Kaunongan So Ibayar Yo Parad Saya?

WALA ta so amta yon ontanlan mabli a mabulos yon isakripisyo so amin a bengatlan kien yo ta pian satan so nakayarian yo? Ginawa tan sinalita itan nen Jesus ed saray patumbok to.

Inkuanto: “Say panarian na tawen miolibay ed sakey a too ya mantatagilako a manaanap na saray sankaabigan a perlas. Et sanen akalmo’y sakey a perlas a baleg so bili to, linma tan inlako to’n amin ya wala’d sikato, tan sinaliw to’man.”​—Mateo 13:45, 46.

Saman a managtagilako so mabulos ya angikaindan ed amin ta pian nakayarian so “perlas,” Panarian na Dios. Akin? Lapud anggapo so wadiad sayan mundon napangiparengan ed satan. Say Panarian na Dios so manresolbi ed saray probleman agnayarian a resolbien na too, a singa say bakal, eras, krimen, tan kairapan. (Salmo 72:4-8, 13, 14) Diad silong na Panarian et anggan say kasalanan, sakit, tan ipapatey so naandi. (Apocalipsis 21:4, 5) Agpankelawan a say komaduan kerew ed Pikakasi na Katawan (say “Ama Mi”) so, “Onsabi komon so panarian mo”!​—Mateo 6:9, 10.

Anto so iter yo ta pian minabang ed saray bendisyon na Panarian? Diad tua, saray bendisyon so libre. Balet ta pian napangayagaan ira, kaukolan ya amtaen yo no anto so Panarian, sisiaen a kapetegan itan, tan iyuna itan ed bilay yo. Kasin nagawaan yo itan? Wala so impormasyon ed Biblia ya ontulong ed sikayo. Akin ya ag-abuloyan iray Tasi nen Jehova a mangasisti ed sikayon manaral nipaakar ed Panarian na Dios tan anapen no panon to kayon nagunggunaan anggan natan.