Saray Pinabli Yon Andi-la’d-bilay​—Iner so Kulaan Da?

SI Alec so naaburidon tuloy. Diad loob na sakey simba, inatey so duara ed saray kaaro to. Sakey ed sikara, si Nevil, so inatey ed impakapaltog. Say sananey, si Tony, so inatey ed impaka-aksidenti ed luganan. Saray tepet a datin agmangogonigon ed sikato et mangogonigon natan ed mantaon na 14 a lakin taga Abalaten Aprika. ‘Akin a kaukolan ya ompatey so totoo? Tan anto so nagawa kayari na ipatey?’ panumamengan to.

Diad inyakar to ed tolor nen Nevil, mailalon tuloy si Alec a makaromog na saray ebat ed sarayan tepet. “Balet,” natandaan to ni, “binasa lambengat na pari so sakey a libro insan inkuanto a si Nevil so linma la’d tawen. Insan, diad ponponan, inkuanto ya alagaren tayo so kikioli. Siak so awetwet. No si Nevil so walad tawen, panon ton alagaren so kikioli?”

Diad saginonor na saman ya agew, inatendian nen Alec so tolor nen Tony. Say ritualistikon serbisyo so ginawa ed sakey a lenguahen agto natalosan. Ingen, say maneyag a kiwas na arum a manag-agogol so angumbinsi ed si Alec ya anggapo so ligliwan niiter. “Diad saman a labi,” impaliwawa to, “siak so maermen a tuloy. Siak so makap-kapoy tan nawewetwet. Anggapo so makapangiter na makapenek iran ebat ed saray tepet ko. Diad sankaunaan a pankanawnawa ed bilay ko, siak so talagan nanumameng no kasin wala so Dios.”

Kada taon et minilyon, singa si Alec, so naaandian na saray pinabli diad ipapatey. “Diad sankamundoan,” ipapaliwawa na 1992 Britannica Book of the Year, “50,418,000 so inatey nen 1991.” Tan pigara nin milyon so inatey nanlapulad saman? Isipen pa so dakel a luan inmagos ed saray inateyan! Kaaruman ed kaermenan da et say pakawewetwet lapud mansusumlangan iran panmoria nipaakar ed ipapatey.

Sirin dakel, a singa si Alec, so nadidismaya tan manduaruwa no kasin wala so antokaman a letnegan para’d ilalo ed sakey ya arapen a bilay kayari na ipapatey. Unong ed Encyclopedia of Religions, “diad amin a panaon, saray manonot a totoo so agmibibiang ed saray sisisiaen na karaklan, balet sikaray manduaruwa nipaakar ed no panon a say indibidual a kamarerwa odino bilay so niwala ya onsian manlapud indibidual ya utek tan laman.”

Makapainteres, aksobien na asalambit ya ensayklopedia a say relihyoson teoryan ag-ompatey a kamarerwa a niwalan onsian manlapud laman so agsusuportaan na Biblia. Tua, diad pigaran parti, say Biblia so manutukoy ed “kamarerwa” na too ya ontaynan tan anggan ompawil ni ingen ed sakey a bangkay, balet diad sarayan kipapasen say “kamarerwa” so inusar bilang “bilay,” a naandi odino nipawil. (Genesis 35:16-19; 1 Arari 17:17-23) Lalon mabetbet, say salitan “kamarerwa” so uusaren ed Biblia diad paniskribe ed nanengneng iran pinalsa a silalaman tan walaan na dala, on, saray mabilay a pinalsa. (Genesis 1:20; 2:7) Kanian, paulit-ulit a sasalambiten na Biblia a say kamarerwa so ompatey. (Ezequiel 18:4, 20; Gawa 3:23; Apocalipsis 16:3) Ibabaga na Salita na Dios a bektaman ya ompatey so kamarerwa et “agda amta so bengatla.”​—Eclesiastes 9:5, 10.

Diad biek a dapag, walaray salaysay na Biblia nipaakar ed totoon pinaoli ed bilay. Diad kipapasen nen Lazaro, saya so agawa kayari na impatey to ed loob na apatiran agew. (Juan 11:39, 43, 44) Anto, sirin so nagawa ed totoon inaatey la, nilasus odino nilibon taon lay apalabas? Kasin say ilalo ra ed arapen a bilay so mankaukolan a say Dios so mamaoli ed parehon-laman da sanen sikaray inatey?

Andi. Say ontan a kanonotan so agmitukoyan ed nagagawa ed saray atomo a manibukel ed inatey a laman. Nasabi panaon, arum ed sarayan parehon atomo so sepsepen na saray tanaman a kanen met na arum a pinalsa tan magmaliw a kabiangan na saray laman da.

Kasin kabaliksan na saya ya anggapo so ilalo para’d totoon abayag lan inatey? Andi. Say Manamalsa na maawang a talba tayo so walaan na makapakelaw, aglimitadon memorya. Diad sasakupen na nagnap a memorya to, sikato so walaan na kapasidad a tandaan so personalidad tan genetic iran walna na siopaman ya inatey a too a labay ton nodnonoten. Nagkalalo ni, si Jehova a Dios so walaan na pakapanyarin mamalsa lamet ed atooan a laman tekep na eksakton genetic code na sakey a toon nanbilay la ed inmuna. Sikato met so makapangipasen ed satan na memorya tan personalidad na sakey a walad pakanodnonotan to, a singa si Abraham.

Ngalngali duan libon taon kayari na impatey nen Abraham, inter nen Jesu-Kristo iyan panamaseguro: “Balet satan so kioli ed bilay na saray inaatey, angan si Moises impatnag to, dia ed pasen nipaakar ed Zarza, nen tinawag to so Katawan [Jehova, NW] a Dios nen Abraham, tan Dios nen Isaac, tan Dios nen Jacob. Ta sikato [so] aliwan Dios na saray inatey, no ag ingen saray mabilay, ta manbilay so amin nipaakar ed sikato.” (Lucas 20:37, 38) Likud ed si Abraham, Isaac, tan Jacob, minilyon nin arum a totoon inaatey so mabilay ed memorya na Dios, a manaalagar ed say onsasabin kioli. Pepekderan na Biblia a “wala naani kioli ed bilay na saray matunong tan ag matunong.”​—Gawa 24:15.

Pigaran simba kayari na impanermen to, aromog nen Alec iray ebat ed saray tepet to. Sakey ed saray Tasi nen Jehova so dinmalaw ed ayaman to tan impanengneng ed sikato so ibabaga na Salita na Dios nipaakar ed patey tan ed kikioli. Saya so nanligliwa ed si Alec tan angitarok na balon kabaliksan ed bilay to.

Kasin kaliktan yo met so makaaral na nagkalalo nipaakar ed nibased-Biblian ilalo ed kikioli? Alimbawa, kasin kaslakan a kikioli so nagawa ed tawen odino diad dalin? Tan anto so nepeg a gawaen na sakey a too pian nagamoran so abobon na Dios tan naeksperiensia so kasumpalan na makapakelaw a sipan To a saray totoo so nayarin makapankakasakey lamet a kaiba iray andi-la’d-bilay?