Saray Maseseg a Kristiano ed Britanya

Kulang-kulang a 10 porsiento na 56 laksan totoo ed Britanya so diad kaplesan et maseseg a Kristianos, unong ed The Economist. Gendagendat diad agew na Simba, kulang ya apatiran laksan totoo so onaatendi ed saray serbisyo ed simbaan. Diad saraya et 1.1 a laksa lambengat so Anglikano. Ingen, anggaman kasmak so agnostisismo, say Iglesia na Inglatera so mantutultuloy ed niletneg a betang to bilang relihyon na Estado. “Say Britanya so aliwan sipor a Kristianon sosyedad ed loob na saray taon balet ta agto aksobien so agnostisismo, manuna lapud maliket iran agawa ed apalabas,” kuan na parehon managbalitan magasin. Agpankelawan a tatawagen na saray modernon pulitiko tan peryodiko so inkagba na Iglesia, ya inkabuyak na Iglesia-Estado a siglaotan.

“Say mundon peteg a sekular, a mankuan a Kristiano, so sankaugsan ed amin a mundo,” so inkuan nen Walter Bagehot, say koma-19-siglon editor na The Economist. Balet nen inmunan siglo K.P., inkuan nen Jesu-Kristo a saray babangatan to et ‘ag ira taga mundo, salanti onong ya [sikato so] ag taga mundo.’ (Juan 17:16) Anggaman ontan, sikara so imbaki to ed mundo a mangipulong ed Panaria’y Dios. Ontan met natan, saray Tasi nen Jehova ed sankamundoan so kabkabat lapud maseseg a panagpulong da diad “lapag, tan dia ed saray kaabungan.”​—Gawa 20:20.

No ipareng ed saray Anglikano, saray 126,173 a Tastasi ed Britanya so daiset ed bilang. Ingen uusaren da so ngalngalin 20 oras ed sakey bulan diad iyaatendi ed saray Kristianon miting. Sakey ni, legan na 1992 et kada Tasi so angusar na promedyon 16 a kaaruman iran oras ed sakey bulan diad pangiyaabawag ed arum na maong a balita na Panaria’y Dios, say gobiernon asingger lan mangiletneg na matunong a balon mundo. (Mateo 24:14; 2 Pedro 3:13) Diad ontumbok ya idalaw na saray Tasi nen Jehova ed ayaman yo, kasin talinengen yo so mabitar a mensahe ra tan anapen no anto so mamabayubo ed seseg da?