No Akin a Nepeg Yon Atendian So “Maridios a Debosyon” Kumbension Distrito
Sakey a makatumang a taloran agew ya instruksion ed Biblia so manalagar ed sikayo diad “Maridios a Debosyon” Kumbension Distrito na saray Tasi nen Jehova ya onggapo ed sayan bulan. Diad panamegley na makaibangat iran paliwawa tan interbio tan sakey a drama, nitarya so makanan panangiwanwan na Biblia. Wadman la ed 8:50 ed kabuasan na Biernes sano onggapo so kumbension diad musikal a presentasyon.
Say programa ed kabuasan na Biernes so mangipabitar ed paliwawan “Paliisan Iray Bibil a Managpasakit” tan sakey ya importantin diskurso ed gapoan na doktrinan Trinidad. Diad ngarem, saray atateng so nasimbawan mangawat ed moral a responsabilidad da a mangitarya ed saray anak da na espiritual a tawir. Ontumbok, say tobonbalo so napaseseg a manggawa ed si Kristo a modelo ra tan gawaen da so katuaan a kayarian da. Say programa ed agew so mansampot ed diskusyon na sakey ya engranden probisyon a nagawan nagkalautla ya ontulong ed saray tobonbalo.
Say Sabado so sananey ya interon agew ya instruksion a mangipabitar ed bautismo ed kabuasan tan diad ngarem et saray makanan paliwawa nipaakar ed Kristianon Mananguley ya Ulop tan no panon so pakapikoopera tayo ed satan natan. Say sesyon ed ngarem so mansampot ed importantin paliwawan “Say Biblia—Salita na Dios odino Too?”
Simba na kabuasan, say nipanpanaon ya instruksion so mamasakbay a sumpad “too na kaugsan” tan sumpad ikasipa ed saray pamaakaran na tagano tan iinumen, panag-ayos, tan panligliwaan. (2 Tesalonica 2:3) Saya so tumboken na modernon-agew a draman mangidadanet ed kaimportantian na panagpauley ed Dios. Insan, agyo labay a saewen so paliwawa ed publiko, “Say Kililiktar So Asingger ed Saray Totoo na Maridios a Debosyon!”
Legan na Disyembre, 1989 tan Enero, 1990, 34 iran kumbension so niyeskedyul ed interon Pilipinas lambengat, kanian wala so sakey ya ag-arawi ed abung yo. Ontepleg ed saray Tasi nen Jehova ed lokal nipaakar ed panaon tan pasen na sakey a sankaasinggeran ed sikayo.
[Litrato ed pahina 32]
Kumbension distrito ed Verona, Italya