Mas Asingger nen Say Inisip Da!

SAY taon, 609 K.K.P. Say lugar, Jerusalem. Say managpaliwawa, si propetan Jeremias. Sikato so nampasakbay ed kadederal na inadaron masanton syudad to, say Jerusalem, kadederal ya onsabi lapud walan inkaindan na saray Judios si Jehova tan nalgep ira ed panagdayew ed palson dirios. Sikaray angagamil na makapadimlan panagdayew ed sekso ed atagey iran pasen, angitarok na iinomen ed paganon dirios, nandayew ed banwa tan bulan tan bibitewen, amool na insenso ed Baal, tan angibagat na ananak da ed si Molek.​—1 Arari 14:23, 24; Jeremias 6:15; 7:31; 8:2; 32:29, 34, 35; Ezequiel 8:7-17.

Diad mata ra si Jeremias so sakey a manag-eyag na desyang, sakey a panatiko, sakey a rebelde a sumpad amin a bengatla tan ed amin. Diad loob na 38 taon si Jeremias so walan mangipapasakbay ed sikara; diad loob na 38 taon a saray manaayam ed Jerusalem so walan nanludlurey ed sikato. Anggad sayan panaon, ipupulisay na totoo si Jehova, a mangikuan a sikatoy pakayarin agnonoten. Inkuan da: “Si Jehova so agnaani manggawa na maong, agmet naani manggawa na mauges” tan, “pinaulyanan nen Jehova so dalin, tan si Jehova so agonnenengneng.”​—Sofonias 1:12; Ezequiel 9:9.

Saray propetan si Jeremias tan si Ezequiel so walan nanpupulong ed kadederal na Jerusalem, balet anggapoy agawa. Kanian saray Israelita so angipanengneng ya imposibli so ontan a pansingawey a nagawa ed agew da, a mangikuan: “Aparukey iray agew, tan balang pasingawey so walan ag-asumpal.” Balet say ebat nen Jehova ed saya so: “Saray agew asingger la . . . Ta siak a mismo, si Jehova, mansalitaak na salitan salitaen ko, tan nagawa naani. Agla mantinien, ta dia ed saray agew yo, O abung a mantunganga, mansalitaak et peteg a sumpalen ko.”​—Ezequiel 12:22-25.

Asabi so panaon a sumpalen nen Jehova so salita to nen 609 K.K.P. Kayari na ngalngali apatiran dekada ya angipapaknol si Jeremias ed pasakbay, say syudad na Jerusalem so kinobkob na Babilonian armada. Labin-walon bulan ed saginonor et nagba iray bakor, apoolan so templo, tan kaslakan ed totoo so adakep ed Babilonia. Unong a nipasakbay, say syudad so aderal, ed panamegley na kampilan tan eras tan salot.​—2 Arari 25:7-17; 2 Awaran 36:17-20; Jeremias 32:36; 52:12-20.

Susto si Jeremias. Aliwa iray totoo. Mas asingger nen say inisip da! Say pasingawey so aliwan mabayag ni a tao-taon. Satan so diad agew da.

Saya so aliwan bastabastan awaran. Say agawa ed Jerusalem so propetiko. Mangiyanino itan ed bengatlan onsabi. Say kaplesan a Kakristianoan so mamenben ed ngaran nen Kristo tan mangibabagan akisipanan ed relasyon ed Dios; ingen sikatoy manakar ed baka-bakat na saray manaayam ed daan a Jerusalem. Gendagendat, mambangat iray iglesia na Kakristianoan ed paganon doktrina, ya adutakan na seksual ya imoralidad, a tsampion ed politikal iran pakana, a manusuporta la ed saray bakal ed mundo, manayakop ed ebolusyon tan ikaindan so Dios a bilang Amalsa, a manbulag-bulagan ed bagat na minilmiyon ya agniyanak ed altar na inkakonbenyente, tan karaklan ya angadapta na atooan a pilosopya, ya ibabagan say Biblia so alamat tan tongtong basilyo.

Unong a nanludlurey iray totoo na Jerusalem ed si Jeremias, kanian manludlurey met so Kakristianoan ed saray Tasi nen Jehova natan. Say pasakbay na saray Tasi ed onsasabin kadederal ed Armagedon so nipulisay a bilang andi-kakanaan. ‘Ag-interesado so Dios ed dalin,’ kuan na Kakristianoan. ‘Abuloyan a sikatoy manuley ed tawen; sikatayoy manuley ed dalin. Tan no onsabi so Armagedon, satan so aliwan diad kailalakan tayo. Nadngelan tayo la itan ya estorya. Agtayo papapalikdo ed satan!’

Kasin naulit iya ed awaran? Kasin sananey lamet a panaon sano naromog na nilaksalaksan mas asingger nen say inisip da?