Apanaloan To so Premyo

“OTANG kon amin ed sikayo,” isulat nen Kiyoe, sakey a senyor haiskul, ed sangan opisina na Watch Tower Society ed Hapon. Anto so ontanlan pisasalamatan to? Agano ni et apanaloan nen Kiyoe so sankatagyan a premyo ed sakey a nasyonal a kontis ed komposisyon (composition), ya inkurang na Japan Traffic Safety Association. Say mablin tumang et ilalaktip to so sakey a panbiahe ed Sweden.

Nansulat si Kiyoe pian ibalikas so apresasyon to nisesengeg ed dakel a maabig iran palapagan ya impalapag na Watch Tower Bible and Tract Society, a liknaen ton tinmulong na baleg ed intalona to. Nilikud ed sayan kontis, sikato so mangilalaman ed eskuelaan to ed dakel iran kontis ed panagsalita tan komposisyon. “Diad kaslakan ed sarayan kontis,” ikuanto, “sakey a tema so niiter, tan saray estudyante so mansukimat ed librarya parad saray komposisyon da. Anggaman ontan, agak nairapan. Aromog ko so makapakelaw a materyal ed aparador ed ayaman mi!” Ituloy to: “Antokaman so tema, balanglan saray problema ed itatatken, say kaliberliber, internasyonal iran siglaotan, odino dilin-iyaasenso, gendagendat a wala so aralem a diskusyon ed Watchtower odino Awake! iran magasin.”

Anggaman kuan, aliwa lambengat a saray palapagan so tinmulong ed si Kiyoe. Ikuanto a say edukasyon a naawat to diad panamegley na saray panangibangat a programa na Tastasi nen Jehova so tinmulong ed sikaton onaligwas ed panagbasa tan panagsulat to, tan saya so nanggawa ed sikaton manunaan ed saray kontis. “Dati et peteg a labay ko so mangala na edukasyon ed unibersidad,” admitien to. “Balet iner niy pakagamoran na onian panangipasal?” Natan et iilaloan to so mankimey a sigpot-panaon diad panulong ed arum pian nagunggunaan manlapud edukasyon ya inaawat to. Manwarin aliketan ed premyo na komposisyon, say puso nen Kiyoe so niletneg ed panalo ed premyon bilay.​—Ipareng so Filipos 3:14.