Kasin Sayan Panangan so Walaay Kabaliksan ed Sikayo?
SAKEY a tulaw a managaag so manliliwawa ed dalin. Diad sakey a kuarto ed tagey na abung ed kadaanan a Jerusalem, 12 lalaki so nantitipon ed lamisaan. Say labinsakey so atentibon tuloy legan a say Managbangat da so mangipapaliwawa ed makabaliksan a tuloy a panagselebra tan sinalita toray balikas a walaay baleg a kabaliksan. Kuan na sakey ya awaran:
“Tan dia’d pangakan da, angala’y Jesus [Kristo] na tinapay, tan binendicionan to, tan sikato’y pinipisag to; tan inted to’d saray babangatan, inkuan to, Ala yo, kanen yo; saya sikato’y laman ko. Et angala na sakey a copa, tan angited na pisasalamat, tan inted to’d sikara, a kuan to, Oninum kayo ya amin ed saya; ta sikato ya’y dalak ed sipan, a sikato’y naibong nipaakad ed amayamay a pangekal ed saray kasalanan. Balet kuan ko’d sikayo, Siak agak la oninum a manlapu’d natan ed saya’n bunga na uvas, anga ed saman ya agew sano sikato so inumenko lamet a pati sikayo dima’d panarian nen Amak. Et sanen acanta ray sakey ya himno, linma ra’d palandey na saray Olivas.”—Mateo 26:26-30.
Saya so agawa kaselek na agew na koma-14 ya agew na Judion bulan a Nisan diad taon 33 ed Komon a Panaon tayo. Kapkapanselebra nen Jesus tan saray apostoles to ed Paskua na pakanodnonotan ed inkiliktar na Israel manlapu’d inpangaripen na Ehipto nen koma-16 a siglo K.K.P. Pinapaway nen Kristo si Judas Iscariote, a ngalngalilan mangitapat ed sikato. Kanian, si Jesus tan saray 11 a matoor ya apostoles to labat so presente.
Sayan pangdem so aliwan katuloyan na Judion Paskua. Sikato’y bengatlan balo tan natawag a Pangdem na Katawan. Nipaakar ed sayan panagselebra, ginanggan nen Jesus iray patumbok to: “Gawayo’ya a pakanodnonotan ed siak.” (Lucas 22:19, 20; 1 Corinto 11:24-26) Akin a saya so imbaga to? Tan panon a sayan abayaglan ebento so posiblin walaay kabaliksan ed sikayo?