Balita na Saray Manangiyabawag ed Panarian
Bebendisyonan nen Jehova Iray Manamemben na Katooran ed Cyprus
IMBAGA nen Jesus ed saray patumbok to: “No siak so pinasegsegang da, sikayo met so pasegsegangen da.” (Juan 15:20) Tan si Jehova, ed panaamegley ne propeta Isaias, so angikuan: “Antokaman ya ayuran atibukel ya onsumpad sikayo so ag-ontalona.” (Isaias 54:17) Sarayan balikas so namparan asumpal a tua ed Cyprus, a saray manamemben-na-katooran a Tastasi nen Jehova so okupadon mangipupulong ed maong a balita.
◻ “Say Griegon Iglesian Ortudoks so aktibon tuloy diad panasalin panleglemew ed kimey tayo,” so kuan na sakey a report a nanlapud satan a dalin. “Saray papari so angibunog na saray lepleta a mangaakusa ed sikatayo ed amin a nengneng na bengatla tan ibabaga ra ed totoon paliisan da so pisingbatan ed saray Tasi nen Jehova. Dadalawen da ni ingen iray totoon manaaral na Biblia ed saray Tasi tan salien da ran dismayaen. Diad Paphos, sakey a teologon-pari so analin mangumbinse na taloran nanduruman totoo ya ontundan manaral na Biblia ed saray Tasi nen Jehova. Diad miduman okasyon, balang sakey ed talora so angimbita ed sakey ya agin laki a misingbatan ed sayan teologo. Makapaliket, amin dan talo so aktibo la natan a mikakasakey ed organisasyon nen Jehova.” Saya, siempre, so angonigon ed pari, a nankomento: “Agko lan balot labay lamet so misingbatan ed saray Tasi nen Jehova.” Arum a papari so nampatuloy ni ed kalaknab a kabilen so arum iran agagi legan a saraya so mibibiang ed ministeryo. Mabetbet, anggaman kuan, saray sagpot na klero so binmuelta, tan lalon dakel a totoo natan so ontatalindeg ed dapag nen Jehova.
◻ Say onggendan ya eksperiensian nanlapud Cyprus so mangipanengneng a say panamemben na katooran ed leksab na isusumpa et mangitarok na saray bendisyon. Say asawa na sakey a bii so pinatey legan na guerra nen 1974, a tinaynanan to so melag ya ugaw a biin pabalegen. Say bii so akiasawa lamet. Dismayado ed pansimpisimpitan na klero tan say agpakapanseguro ed arapen, sikato so akipaknan manaral na Biblia ed saray Tasi nen Jehova. Sikato so maples ya inmaligwas tan inggapo ton ibaga ed saray kakanayon to so maabig a bengatlan nanaaralan to. Ginmapo so isusumpa. Say sankabalgan a subok so sinmabi sanen say manedad-na-15-taon ya anak ton bii so angikuan: “Abalang ko so amak tan no agyo tundaan so miaral ed saray Tasi nen Jehova, sikayo so idepak ko a bilang inak. Siak so magmaliw ya ulila.” Anggaman kuan, say bii so nantultuloy a nanaral.
Sakey ya agew dinmalaw so ugaw a bii ed sakey a kaaro ed ospital. Diad kaabay a kama ed ospital, sakey a Tasi so dinmalaw ed kanayon sanen sakey a pari so sinmabin onnengneng ed parehon pasiente. Nigapo so tongtongan ed baetan na agin laki tan say pari. Say agin laki so kalmado tan mataktika, inusar to so Biblian mangipaliwawa ed talindeg to. Say pari, ed biek a dapag, so agresibo. Intagey to so boses to, balet anggapo so sakey a panaon a nilukasan to so Biblia. Say bii so nambantay ed inkagawa tan asagyat diad kaabigan na agin laki tan diad katuaan ya inusar to so Biblia. Diad saman a mismon labi, sanen say agin laki tan say asawa to so binmisita ed si ina to a para ed panagaral na Biblia, say ugaw a bii so angipaliwawa ed no anto so agawa ed ospital tan tinepetan tora: “Kasin labay yo met a siak so iyaralan yo?” Natan et say ugaw a bii so manaaral lan mamiddua ed sakey simba, tan say asawan-laki met so manaaral la. Say ina so sakey lan bautismadon manangipalapag.
Peteg, bebendisyonan nen Jehova iray manamemben-na-katooran ya ariripen to ed Cyprus!
[Litrato ed pahina 23]
Si apostol Pablo met so akaabet na isusumpa ed Paphos