Say Sankabalgan a Toon Nambilay ed Kapiganman

Kapitulo 70

Panagpaabig ed Lakin Niyanak a Bulag

Sanen sinali na saray Judio a tupaken si Jesus, sikato so agtinmaynan ed Jerusalem. Saginonor, diad Sabaton, sikato tan saray babangatan to so manaakar ed syudad sanen akanengneng ira na sakey a lakin bulag nanlapulad inkiyanak to. Tinepetan na saray babangatan si Jesus: “Rabbi, siopa so nankasalanan, saya’n too, ono saray ateng to, kanian sikato so nianak a bulag?”

Anganko ta sisiaen na saray babangatan, a singa sisiaen na arum iran rabbi, a nayarin mankasalanan so sakey a too ed eges na ina to. Balet inyebat nen Jesus: “Ag nankasalanan so saya’n too, angan saray ateng to: ingen pian saray gawa na Dios nipatnag ira ed sikato.” Say inkabulag na sayan laki so aliwan resulta na espisipikon lingo odino kasalanan ya agawaan na balanglan say too odino saray ateng to. Say kasalanan na inmunan toon si Adan so nanresulta ed ag-inkayadyari na amin a katooan, tan sirin et walad kipapasen a nawalaay depekto a singa say kiyanak a bulag. Sayan depekto na laki so mangiiter natan na pankanawnawa parad si Jesus a mangipatnag ed saray gawa na Dios.

Indanet nen Jesus so kaganatan ed panggawa na sarayan kimey. “Nakaokolan tayo’n gawaen so saray [kimey] na angibakidia ed siak, leleg na agew ni,” kuanto. “Say labi onsabi, sano angapo lay too a makapankimey. Angad wadia ak ed mundo, siak so silew na mundo.” Agmabayag et say ipapatey nen Jesus so mangipelag ed sikato ed kabilungetan na lubok a no iner et anggapo lan balot so nagawaan to. Diad kaleganan, sikato so sakey a lapuan na kaliwawaan ed mundo.

Kayari na impangibaga na sarayan bengatla, si Jesus so linmukda ed dalin tan pinapitek to so lukda. Inyan toraya ed saray mata na lakin bulag tan inkuanto: “Onlaka, mandilamos ka ed tangke na Siloe.” Say laki so inmonor. Tan sanen ginawa to, sikato so makanengneng! Agayla so liket to diad impawil to, a makanengneng ed ununan pankanawnawa ed bilay to!

Saray kakaabay tan arum a makaamta ed sikato so mankelaw. “Aliwa ta a sikato ya ’man so nanyurong ya akipabpayabol?” tepet da. “Sikato ya’man,” inyebat na arum. Balet arum so agmakapanisia ed satan: “Andi ingen kapadpara to.” Ingen et kuan na laki: “Siak iman.”

“Panon sirin so inkalukasan na saray matam?” labay ya amtaen na totoo.

“Say too a manngaran na Jesus nangawa na pitek, tan kinapolan to so saray matak tan inkuan to ed siak, Onla ka ed Siloe, tan mandilamos ka: kanian linma ak tan nandilamos ak, et inawat ko so pakanengneng.”

“[Iner] so kawalaan to?” tepet da.

“Ag ko amta,” ebat to.

Intagar natan na totoo imay datin bulag a laki ed saray relihyoson pangulo ra, saray Pariseo. Saraya met so nantepet ed sikato no panon a sikato so akanengneng. “Sikato’y angyan na pitek ed saray matak; tan nandilamos ak, et akanengneng ak la,” impaliwawa na laki.

Maseguro, saray Pariseo komon so nepeg a miliket ed samay apaabig a mipapayabol! Balet imbes, pinabaingan day Jesus. “Saya’n too ag nanlapu ed Dios,” ibaga ra. Akin ya ibaga ra itan? “Lapu ed ag to ngilinan so sabaton.” Tan ingen et arum a Pariseos so manisip: “Panon so pakayari sakey a too’n managkasalanan a mangawa na onia’ra a tanda?” Kanian wala so inka-apag-apag ed sikara.

Kanian, tinepetan da so laki: “Anto so kuan mo nipaakar ed sikato, dia ed inpangilukas to ed saray matam?”

“Sikato so sakey a profeta,” ebat to.

Agpanisiaan na Pariseos iya. Sikara so kumbinsido a wala so sekreton paknaan ed baetan nen Jesus tan sayan laki pian palikdoen so totoo. Sirin pian aregloen so pamaakaran, impatawag da so atateng na samay mipapayabol pian sikaray tepetan. Juan 8:59; 9:1-18.

▪ Anto so sengegan na inkabulag na laki, tan anto so agsengegan?

▪ Anto imay labin anggapoy toon makapankimey?

▪ Sanen apaabig imay laki, anto so kiwas na saraman so makaamta ed sikato?

▪ Panon a saray Pariseo so naapag-apag nipaakar ed inyabig na laki?