“Say Agew na Katawan”

“DIAD panamegley na puyan et siak so sinmabi ed agew na Katawan.” (Apocalipsis 1:10) Ontan so inkuan nen masiken lan apostol Juan ed ununan kapitulo na libro na Biblian Apocalipsis, a niretrato ed tagey. Saray balikas to so ontulong ed sikatayon makaromog ed panaon na kasumpalan na makapakelaw iran pasingawey ya intuloy ton deniskribe.

Anggaman kuan, aliwan amin et mipakna ed sayan impangipatalos ed Apocalipsis 1:10. Alimbawa, onia so patalos na Aleman a managpatalos na Biblia a si Jörg Zink: “Siak so napno na masanton espiritu​—satan so diad Simba.” Anggaman kuan, maslak iran bersyon na Biblia so angipatalos ed Griegon balikas a teiʹ ky·ri·a·keiʹ he·meʹraiʹ a bilang “say agew na Katawan.” Ingen ikuan na dakel a diad paimanod leksab satan so manutukoy ed Simba. Kasin saya so susto?

Sakey a Katolikon basiyan, say Aleman a Herders Bibelkommentar, so angipaliwawa na katunongan ed benegan na sayan kaisipan sanen inkuanto: “Agawa so impanukoy dia [ed Apocalipsis 1:10] aliwan ed Agew na Unor a Panangukom, a sikato so kabkabat bilang ‘Agew na Katawan’, noagta diad sakey ya espisipikon agew na simba. Diad asasakbay a kapegleyan na inmunan siglo ginmapon selebraan na inmunan Kristianos so ununan agew na simba bilang agew na saray manunan lingkor da ed simbaan. (Gawa 20:7; 1 Corinto 16:2)” Anggaman kuan, say duaran kasulatan ya insita na basiyan so agmamaneknek a satan ya agew so impasen na saray inmunan-siglon Kristianos bilang “agew na saray manunan lingkor da ed simbaan.”

Say ununan tekston, Gawa 20:17, so angikurit lambengat a si Pablo, saray kakaiba ton managbaroy, tan saray Kristianos ed Troas so nantitipon ed ununan agew na simba parad sakey a panangan. Inanamot nen Pablo so pankanawnawan mansalita ed sikara na andukey lapud sikato so ompikal la ed ontumbok ya agew tan agto lara napinengnengan lamet ed arum a panaon.

Say komaduan tekston, 1 Corinto 16:2, so amaseseg ed saray Kristianos ed Corinto a mangibiig na kuarta ed “kada ununan agew na simba” pian wala so bengatlan itulong ed saramay mankaukolan ed Judea. Isusuheri nen eskolar ya Adolf Deissmann a sayan agew so nayarin agew na sueldo. Diad antokaman a pamaakaran, say suhestion nen Pablo so praktikal, lapud nayarin onkesay so kuarta kaleganan na simba.

Inerman ed Biblia et anggapoy asalambit a saray Kristianos ed apostolikon panaon so angipasen ed ununan agew na simba, a natan et tatawagen na Simba (Sunday), bilang nengneng na Kristianon Sabaton, sakey a nikadkaduman imbiig ya agew parad maparanay a pantitipon da ed panagdayew. Kayari lambengat na impatey na saray apostoles a say Simba so impasen ed onian nengneng tan atawag a “say Agew na Katawan.” Saya so kabiangan na apostasya ya impasakbay a mismo nen Jesus tan saray apostoles to.​—Mateo 13:36-43; Gawa 20:29, 30; 1 Juan 2:18.

Sirin, anto so “agew na Katawan”? Satan so agew nen Jesus bilang say Katawan unong ya ituturo na konteksto na Apocalipsis. Ipabidbir na Salita na Dios iray balikas a singa “say agew na Katawan tayo a Jesu-Kristo” tekep na agew na panangukom ed katooan tan say kipawil na Paraiso.​—1 Corinto 1:8; 15:24-26; Filipos 1:6, 10; 2:16.

Kanian, diad patalos a walaan na komentaryo a, Das Neue Testament (The New Testament), si Hans Bruns so susto sanen inkuanto: “Bidbiren na arum a dia et sikato [Juan] so manutukoy ed Simba, ingen ompatnag a saya so nagkalautlan manutukoy ed bantog ya Agew na Katawan, a satan so ituturo na nantutumbokan a deskripsyon to.” Ikuan nen W. E. Vine: “‘Say Agew na Katawan’ . . . et say Agew na pangipatnag To na panangukom ed mundo.” Ikuan nen Fritz Rienecker ed Lexikon zur Bibel (Lexicon of the Bible) a “say Agew na Katawan” so malinew a tuloy a manutukoy ed “agew na panangukom.”

Say suston pakatalos ed balikas ya “agew na Katawan” so ontulong ed sikatayon makatalos ed interon libro na Apocalipsis. Nagkalalo ni, say paneknek et satan ya agew so ginmapo la. Sirin, agaylan importante a sikatayo so ‘ontalineng ed saray salita na propesiya na Apocalipsis tan sumpalen iray bengatlan nisulat ditan’!​—Apocalipsis 1:3, 19.

[Litrato ed pahina 31]

Sakey a malinew tan duga-ed-panaon a salaysay na balang bersikulo na libron Apocalipsis so niparungtal ed “Revelation​—Its Grand Climax At Hand!” Sayan makaayat a katulongan ed panagaral na Biblia so naromog ed saray Tasi nen Jehova