Tepetepet Manlapud Saray Managbasa

Kasin si Juan a nanbautismo ed si Jesus so nepeg a tawagen a “si Juan a Bautista” odino “si Juan a Managbautismo”?

Saratan a duan itatawag so duga tan sinuportaan na Biblia.

Si Juan so ‘angitadia para’d Katawan [Jehova, NW] na sakey a baley a maralato,’ a ginawa to’d panamegley na ‘pangipolpulong na binyag nipaakar ed pamaandi ed saray kasalanan.’ (Lucas 1:17; 3:3) Si apostol Mateo so nansulat: “Sinmabi si Juan a Bautista, ya manpopulong ed lawak na Judea, ya ikukuan to, Manpataoli kayo; ta say panarian na tawen asinger la. . . . Saman pinmaway ed sikato so Jerusalem, tan amin a Judea, . . . Et inpabinyagan ira ed sikato dia ed ilog Jordan, ya inpapatua ra so saray kasalanan da.”​—Mateo 3:1-6.

Imanoen a sikatoy inkabkabat nen Mateo bilang si Juan a “Bautista.” Si Mateo, a mabitar ya angitukoy ed salaysay na saray Judio, so mapekder a walaan na pananisian kabkabat na saray Judio no siopa so “Bautista.” Inusar to so “Bautista” bilang sakey a klase na apelyido. Inusar nen Jesus tan saray babangatan to so balikas a “si Juan a Bautista,” a singa met ed impangusar na saray aripen nen Herodes.a​—Mateo 11:11, 12; 14:2; 16:14.

Say babangatan a si Marcos so mangirereport na mipadparan impangusar ed “Bautista.” (Marcos 6:25; 8:28) Balet diad pangikakabat ed si Juan, sikatoy tinawag nen Marcos a “si Juan a managbautismo.” (Marcos 1:4, NW) Say Griegon inusar ed Marcos 1:4 so walaay samet a pidumaan ed arum iran bersikulo. Say Marcos 1:4 so nayari met ya ipatalos a “say sakey a manbabautismo.” Inpabitar nen Marcos so gagawaen nen Juan; sikato so samay manggagawa na panagbautismo, say managbautismo.

Anggaman ontan, ag-ompapatnag a kaukolan tayon nabidbiran iray pandumaan ed sarayan paraan na pananukoy ed si Juan. Diad Marcos 6:24, 25, nabasa tayo so nipaakar ed si Salome: “Et sikato’y pinmaway, tan inkuan to ed ina to, Antoy kerewen ko? Et sikato inkuan to, Say olo nen Juan a Bautista [Managbautismo, NW]. Et sikato’y linmoob a tampol a maganganat ed ari, tan kinerew to a kuan to, Labay ko ya iter mo’d siak natan so olo nen Juan a Bautista ed pananganan.” Say duaran itatawag so inusar a mansalatan.

Walaray pigaran totoo a nayarin talosan da so “Bautista” unong ed komaduan impanguker na sakey a diksyunaryo: “Sakey a membro odino mananumbok na sakey a denominasyon ebangheliko a Protestanti a walaay pankongregasyon ya organisasyon tan bautismo ed panamegley na panangipalgep na saray mananisia lambengat.” Maseguron aliwan ontan si Juan.

Kanian, parehon say “Juan Bautista” tan “Juan a Managbautismo” so duga tan matukoy.

[Paimano ed leksab]