“Tastasi nen Jehova?”

SAY tepet ed tagey so pinmatnag a bilang paulo ed lenguahen Pinis na Bulletin of the University of Helsinki. Diad silong na paulo et wala so sakey a sulat ya insulat nen Propesor Jorma Palo, tan inkuan na saya ed kabiangan: “Ninengneng kon maalwar so tatak na unibersidad mi a niprinta ed apis na Bulletin. Diad pegley na bandad tagey a kapaldua, aromog ko so Hebreon teksto a say kabaliksan to so intepet ko ed sakey a Judion bisitak. Unong ed sayan eskolar, a makaamta na Hebreo, sayan salita et ‘Jehova’ ed lenguahen Pinis.”

Arum so asurpresa ed kiwawala na personal a ngaran na Dios ed tatak na sayan unibersidad ed Finland. Anggaman ontan, diad tua, say unibersidad so 350 taon la, tan sanen niletneg itan, say ngaran a Jehova so kabkabat tan inusar la ed interon Europa. Say ngaran so pinmarungtal ed agnabilang a publikon palpaalagey, saray sensilyo, tan saray tatak ya apetsaan nanlapud atan a peryodo.​—Nengnengen so brosyur a The Divine Name That Will Endure Forever.

Diad siglo tayo, say Kakristianoan so agla manguusar ed ngaran na Dios, tan say asasakbay ya interes ed saya so ngalngali lan nalingwanan. Sakey lambengat a grupo so manguusar ed madibinon ngaran ed panagdayew tan mangiyaabawag ed saya ed arum a pasen, a mitunosan ed ununan kerew ed Pikakasi na Katawan: “Ama min walad tawen, nagalang komon so ngaran mo.” (Mateo 6:9) Nisengeg ed saya, sanen say ngaran so abidbir ed tatak na unibersidad, tampol ya anonotan na totooy Tastasi nen Jehova.

[Picture Credit Line ed pahina 32]

Yliopisto