Maunor si Jesus

Lanang kasin mainomay ya unoren si mamam tan papam?— No maminsan mairap. Di ba, maunor si Jesus ed si Jehova tan ed saray ateng to?— Sarag mon aligen si Jesus pian naunor mo ray ateng mo anggan no maminsan et aliwan mainomay. Amtaen ta sirin so istorya nen Jesus.

Antis ya linma diad dalin si Jesus, diad tawen so panaayaman to. Kaiba toy Ama to, si Jehova. Pero wala met so ateng to diad dalin. Say ngaran da et Jose tan Maria. Antam no panon iran nagmaliw ya ateng to?—

Say bilay nen Jesus ed tawen et inyan nen Jehova ed eges nen Maria pian niyanak tan manayam diad dalin. Milagro iman! Binmaleg si Jesus ed eges nen Maria, a singa saray arum ya baby diad eges na mama da. Kalabas na 9 ya bulan, nianak si Jesus. Kanian, nagmaliw ya ateng toy Jose tan Maria.

Nen 12 taon nen Jesus, anengneng ya talagan inad-aro toy Ama ton si Jehova. Agawa iya nen nambiahe na arawi si Jesus tan saray kapamilya to paonlad Jerusalem pian mandayew ed si Jehova. Nen pasempet la ra, agnaalmo nen Jose tan Maria si Jesus. Iner kasi nakar to?—

Nan-apuran pinmawil si Jose tan Maria diad Jerusalem tan inanap day Jesus. Aburido ra ta agda naalmo. Balet kayari taloran agew, nalmo dad templo! Akin kasi et wadmad templo si Jesus?— Ta diman to lalon nakabat so Ama to, si Jehova. Inad-aro toy Jehova tan labay ton napaliket. Anggan nen baleg lay Jesus, maunor nin siansia ed si Jehova, anggan no maminsan et aliwan mainomay tan kaukolan ya manirap. Inunor met kasi nen Jesus si Jose tan Maria?— On, ibabaga na Biblia ya inunor to ra.

Antoy naaralan mod si Jesus?— Dapat unoren moy mamam tan papam, anggan no maminsan et mairap. Anto ey, gawaen mo tan?—