Asalim lan Maermen tan Natatakot Ka?

Nengneng mo yay ugaw diad litrato. Singa maer-ermen tan natatakot, anto? Asalim met la tan?— No maminsan, ontan so nalilikna tayo. Ibabaga na Biblia ya wala ray kakaaro nen Jehova ya maermen tan natatakot met. Sakey ed sikara si Elias. Amtaen tay istorya to.

Nensaman, manaayam si Elias diad Israel, antis nin niyanak si Jesus. Si Ahab ya ari na Israel et aliwan si Jehova so Dios to. Say dadayewen to tan say asawa ton si Jezebel et si Baal, ya aliwan tua a dios. Kanian si Baal met lay dios na saray totood Israel. Papairapen tan labay ya pateyen nen Reyna Jezebel so amin ya totoon say Dios da et si Jehova, pati si Elias! Antam no antoy ginawa nen Elias?—

Batik si Elias! Asabi toy desierto tan inmamot ed kuweba. Akin kasi et onman so ginawa to?— On ta natatakot. Pero aga dapat ontakot si Elias. Akin ey? Ta amta to ya sikatoy tulongan nen Jehova. Antis na satan et impanengneng la nen Jehova ed si Elias so pakapanyari To. Aminsan et inebatan nen Jehova so pikakasi nen Elias tan angipelag na apoy manlapud tawen. Kanian seguradon tulongan to lamet si Elias!

Nen walad kuweba si Elias, akitongtong si Jehova ed sikato tan tinepet to: ‘Antoy gagawaen mo dia?’ Inmebat si Elias: ‘Siak labat lay akera ya mandadayew ed sika. Bukbukor ko la, tan natatakot ak ompan pateyen da ak.’ Say amta nen Elias et apatey lan amin iray mandadayew ed si Jehova. Pero imbaga nen Jehova ed sikato: ‘Andi, wala ni 7,000 ya mandadayew ed siak. Kasilan moy loob mo. Dakel ni pagawak ed sika!’ Kinmasil kasi loob nen Elias nen arengel to man?—

Antoy naaralan mod si Elias ey?— Agka dapat maermen tan natatakot. Ta wala ray kakaarom ya inaro day Jehova tan inaro da ka. Sakey ni, mabisbiskeg si Jehova, tan lanang to kan tulongan! Anto ey, maliket ka ta naamtaan mon agmo bukbukor?—