Say Sankabalgan a Toon Nambilay ed Kapiganman

Kapitulo 11

Inprepara nen Juan so Dalan

Labin-piton taon so linmabas sanen si Jesus so mantaon na 12 ya ontetepet ed saray managbangat ed templo. Saman so premabera ed taon na 29 K.P., tan mapatnag a balang sakey so manutukoy nipaakar ed kapinsan nen Jesus a si Juan, a manpupulong ed interon bansa ed liber na Ilog Jordan.

Peteg a si Juan so makapadinayew a too, namparan diad itsura tan pananalita. Say kawes to so ginawa’d bago na kamelyo, tan sikato so akabalkes na katat ed balangbang to. Say tagano to et saray duron tan dilo. Tan say mensahe to? “Manbabawi, ta say panarian na katawenan so inmasingger la.”

Sayan mensahe so manasagyat ed saray dumerengel to. Dakel so akamorian kaukolan da so manbabawi, salanti, pian pasimbaloen so awawey da tan ipulisay so datin agkaliktan a kurang na kabibilay da. Kanian manlapud amin a teritorya ed liber na Jordan, tan angga’d Jerusalem ni ingen, dakel a bilang na totoo so inmasingger ed sikato, tan sikaray binautismoan to, ya impapalgep to’ra ed saray danum na Jordan. Akin?

Binautismoan nen Juan iray totoo bilang simbolo, odino panangipatnag, ed impapuson panagbabawi da para’d saray kasalanan sumpad Ganggan na Dios a sipanan. Kanian, sanen pigaran Pariseo tan Saduseo so linma ed Jordan, sikaray kinondena nen Juan. “Sikayon kapulian na saray uleg,” kuanto. “Mamapaway kayo sirin na bungabunga a manepeg ed panagbabawi; tan agyo gapoan ya ikuan ed inkasikayo’n dili, ‘Wala si Abraham a pinagkaama mi.’ Ta ikuan ko ed sikayo a nayarian na Dios so mamaalagey na saray anak ed kinen Abraham anggan dia ed sarayan bato. Say wasay so niyan la ed lamut na saray kiew; amin a kiew sirin ya agmangiter na maong a bunga so nabatang tan ibantak ed apoy.”

Lapud inkabantog nen Juan, angibaki iray Judio na saray saserdote tan Levitas ed sikato. Saraya so tinmepet: “Siopa ka?”

“Aliwan siak so Kristo,” so impatua nen Juan.

“Anto, sirin?” inupapet da. “Kasin sika si Elias?”

“Andi,” ebat to.

“Kasin sika so Say Propeta?”

“Andi!”

Kanian nagmaliw iran mapilit: “Siopa ka? pian makapangiter kami na ebat ed saramay angibaki ed sikami. Anto so ibabagam nipaakar ed inkasika?”

Impaliwawa nen Juan: “Siak so sakey a boses ya onkekelyaw ed kalawakan, ‘Gawa yo a maptek so dalan nen Jehova,’ a singa imbaga nen propetan Isaias.”

“Akin, sirin, a sika so manbabautismo,” labay dan naamtaan, “no sikan dili so aliwan samay Kristo odino si Elias odino Say Propeta?”

“Babautismoan takayo ed danum,” ebat to. “Diad utel yo et sakey a manal-alagey ya agyo kabat, samay sakey a manuptumbok ed siak.”

Ipreprepara nen Juan so dalan diad panamegley na panggagawa ed katooan a dugay kipapasen na puso ra ya awaten so Mesias, a magmaliw ya Ari. Diad sayan Sakey et onia so inkuan nen Juan: “Samay sakey a manuntumbok ed siak so lalo a mabiskeg nen siak, ya agak manepeg a mangokbar na lubir na sandalyas to.” Diad tua, imbaga nen Juan ni: “Samay sakey a manuntumbok ed siak so akauna la ed arapan ko, lapud sikatoy niwala la sakbay ko.”

Sirin, say mensahe nen Juan, “say panarian na katawenan so inmasingger la,” so onkakana bilang sakey a mapublikon pasakbay a say ministeryo na tinuro nen Jehova ya Ari, si Jesu-Kristo, so ngalngali lan onggapo. Juan 1:6-8, 15-28; Mateo 3:1-12; Lucas 3:1-18; Gawa 19:4.

▪ Anton klasen too si Juan?

▪ Akin a babautismoan nen Juan iray totoo?

▪ Akin a nibaga nen Juan ya inmasingger la so Panarian?