Kasin Asalim La So Angigapo na Apuy ed Takel?
SIEMPRE ANDI, nayarin ikuan mo. Balet alagar ka pa! Nayari angangko. Talinengen mo paray salita nen babangatan a Santiago: “[Say] dila melamelag a kabiangan na laman, et manpasirayew ed ankakabaleg a nengneng. Nia, alay kabaleg na takel so dangatan na melag ya apuy!”—Santiago 3:5.
Say dila so kaukolan ya organo ed panagsalita, balet panon ya aliwa so inkausar to! Uusaren na totoo so dila pian mantila tan manpauges. Tekep na satan et sipapasang dan balawen iray arum, deralen so reputasyon da, tan mamalikdo ed sikara. Saray masilib et usaren da so dila a mangiyalibansa na rebolusyon. Inusar nen Adolf Hitler so dila to pian dagdagen so nasyon a mibakal—talagan ‘apuy ed takel!’
Anggan saramay walaan na maong a motibo so panlapuan na saray ‘apuy ed takel.’ Kasin akapansalita ka na sakey a bengatla tan insan nanonotan mon agmo komon imbaga iman? No ontan, natatalosan mo no antoy labay ya ibaga nen Santiago sanen inkuanto: “Bangbalet say dila ag nayarian na dinan man a too a paamoen.”—Santiago 3:8.
Anggaman kuan, nayari tayon salien ya usaren so dila tayo ed pankaabigan. Singa say salmista, disididon nibaga tayo: “Manlikas ak ed saray dalan ko, pian agak mankasalanan ed dilak.” (Salmo 39:1) Imbes a sipapasang a balawen so totoo, nayari tayon salien a pabiskegen ira. Imbes a manpauges, nayari tayon mansalita na maabig nipaakar ed totoo. Imbes a palikdoen, nayari tayon mansalita na katuaan tan mamilin. Sano napakiwas na maong a puso, say dila so makapansalita na makapakelkelaw iran salitan makatambal. Inusar nen Jesus so dila to diad makapakelaw a paraan pian bangatan so katooan nipaakar ed kilalaban.
Tua, “say patey tan say bilay wala ra ed pakayari na dila.” (Uliran 18:21) Kasin say dilam so makapatey odino manangiter-bilay? Kasin satan so mangigagapo na ‘apuy ed takel’ odino mansebseb? Impikasi na salmista ed Dios: “Say dilak icanta to so salitam; ta amin na saray gangan mo sikato so inkatunong.” (Salmo 119:172) No bayuboan mo so awawey na salmista, sikatayo met so mangusar ed dila tayo para’d pankaabigan.
[Picture Credit Line ed pahina 32]
U.S. Forest Service Photo