnag a singano pantotongtongan na amin itan. Pigara a panangiyaral na Biblia so nigapo. Sakey a bengatlan nagkalautlan aromog min makapasagyat et say nipaakar ed relihyoson sanasawa a diad loob na dakel a taon so kinmerew ed sikamin agla ra dadalawen. Inagew-agew iran linma ed pangipapaalageyan tan ag-abayag et diad saray miting. Diad saginonor et inkuan na asawan laki, ‘Naimanok a talagan sikayoray totoo na Dios. Diad inkasiak et abayag ko lan pinirawat ed bilay ko a miulop ed onian nengneng na totoo.’”
Diad apalabas a taon, inkuan na sakey a kolumnista parad Otago Daily Times so onggendan nipaakar ed maples a nipaalagey a Kingdom Hall diad Dunedin: “Saya so makatantandan agawaan, makatantandan alimbawa na motibasyon tan dilin-sagpot.” Inkomento met na parehon peryodiko: “Saray taga syudad so nambantay tekep na pandinayew legan a say baleg a paalagey so napoporma ed pakakaimaton da, tan maseguron dakel so maniisip no anto kasi iran pananguman tan marakep iran proyekto so nagawa no saman met a kabaleg na pinannanagnagan a boluntaryon gunaet tan dakel a kooperatibon awawey so niwala. Say Kingdom Hall so sakey ya ikinon a simbolo na positibon sagpot a mamapawala na saray resulta.”
Diad dakel a nilasus a binmisita ed pangipapaalageyan, sakey a laki so akaimaton a saray Tastasi so mangipapaalagey na “saray simbaan” bangta say relihyon to so mangilalako ed saratan lapud idaraiset na saray membro to. “No akapanalagar kayo komon na labindua nin bulan, ompan nasaliw yo so sakey nin kayarian mi,” insali to aglapiga. “Kaukolan min ilako so sakey lapud agkami la makabayar. Balet, siempre, anggapoy babayaran yoran klero. . . . Tan insan melag labat so gagastosen yo ed panagmantini, aliwan atatagey a bilding a walaan na saray utok ya imposiblin mantinien.”
Malinew, saray isla so talagan makapangidayew ed Dios. Komon ta saray dayew ed si Jehova so mantultuloy a nipaknol ed sayan marakep ya isla ed Pasipiko—tan ed interon mundo!
[Kahon ed pahina 9]
SAY KIPAPASEN NA BANSA:
1994 Serbisyon Taon
PANTOK A BILANG NA MANTATASI: 12,867
RATIO: 1 a Tasi ed kada 271
INMATENDI ED MEMORYAL: 24,436
PROMEDYON MANANGIPALAPAG A PAYUNIR: 1,386
PROMEDYON PANANGIYARAL NA BIBLIA: 7,519
BILANG NA ABAUTISMOAN: 568
BILANG NA SARAY KONGREGASYON: 158
SANGAN OPISINA: MANUREWA
[Litrato ed pahina 9]
Saray payunir a walad lawak nen ngalngali 1930
[Litrato ed pahina 9]
Saray pasilidad na sangay Manurewa
[Litrato ed pahina 9]
Panangipulong na mensahe na Panarian diad Devonport, Auckland