Nambabansag ed Loob na Samploran Taon!
SANEN tinepetan no anto so liknaan to ed apalabas a samploy taon sanen say edisyon a Kastila na Say Panag-Bantayan so ginmapon nipalapag a kabansag na edisyon ya Ingles, sakey a pinablin agin bii a Kastila so inmebat: ‘Liknaen min saya so bendisyon lapud natan et pareho tayo la, panon mon ibalikas ed Ingles, mibansag ed Ingles. Sano kuan kon Ingles, naynay a nonoten ko so organisasyon. Tutukoyen mi so organisasyon bilang “Ina.” Liknaen min sikami so maapit, maapit a tuloy. Saya so maabig. Saya so makapakelkelaw!’
Sayan matoor ya agin bii so angibalikas ed liknaan na dakel ya agmanbabasay Ingles. Diad apalabas iran taon, walaray artikulon nipalapag ed edisyon na Kastila a Say Panag-Bantayan ed loob na ngalngali anem bulan kayarin nipalapag ira ed Ingles. Say arum a lenguahe so akaeksperiensia na mipadparan inkaabala. Natalosan, a walay panpilalek a tuloy ed pangipalapag na miparan materyal ed parehon panaon, ed dakel a lenguahe.
Kanian nanlapulad paway na Abril 1, 1984, say edisyon a Kastila so sankaunaan a nagmaliw a kabansag na edisyon ya Ingles. Ag-abayag et tinmumbok so arum a lenguahe. Diad kagapo na 1985, saray edisyon ed 23 a lenguahe so nambabansag. Legan ya aanapen tan ipapasal iray manangipatalos, saray edisyon ed dakel nin lenguahe so akapibansag ed Ingles.
Sayan paway na Say Panag-Bantayan so mananda ed komasamplon taon na nambabansag a panangipalapag. Say Panag-Bantayan so nipapalapag la natan ed 116 a lenguahe, 85 ed saraya so manbabansag. Kabaliksan na saya a 99.3 a porsiento na dagup a promedyo na produksion na 16,100,000 a kopya na Say Panag-Bantayan so apawala ed mankakaparehon disenyo na apis tan saray artikulo. Diad saray onaatendi ed sinimban Panagaral na Panag-Bantayan, masulok a 95 a porsiento so manaaral ed parehon materyal ed parehon panaon.
Say Awake! a kaiban magasin na Say Panag-Bantayan, so manbabansag a nipapalag ed 37 na 74 a lenguahe na saya. Say tinaon a Yearbook of Jehovah’s Witnesses so nipapalapag ed 18 a lenguahe. Saratan a manbabansag a panangipalapag so onkakanan manamakasakey ed totoo na Dios ed “saksakey a nonot tan saksakey ya isip.”—1 Corinto 1:10.