Say Sankabalgan a Toon Nambilay ed Kapiganman

Kapitulo 27

Say Inkatawag nen Mateo

Ag-abayag kayari impamaabig ed paralitiko, si Jesus so pinmaway manlapud Capernaum ya amaarap ed Dayat na Galilea. Inmasingger lamet iray karaklan ed sikato, tan ginapoan ton bangatan ira. Legan na panaakar to, anengneng to si Mateo, a tatawagen met a Levi, a manyudyurong ed panagsingilan na buwis. “Magmaliw kan patumbok ko, NW” so imbitasyon nen Jesus.

Nayarin kabisado la nen Mateo iray bangat nen Jesus, a singa met di Pedro, Andres, Santiago, tan si Juan sanen sikaray tinawag. Tan singa sikara, tampol a kinmiwas si Mateo ed imbitasyon. Sikatoy inmalagey, tinaynan toray responsibilidad to bilang managsingil na buwis, tan tinmumbok ed si Jesus.

Saginonor, angangko ta selebraan to so inkatawag to, nanggawa si Mateo na baleg a piesta ed abung to. Nilikud ed si Jesus tan saray babangatan To, saray datin kalimog nen Mateo so wadman. Sarayan lalaki so diad inkalapagan et momodmoraen na saray kapara ran Judio lapud manisingil ira na buwis para’d saray kabusol dan Romanon manuley. Niarum ni, mabetbet ya alabas so singil da ed saray totoo ed nepeg dan bayaran a buwis.

Diad impakaimano ed si Jesus ed piesta a kaiba so ontan a totoo, tinepetan na saray Pariseo iray babangatan to: “Akin et mirongon mangan so Managbangat yo’d saray sumisingil na buwis tan saray managkasalanan?” Diad impakadngel ed tepet, inebatan nen Jesus iramay Pariseo: “Saray maksil agda nakaokola’y mananambal, no ag saray agmakayari. Onla kayo ingen tan aralen yo no anto’y kabaliksan to nia, Say panangasi so pirawat ko, ya aliwa’n say bagat: ta agak dia linma’n manawag ed saray matonong, no ag saray managkasalanan.”

Mapatnag, inimbitaan nen Mateo irayan managsingil na buwis ed abung to pian sikara so ondengel ed si Jesus tan napaabig ed espiritual. Kanian akilimog si Jesus ed sikara pian tulongan ira a makagamor na mabunigas a siglaotan ed Dios. Agmomodmoraen nen Jesus iray ontan, a singa gagawaen na saray dilin-matunong a Pariseo. Imbes, lapud panangabagey to’d sikara, sikatoy kinmanan espiritual a managtambal ed sikara.

Kanian say impangagamil nen Jesus na panangasi ed saray managkasalanan so aliwan panangabobon na saray kasalanan da noagta balikas na mipadparan matamoy iran liknaan ya impanengneng to ed saray walaan na pisikal a beblay. Alimbawa, nonoten sanen siaabagey a sininggeran tan diniwit to so akating a kuanto: “Labay ko. Magmaliw kan malinis, NW.” Komon ta ipanengneng tayo met so panangasi diad panulong ed totoon mankaukolan, a nagkalautlan tulongan ira ed espiritual a paraan. Mateo 8:3; 9:9-13; Marcos 2:13-17; Lucas 5:27-32.

▪ Iner so kawalaan nen Mateo sanen sikatoy anengneng nen Jesus?

▪ Anto so anapan nen Mateo, tan akin a saray ontan a totoo so momodmoraen na arum a Judio?

▪ Anto so reklamo sumpad si Jesus, tan panon so impangebat to?

▪ Akin ya akilimog si Jesus ed saray managkasalanan?