Kinunsidera-Lamet so Panangiyalis na Dala

DIAD sayan mauddiem a taon na AIDS, say sankabalgan a manataktakot ed bunigas na pasyenti so nayarin makaloob ed panag-operaan. “Anggapo so posiblin paraan a napagmaliw tayon sigpot a malinis so suplay na dala,” kuan nen Dr. Richard Spence a diad masulok lan sakey a dekada et mangidedirehi ed Center for Bloodless Surgery diad Cooper Hospital-University Medical Center ed Camden, New Jersey, E.U.A.

Agpankelawan, say medical center so manatambal ed dakel a Tastasi nen Jehova, a say nibased-Biblian panangipulisay da’d panangiyalis na dala so kabkabat a maong. (Levitico 17:11; Gawa 15:28, 29) Anggaman ontan, dakel ya aliwan-Tastasin pasyenti so manpapanengneng met ed center pian manpatambal, lapud kapagaan nipaakar ed potensyal a kapeligroan na panangiyalis na dala, a lalaktipen toy pakaalisan na hepatitis, AIDS, tan arum niran sakit. “Say idaraak na AIDS so mangipapatnag a nakaukolan so panagsuri ed dala,” kuan na say Courier-Post Weekly Report on Science and Medicine. “Balet wala niray kason makalosot ed prosesoy panagsuri ed dala lapud arum so naalisan na virus sakbay a satan so naamtaan ed sakey a panalsali.”

Nisesengeg ed saratan a kapeligroan, say Center for Bloodless Surgery so manguusar na saray alternatibo ed panangiyalis na dala, pati say panangisaksak-lamet ed dilin dala na pasyenti​—sakey a teknik ya aromog na pigaran Tasin agnasuppiat diad silong na pigaran sirkumstansya.a Sananey a panagtambal et lalanoren toy panangusar na tambal a mamaatagey ed dilin dalay pasyenti. Niarum ni, sakey a synthetic blood substitute so tunggal paminsan ya uusaren pian napabiskeg so pamawala na oksihena ya agla kaukolay panangiyalis na dala. “Kaliktan na saray Tasi nen Jehova so sankaabigan a kaasikaso ed medikal,” kuan nen Dr. Spence, “balet labay daray alternatibo imbes a saray panangiyalis.”

Misalamat iray Tastasi nen Jehova ed pikokoopera tan tulong a naawat da manlapud saray doktor a manrerespeto’d relihyoso iran kumbiksyon da. Bilang resulta, talagan sikara so makakaawat na “sankaabigan a panangasikaso ed medikal” tan apansiansia ran malinis so konsiensia ra ed imaton nen Jehova a Dios.​—2 Timoteo 1:3.

[Paimano ed leksab]