Katuaan na Panarian​—Pangitatarya na Espiritual a Naakan

ANENGNENG mon aliketan so iyaaralan moy Biblia nen atalosan toy kabaliksan na tekston binasa yo. Insan to imbaga, “Labay mon ibaga, ibabangat na Biblia ya sarag tayoy manbilay ya andi-angga diad Paraiso​—diad sayan mismon dalin?” Manimis so partner mo tan imbaga to, “Anto la may abasam ed Biblia?” Lapud balo ed sikatoy naaralan to, manpeyeng tan imbaga to, “Agak makapanisia ya aliwan oniay imbangat dad siak!” Anonotan mo ya ontan met so imbaga to pigaran simba lay apalabas nen first time ton naamtaan ya Jehova so ngaran na Dios.

Wala ta lay ontan ya eksperiensyam? Asali la itan na dakel a lingkor na Dios. Wala ray malinew ya bengatlan mangipapanonot ed mablin regalon naawat tayo. Satan ya regalo et say pikakabat ed katuaan! Balet, nonot mo pan magano: Panon mon naawat itan ya regalo? Diad sayan seksion, aralen tayo itan ya tepet. Say kalkalnan impangawat na totoo na Dios ed espiritual ya liwawa et mabiskeg ya paneknek a tua so Panarian na Dios. Sanlasus taon lan seseguroen na Ari, si Jesu-Kristo ya nibangat so katuaan ed saray totoo na Dios.