Tastasi nen Jehova ed Interon Mundo—Zambia
MALAPAR, paliko-liko iran patar ed toktok na sakey a maawang, 1,200 metro ed tagey na palandey—saya so Zambia, bansan walad pegley na abalaten-sentral Aprika. Diad bandad amianen-sagur, say Munchinga Mountains so walaay tagey a 2,100 metro. Say makapanyarin Zambezi River, a makapakelkelaw so tanol to a singa say bantog-ed-mundon Victoria Falls, so manutugyop ed baleg a kabiangan na mamaabalaten a ketegan na sayan dalin a napapaliberan na daldalin. Wala so baleg a pandurumay totoo ed masulok a 70 nanduruman tribu. Waloran manunan lenguahe so sasalitaen dia, balet wala ni dakel.
Nen 1911, sakey a nikaduman lenguahe so niletneg tan linmaknab ed Zambia. Angitarok iray bisita na saray kopya na Studies in the Scriptures, tan nanlapulad saman et nambanikelan na Tastasi nen Jehova a palaknaben ed Zambia so “puron lenguahe” na katuaay Biblia. (Sofonias 3:9, NW) Nagkalautlan makapaangat et saray agmakasulatan a sisisiaen nipaakar ed kipapasen na inaatey. Sano naaralan na totoo so katuaan tan nanengneng no panon a saray anito so angaripen ed sikara, say epekto so manangibulos!—Juan 8:32.
Alimbawa, onia so report na sakey a matoor ya agin bii: “Sanen biglan inatey so pangamaen ko, awetwet so kanonotan nen inak, a maseet a membro na United Church of Zambia. Kayari sakey simban dukey a ritual ed panagponpon, pinmawil ak ed purok pian amtaen no komusta lay kipapasen da. Kasabik, walay sakey a masiken ed abung, tan sanen sikatoy inmalis la, intepet ko ed baik no siopaman. Inkuanton sikatoy manananem-a-doktor. Labay nen inak a sikatoy opaan pian ibales so impatey na agi to pian ondeen lay kamarerwa to. Anisian saman so ‘manyayatawyataw labat,’ a singa imbaga to.
“Insalaysay ni nen Bai a dugarugay inbisitak lapud say pamilya so manaanap na kuartan ibayar ed manananem-a-doktor. Kinerew ton mitulongan ak, balet mataktikan insalaysay ko’d sikato bilang sakey a Kristiano et agnayarin mitulongan ak. Akikatunongan ak ed sikato manlapud Salmo 146:4, a mangipapanengneng ya andiay kanonotan iray inatey—ya anggapoy kamarerwan ‘manyayatawyataw.’ Kinonsidera mi met so Roma 12:19, a mangidadanet a betang nen Jehova so panangibales, aliwan sikatayo. Insan, imbagak ed inak so nipaakar ed ilalo na kioli a sinaglawi nen Jesus, a nirekord ed Juan 5:28, 29. Nandinayew ed mabiskeg a pananisiak ed saray sipan na Dios. Ag-abayag et aki-aral ed sakey a Tasi tan maples so inyaligwas to. Pinakset to so amin a pisiglaotan ed datin relihyon to tan insimbolo toy dedikasyon to ed Dios diad panamegley na bautismo. Natan et sikatoy sakey lan Tasi nen Jehova.”
Sakey nin agin bii so nanreport: “Inmatendi ak ed ponpon na asaway pangamaen ko. Diad insabik, naamtaan kon natnarasay pangamaen tan kapinsan ko. Agla ra angan nanlapulad impatey na panginaen ko. Sanen tinepetan ko’ra no akin, inkuan dan unong ed tradisyon et ag-ira nayarin manparlang pian manluto. Nanpresinta ak a siak lay manluto, balet natatakot iray pigaran membro na pamilya a no onsunggay ak ed sayan paganon kustombre, amin so naambagel!
“Insalaysay ko a bilang sakey ed saray Tasi nen Jehova, rerespetoen koy ibabaga na Biblia diad Levitico 18:30 tan agko tutumboken iray agmakasulatan a tradisyon. Insan impanengneng ko’d sikara so brosyur ya Spirits of the Dead. Lapud saya et abawasan so sesga, tan inggapok lay manparaan na tagano parad pangamaen ko tan ed arum. Say tepel na linawak so akatenyeg na liknaan na inateyan a kakanayon tan inmabuloy iran paiyaralan na Biblia. Sikara la natan so agbautismadon manangipalapag, tan maniilalo so interon pamilya ya agmanbayag et nabautismoan ira.”
Agaylan makapaliket parad sikatayo sano natalonaan na puron lenguahe na katuaan so kawewetwet ed relihyoson katilaan, nagkalautla ed saray nigalet-a-tuloy a panagkatunongan a mangaaripen ed inosentin totoo! Diad tulong nen Jehova et say puron lenguahe so onnanatnat diad Zambia, a singa nagagawa ed sankadalinan.—2 Corinto 10:4.
[Kahon ed pahina 9]
SAY KIPAPASEN NA BANSA
1994 Serbisyon Taon
PANTOK A BILANG NA MANTATASI: 82,926
RATIO: 1 Tasi ed kada 107
INMATENDI ED MEMORYAL: 363,372
PROMEDYON MANANGIPALAPAG A PAYUNIR: 10,713
PROMEDYON PANANGIYARAL NA BIBLIA: 108,948
BILANG NA ABAUTISMOAN: 3,552
BILANG NA SARAY KONGREGASYON: 2,027
SANGAN OPISINA: LUSAKA
[Litrato ed pahina 9]
Saray pasilidad na sanga na Watch Tower ed arawid-sentro na Lusaka
[Litrato ed pahina 9]
Panagpulong ed Shimabala, abalaten na Lusaka