Sikato so Akipuligesgesan Nisesengeg ed Pananisia To
TALORAN taon la’y apalabas si Caridad Bazán Listán a sakey ed saray Tasi nen Jehova ed Cádiz, Espanya, so sambotan a nankaukolan na operasyon. Saray bato ed apgo to so sengegan na ipepetang tan kasasamalan na dala to. Sanen sikatoy inawat ed lokal ya ospital, impaliwawa to so nibased-Biblian talindeg to diad agpangawat ed panangiyalis na dala. Saray doktor so akipaknan mangopera ya anggapo so dala. Anggaman kuan, sakbay a tuloy na inkiyakar to ed panag-operaan, papipirmaan na saray doktor ed sikato so sakey a dokumento. Inpanengneng na satan a mabulos dan respetoen so desisyon to nipaakar ed dala balet no onlesa so emerhensya, kaliktan da so abuloy ton mangusar na antokaman a tambal a nayarin nakakaukolan.
Sakey a matatken ed kongregasyon a wadman ed ospital tan say anak nen Caridad a laki, a sakey met a Tasi, so angipaliwawa ed si Caridad ed kabaliksan na panpirma ed satan a porma. Say pirma to so nayarin mangotorisa ed saray doktor a mangiyalis na dala bektaman a wala so emerhensya. Sanen sinmabi iray personahe na medikal a mangiyalis ed sikato diad panag-operaan, impaliwawa ton agto pirmaan so papeles. Kanian sikato so inpawil da a tampol ed kuarto to tan sigpot a dinesdes pian umanen to so kanonotan to.
Kayari pigaran tongtongan diniside ran tawagen so medikal ya ukom (forensic) pian mangumbinse ed sikato, balet ta anggapo so agawa. Impaliwawa nen Caridad a sikato so makapankasalanan ed Dios no abuloyan toran mangiyalis ed sikato na dala. Indanet to a diad silong na Mosaikon Ganggan, no say sakey a bii et pinasoot, sikato so nipasen ya andi-kasalanan no sikato so mipuligesgesan diad paneyag pian onkerew na tulong. (Deuteronomio 22:23-27) “Saray doktor so mangibabaliwala ed saray kerew ko tan sasalien dan sumlangen so konsiensiak,” kuanto, “kanian nepeg ko so mipuligesgesan a singa no sikara so mamapasoot ed siak.”
Pigaran oras so linmabas, tan diad kaunoran et inmabuloy iray doktor a mangopera ed sikato ya ag-usaren so dala. Diad panag-operaan, kinerew nen Caridad ya abuloyan dan manpikasi ed si Jehova. Sikato so nampikasi, tan say operasyon so nagmaliw a maaligwas.
Anggaman kuan, kayari to et linmoor so kipapasen nen Caridad, tan diniside na saray doktor ya ibaliwala iray kerew to tan ipapasoot da ed sikato so panangiyalis na dala. Kanian, sakey a doktor tan sakey a nars so namparaan a mangiyalis ed sikato na dala. Anggaman ed maletey a kipapasen to, si Caridad so akipuligesgesan ed amin a biskeg to. Kinetket to ingen so tubo ya aagosan na dala. Diad kaunoran, abaingan a tuloy so doktor ed gagawaen da a sikatoy tinmunda. “Agko nayarian ya. Agko la!” kuanto.
Aliktaran nen Caridad so problema tan inmabig ya andian na saray komplikasyon. Saray doktor tan nars so asagyat a tuloy ed pananisia tan inkakpel to. Amin na saya so agawa sanen si Caridad so mantaon na 94.