Say Sankabalgan a Toon Nambilay ed Kapiganman

Kapitulo 91

Sanen Pinaoli si Lazaro

Si Jesus, ontan met ed saramay kaulop to, so akasabi natan ed pakanodnonotan a lubok nen Lazaro. Diad tua, saman so sakey ya ungib a sinaraan na bato ed lolooban. “Ekal yo so bato,” inkuan nen Jesus.

Ag-inmabuloy si Marta, agto ni atalosan no anto so gagala nen Jesus a gawaen. “Katawan,” inkuanto, “natan say bankay abolok la: ta apat agew la ya inatey.”

Balet ta intepet nen Jesus: “Ag ko ta inkuan ed sika, a no manisia ka, nanengneng mo so gloria na Dios?”

Kanian say bato so inekal. Insan intangay nen Jesus iray mata to tan nampikasi: “Ama, misalamatak ed sika ta dinengel mo ak. Tan amtak a sika dengelen mo ak lawas: ingen nisengeg ed katooan ya akaalagey ed liberliber sikato so inkuan ko, pian manisia ra a sika inbaki mo ak.” Si Jesus so mapublikon nampikasi pian nakabatan na totoo a say maganon gawaen to so nagawa diad panamegley na pakapanyarin naawat to manlapud Dios. Insan maksil ya inkelyaw to: “Lazaro, paway ka!”

Diad saman, si Lazaro so pinmaway. Saray lima tan sali to so siansia nin apotipotan na saray berber ed ponpon, tan say lupa to so asakbungan na abel. “Okbaran yo, tan paulian yo,” inkuan nen Jesus.

Diad impakanengneng ed milagro, dakel ed saray Judio a linma pian abageyen si Maria tan Marta so anisia ed si Jesus. Anggaman ontan, arum so linma ed saray Pariseo pian ibaga no anto so agawa. Sikara tan saray manunan saserdote so tampol ya anguksoy na sakey a pantitipon na Judion atagey a korte, say Sanhedrin.

Say Sanhedrin so mangilalaktip ed kaplesan ya atagey a saserdote, si Caifas, ontan met ed saray Pariseo tan Saduceos, saray manunan saserdote, tan saray datin atagey a saserdote. Saraya so angitagleey: “Anto so gawaen tayo? ta saya’n too mangawa na amayamay a tanda. No sikato so paulian tayo labat ya ontan, amin day totoo manisia naani ed sikato; et saray taga Roma onsabi ra et ekalen da so pasen tayo tan say nacion tayo.”

Anggaman saray relihyoson papangulo so amidbir a si Jesus so “mangawa na amayamay a tanda,” say mogmon bengatlan panpapagaan da et say dilin posisyon tan autoridad da. Say impamaoli ed si Lazaro so nikadkaduman mabiskeg a dapmeg ed saray Saduceo, lapud sikara so agmanisia ed kikioli.

Si Caifas, a nayarin sakey a Saduceo, so nansalita natan, ya ibabaga: “Angapo’n balot so amta yo, Ag yo met nanonotan a makana ed sikayo ya sakey a too so ompatey nipaakar ed saray katooan, tan pian say sankanacionan ag natawtaw.”

Say Dios so angimpluensya ed si Caifas ya ibaga iya, lapud si apostol Juan so angisulat ed saginonor: “Bang saya ag to [nen Caifas] inbaga [a] nanlapu ed inkasikato.” Diad katuaan et labay ya ibaga nen Caifas a si Jesus so nepeg a napapatey pian Sikatoy naamper manlapud kaaruman nin panigensigen ed saray posisyon na autoridad tan impluensya ra. Ingen, unong ed si Juan, ‘inprofeta nen Caifas a si Jesus so nakaukolan ya ompatey aliwan parad say nacion lambengat, noagta pian natipon a saksakey iray anak na Dios.’ Tan, peteg, gagala na Dios a say Anak to so ompatey bilang dondon parad amin.

Si Caifas natan so tinmalona ed pangiimpluensya ed Sanhedrin pian manggawa na plano a pateyen si Jesus. Balet si Jesus, a posiblin akaamta ed sarayan plano manlapud si Nicodemo, membro na Sanhedrin a makaaro ed sikato, so tinmaynan diman. Juan 11:38-54.

▪ Akin a mapublikon nampikasi Jesus sakbay a paolien si Lazaro?

▪ Panon a kinmiwas iramay akanengneng ed sayan kikioli?

▪ Anto so mangipatnag na inkauges na saray membro na Sanhedrin?

▪ Anto so gagala nen Caifas, balet diad anto so angusaran na Dios ed sikaton ipasakbay?