Estandarte na Panarian​—Pananap ed Inkatunong na Dios

PINAYAPAYAN moy kaabay yo legan kan manaakar. Diad apalabas iran agew et naimanom ya oobserbaan to ka tan say pamilyam. Pinayapayan to ka met tan tinawag to ka. Inkuan to: “Wala pay itepet ko? Akin et duma kayod arum?” “Antoy labay mon ibaga?” so intepet mo. Inkuan to: “Di ba, Tasi nen Jehova kayo? Anggapoy miparad sikayo. Aliwa kayon singa arum a relihyon​—agkayo manseselebray holiday, tan agkayo mibabalid politika tan guerra. Agkayo mansisigarilyo. Tan singa atagtagey so moralidad na pamilya yo. Akin et duma kayo?”

Antam a say ebat et: Manpapauley kamid Panarian na Dios. Pipinoen kami na Ari min si Jesus. Tutulongan to kamin natumbok so alimbawa to, tan mansiansian biig ed sayan mauges a mundo. Diad sayan seksion, amtaen tayo no panon ya pipinoen na Mesianikon Panarian so espiritualidad, moralidad, tan organisasyon na totoo nen Jehova​—parad kirayewan to.