Maong a Balita Manlapud Malawi!
NEN Nobyembre 15, 1993, say Watch Tower Bible and Tract Society of Pennsylvania so opisyal a niparehistro ed abalaten-sagur na bansan Malawi ed Aprika. Saya so mangiter ed saray Tasi nen Jehova na legal a pakabidbiran tan kawayangan a mangipulong ed saray katuaan na Biblia ed saray totoo ed Malawi.
Nen 1948, sakey a sangan opisina na Watch Tower Society so inletneg ed Malawi pian mangasikaso ed kimey na Tastasi nen Jehova ed saman a dalin. Nen Enero 8, 1957, say Watch Tower Society so inrehistro diman ed sankaunaan a pankanawnawa. Diad loob na pigaran taon nangayagaan na saray Tasi nen Jehova so maples ya indaak. Balet linmesa so maruksan panamasegsegang nen 1964. Akin?
Lapud katutulok ed Dios, impansiasia na saray Tasi nen Jehova so istrikton neutralidad ed pulitika. (Juan 17:16) Malinew ya agsigpot atalosan na arum so Makasulatan a talindeg da tan lingon inrepresenta ra iray Tasi bilang sakey a radikal a relihyon tan bilang sumpa ed ganggan. Diad ontan, liknaen na arum a makatunongan so pamasegsegang ed sarayan Kristiano a maaro’d-kareenan. Dakel a Tastasi so inekal ed trabaho ra, pinekpek tan pinabanday. Say arum so pinilit ya inyarawi ed ananak da.
Nen 1972 masulok a 30,000 Tasi tan pigaran iyaaralan ed Biblia so kaukolan ya ontaynan ed bansa ra lapud takot ompan nabalang daray bilay da. Nilibo so nanayam ed kampo na saray takas ed asingger a Mozambique. Balet nen 1975, sarayan takas so pinapawil ed Malawi, a ditan et sikaray lalon pinasegsegang. Diad utel na sayan gulo, say Watch Tower Society so inekal ya opisyal ed listaan na legal iran organisasyon ed Malawi. Nanlapulad saman saray Tasi nen Jehova tan say legal iran organisasyon da so nisebel ed saman a bansa.
Anggaman ed amin na sarayan agawa, agbinmales iray Tasi. Ag-iran balot amorma na saray ulop odino nanggulo bilang panprotesta ed gobierno. Imbes, sikaray sipipikasin amasiansia ed Kristianon obligasyon da ya ipanengneng so galang tan respero para’d “atagtagey a pakauley” na gobierno. (Roma 13:1-7; 1 Timoteo 2:1, 2) Intandoro met na Tastasi iray atagey ya estandarte na Kristianon kabibilay a nidatak ed Biblia tan sirin angipanengneng na ekselentin alimbawa ed kondukta.
Walaan na kapkapangamor a kawayangan, saray Tasi nen Jehova natan ed Malawi so determinadon mangituloy ed maganat a panangipulong na saray katuaan na Biblia, “no panaon to.”—2 Timoteo 4:2.
[Litrato ed pahina 31]
Si M.G. Henschel a kaiba to so pamilya na Bethel ed Malawi ed taon na saray 1960