Say Panaon pian Anapen so Dios
SAY ilustrasyon ed sayan pahina et say Athenian Acropolis, a datin sentro na panagdayewan na dakel a dirios tan diosas. Diad leksab na Acropolis et say Aeropago, ya inkuan a pasen na korte na hustisya ed kadaanan a panaon. Diad sayan lugar, ngalngali 2,000 taotaon ed apalabas, a si apostol Pablo so tinmalindeg tan nampaliwawa na peteg a makatantandan diskurso. Say onggendan so kabiangan na inkuanto:
“[Say Dios] so nanggawa ed sakey a too ed amin a nasyon na totoo, pian manayam ed interon tapew na dalin, tan inggeter to so aturon panaon tan saray geter ed ayaman na totoo, pian sikara so mananap ed Dios, no komon ta sikara so mankarkarapas ed sikato tan peteg a naromog da, anggaman kuan, diad tua, sikato so aliwan arawi a manlapud sakey ed sikatayo. Ta diad panamegley to et walaan tayo na bilay tan onggalaw tan linmesa.”—Gawa 17:26-28.
Agaylan duma komon so awaran no say inkalapagan ed katooan so angimano ed saray salita nen Pablo! Agaylan karakel na bakabakal, agaylan laknab na irap, so naamper komon no binidbir na totoo so kaslakan ya interes da a bilang ilalak na sakey a toon pinalsa na Soberanon Katawan, si Jehova.
Natan, say katooan so binuyak na nasyonalismo, panangiduma ed talindeg, panbubusolan ed rasa, tan pandurumaan ed sosyal. Ingen, siansian onaplika iray salita nen Pablo. Amin tayo so ilalak na saman a lakin pinalsa na Dios. Amin tayo, diad atan a pantalos et sanaagin lalaki tan bibii. Tan siansian agni atrasado so pananap ed Dios legan a sikatoy naromog ni.
Nagkalalon seryoso iray salita nen Pablo sano kunsideraen tayoray unor a salita ed diskurso to. Inkuanto: “Inggeter [na Dios] so sakey ya agew ya ingagala ton pangukom ed panaayaman a dalin diad inkatunong diad panamegley na sakey a toon tinuro to, tan inter to so sakey a garantiya ed amin a totoo a sikato so pinaoli to manlapud inaatey.”
Say inkioli nen Jesus so sakey a maawaran a katuaan, tan unong ya ipanengneng nen Pablo, sakey itan a garantiya a wala so agew na panangukom parad katooan. Kapigan? Bueno, kabat tayo a ngalngali la 2,000 taotaon a mas sanen si Pablo so tinmalindeg ed Aeropago tan angibesngaw ed sarayan salita. On, say kasumpalan na propesiya ed Biblia so mangiparungtal ya atan et asingger lan tuloy. Agaylan seryoson kanonotan! Agaylan inkaganatan ya anapen tayo so Dios ed amin ya inkasimoon, ta, unong ya imbaga nen Pablo ed saray taga-Atenas, “natan et ibabaga to ed totoo a sikaran amin so nepeg a magbabawi ed anggan iner a pasen”!—Gawa 17:30, 31.