Say Inkapekder so Mangitatarok na Mayaman a Tumang
IMPASAKBAY nen Jesus a saray patumbok to so napasegsegang, tan ontan met so imbaga nen apostol Pablo, unong a nisulat ed 2 Timoteo 3:12: “On, et amin so saray malabay a manbilay ed sinasanto ed Cristo Jesus, manako’ra naani pamasegsegang.” Balet say inkapekder ed panaglingkor ed si Jehova a Dios so mangitarok na mayaman a tumang.
Saya so tua ed sakey a baley ed bandad amianen-bukig na kadayatan na Malaysia. Anggaman sikatoy sakey a saradon Budista a mapeget a babanoen iray ilalak to, agnaamper na sakey ya ama so taloran ilalak ton bibii tan taloran lalaki ed panaral na Biblia a kaibay Tastasi nen Jehova. Anggan say asawa ton bii so angipanengneng na interes ed katuaan. Sakey ya agew et nilurey na kaabay to a nankuan: “Agmo nakontrol iray ilalak mo ed pagmaliw dan Tastasi nen Jehova? Amin ya ilalak ko so mansiasiansia ed siak tan ed abangonan tayon relihyon a Budista. Abagey ka la!”
Tamtampol ya anempet so ama tan pinagyaw ton sakitan so agin biin mangikokonduktay panangiyaral ed saray ilalak to. Balet ta, pinakalma na saray ilalak to tan nantultuloy ed panagaral na Biblia ed Tastasi nen Jehova tan iyaatendi ed saray miting diad tulong na ina ra.
Kaunoran, say ama so angiter na ultimatum. “Manpili kayo,” so kerew na ama, “diad siak tan mansiansian manayam ed abung odino magmaliw a Kristianos tan ontaynan ed abung.” Say sankapanguloanan ya anak a laki, a mapalnay a manalita, so tampol a mamabalkot pian ontaynan. “Aleg!” so inkelyaw na ama. “Lapud rebelyoso kayon amin, magmaong la no ompatey’ak.” Kayari to et nanapuran pinmaway ed abung, tinumbok na pamilya, a mikakasi’d sikaton agmanbibitkel. Asagyat ed kerew da, sikatoy amawil ed abung.
Linmabas so panaon. Naiimano na ama so maabig ya epekto na katuaay Biblia ed walna na ilalak to. Aminsan ya agew et nabet toy nanludlurey a kaaro, a maer-ermen, a kuanto: “Adismaya ak a tuloy ed saray ilalak ko. Sasaolen tan tatakewan da ak.” Balet kuan na ama na ananak ya iyaaralay Tastasi nen Jehova: “Oh, duma iray ilalak ko! Maong ira’d siak tan tutulongan da ak ni ingen a manbayar ed kotsen pepelagan ko legan ya anggapoy trabahok.”
Natan, say taloran anak a bibii tan say ina so bautismado la. Say sakey ya anak a laki so special pioneer. Tan komustay datin mapeget tan masanok ya ama? Sikato la natan so makaaro ed Tastasi tan akaatendi la’d Memoryal.
Tinumangan nen Jehova so anak a laki tan taloran agagi ton bibii pati say ina ra lapud inkapekder da ed dapag To. Sikara natan so maseseg a managpulong na Panarian, a mamapaliket ed puso nen Jehova.—Uliran 27:11.