Isalba nen Jehova so Dalin

SARADO ed pigaran oras ed inagew-agew so sakey ya airport a walad pulo na Maldives. Akin? Lapud nadedelap so runway sano atagey so danum na dayat, a magmamaliw a peligro so idapo na saray eroplano. Natatakot iray sientista a say dantal na dayat ed saray isla na Maldives so nayarin ontagey na ag-onkulang na sakey metro ed ontumbok a siglo. Manwarin saya so ompapatnag ya agtanton baleg a karakel, nayarin naandi ed mapa so pitoran bansan pulpulo lapud ontan a tagey. Diad tua, unong ed UN Chronicle, say duaran metron itagey na dantal na dayat so nayarin pansengegan na ilereg na interon arkipelago, a titibukelen na ngalngali 1,200 a pulpulo!

Anto so sengegan na itatagey na dantal na dayat? Unong ed UN Environmental Program, lapud polusyon ed atmospera na dalin a resulta na “greenhouse gases,” onlalaknab so dayat ed mas ampetang a lugar, natutunaw iray singa-pulon bloke na yelo, tan diad ontan et ontatagey so dantal na dayat. Say Panos Institute a walad London so mangibabagan say polusyon so “nayarin angigapo na kalkalnan sankagloboan a kadederal a manguuman ed saray mismon ketegan na dalin tan dayat.”

Say kiwawala na sankagloboan ya ipepetang so pantataloan ni na saray sientista. Anggaman ontan, makapanseguro tayo a saray problema ed kaliberliber so agmangamper ed gagala na Dios. “Say mabungan dalin so masdek a niletneg,” kuan na Biblia. “Agbalot naderal itan.” (1 Awaran 16:30, NW) Walaay panangontrol si Jehova ed kaliberliber na dalin, tan makapanggayaga tayo ya asingger lan isalba to so dalin tan say katooan manlapud kaderal.​—Salmo 24:1, 2; 135:6; 2 Pedro 3:13.

[Picture Credit Line ed pahina 31]

Drowing a nibased litrato na NASA