Say Danum na Bilay

“SAY makadngel, kuan to komon: Gala. Tan say napgaan, ondago: et say malabay, mangala ed danum na bilay ya andi bayar.” (Apocalipsis 22:17) “Danum na bilay”​—kabaliksan na satan so amin a probisyon na Dios para’d kilalaban tayo a nibase’d dondon bagat nen Jesu-Kristo. Sarayan probisyon so naala tan anggapoy-bayar. Agaylan makapakelkelaw ya inkamabunlok ed biang na Dios tayo! Anggaman ontan, akin a saraya so isisimbolo na danum?

Bueno, lapud literal a danum et ontubo so tanaman ed dalin, tan gagawaen ton posibli so bilay na too. No anggapoy danum, say bilay na tanaman, tan anggan say bilay na too, so agniwala. Niarum ni, say laman mo so 65 porsienton danum. Saray arum ya espesyalista ed bunigas so mangirerekomenda a pansiansiaen itan a ratio diad iyinum na 2.4 a litro na danum ya inagew-agew. Amin ya akindalem iran andar na bilay mo​—manlapud panaggiling na tagano anggad panangipaway na dutak et mankakaukolan na danum. No sakey simban agka oninum, ompatey ka.

ntan met, lapud “danum na bilay” et posibli tan makapantultuloy so espiritual a bilay. No ipulisay tayo so danum na bilay, andian itayo na magnayon ya arapen. (Juan 3:36) No awaten tayo itan, nagamoran tayo so andi-anggaan a bilay. Agpankelawan a say Samaritanan bii so kinmiwas tekep na interes sanen inkuan nen Jesus ed sikato: “Balet siopaman ya oninum ed danum ya iter ko ed sikato ag naapgaan angan kapigan; ingen say danum ya iter ko ed sikato magmaliw ed sikato a sakey a bobon na danum ya mansosbol anga ed maando’n bilay.” (Juan 4:14) Dampoten tayo komon tekep na inkaligsa tan alaen so anggapoy bayar a danum na bilay.

[Picture Credit Line ed pahina 32]

Garo Nalbandian