Sulat na Mananguley ya Ulop

Parad saray mangaaro ed si Jehova a Dios tan say Salita to, say Biblia:

“Naamtaan yo so katuaan, tan say katuaan so mangibulos ed sikayo,” so kuan nen Jesus. (Juan 8:32) Isip mo pay aliknam nen unaan mon naamtaan so katuaan ya walad Biblia! Makapaliket ta anggano napnapno na katilaan so mundo ya pambibilayan tayo, sarag tayon aralen so katuaan.​—2 Timoteo 3:1.

Labay nen Jehova a Dios ya naamtaan tayoy katuaan. Tan lapud inaro tayo ray totoo, labay tayon ibaga ed sikara so nipaakar ed satan. Balet wala ni kaukolan ya gawaen diad panlingkor tayo ed Dios. Kaukolan tayon gawaen so anggaay nayarian tayo ya manbilay bilang Kristiano lapud papablien tayo iray prinsipyo nen Jehova. Impaliwawa nen Jesus so importantin paraan no panon tayon napaneknekan ya inaro tayoy Dios. Imbaga to: “No unoren yo iray ganggan ko, mansiansia kayod arok, no panon ya inunor ko iray ganggan na Ama tan nansiansia ak ed aro to.”​—Juan 15:10.

Talagan inar-aro nen Jesus so Ama to, tan gagawaen to so amin ya igaganggan na Ama to. No aligen tayoy Jesus diad paraan na kabibilay tayo, aroen itayo nen Jehova tan nalikna tayoy tuan liket. Singa imbaga nen Jesus, “lapud amta yo la iraya, maliket kayo no gawaen yo.”​—Juan 13:17.

Komon ta makatulong iyan publikasyon pian naaralan yon iyaplika so katuaan ya walad Biblia tan magmaliw kayon kaaro na Dios. Ipipikasi mi ya komon ta mas lalon onelet so panangaro yo ed Dios tan “mansiansia kayo ed panangaro na Dios, . . . a mangitonton ed bilay ya andi-anggaan.”​—Judas 21.