No Panon ya Aregloen Iray Problema ed Negosyo

Diad 1 Corinto 6:1-8, nabasa imay imbaga nen apostol Pablo nipaakar ed pandedemandaan na saray Kristiano. Sikatoy adismaya ta say arum ya agagi ed Corinto et “makpel ya oonlad korte diad arapan na saray agmatunong a totoo.” (Bersikulo 1) Imbaga nen Pablo iray ambelat a rason no akin ya agla nepeg ya onlad korte iray Kristiano pian mandedemandaan, tan ayosen da la ray agpantatalosan unong ed uksoyan na kongregasyon. Aralen tayo so pigaran rason no akin ya niiter iyan simbawa tan pantongtongan tayo met so pigaran situasyon ya agmet la iya onaplika.

No walay problema tayo ed sakey ya agi nipaakar ed negosyo, nepeg ya ayosen tayo itan unong ed paraan nen Jehova, aliwan unong ed paraan tayo. (Proverbio 14:12) Singa imbaga nen Jesus, maabig no ayosen lan tampol iray angkelag ya agpantatalosan antis ya ombaleg. (Mateo 5:23-26) Makapaermen balet ta wala ray Kristiano ya nagmaliw a masyadon makolkol tan nandemandaan ni ra ingen. Oniay inkuan nen Pablo: “Atalo kayo la no mandedemandaan kayo.” Akin et ontan so imbaga to? Say manunan rason et lapud nayarin naderal so maong a reputasyon na kongregasyon tan nabalaw so ngaran na Dios ya dadayewen tayo. Ipapuso tayo sirin iyan tepet nen Pablo: “Akin et agyo la paulyanan a sikayoy panggawaan na makapuy?”​—Bersikulo 7.

Imbaga met nen Pablo ya angiter so Dios na alay-abig ya uksoyan ed kongregasyon pian naareglo so dakel ya agpantatalosan. Saray elder et walaan na karunongan lapud aaralen da so katuaan ya walad Biblia, tan inkuan nen Pablo a sikara so “makayarin mangukom ed agagi” diad saray “bengatlan nipaakar ed sayan bilay.” (Bersikulo 3-5) Imbaga nen Jesus a saray seryoson kasalanan a singa say panagpauges tan panagsaol et nepeg ya aregloen unong ed sayan taloran proseso: unona, panggunaetan na saramay nalalanor ya ayosen so problema a siksikara ni labat; komadua, no anggapoy nansumpalan na satan, mangitagar na sakey odino duaran tasi; tan komatlo, no siansia nin agnaayos, iyasingger la itan ed kongregasyon ya irerepresenta na saray elder.​—Mateo 18:15-17.

Siempre, agmet la kaukolan ya magmaliw ya abogado odino negosyante iray elder tan agkaibad responsabilidad da so pangiter na simbawa nipaakar ed negosyo. Aliwan sikara so mangiter na solusyon no panon ya naayos iray agpantatalosan ed negosyo. Noagta, gagawaen day anggaay nayarian dan tulongan iray agagi ya mangiyaplika ed Kasulatan tan manpakna ed sakey a solusyon pian napansiansia so kareenan. No komplikado lay situasyon, nayarin mantepet ira ed manangasikaso na sirkito odino diad branch office na Saray Tasi nen Jehova. Anggaman ontan, wala met iray situasyon ya agla sakop na samay insimbawa nen Pablo. Anto iratan ey?

No maminsan, wala ray situasyon ya talagan kaukolan so onlad korte pian naayos so sakey a problema diad mareen tan patas ya paraan. Alimbawa, ompan atan labat so paraan pian naaprobaay diborsyo, naalad pudir so sakey a menor-de-edad ya anak, naamtaan no pigaray naalan sustento, makalay benepisyo ed sakey ya insurance, makaawat na bayar manlapud alugin kompanya, tan pian napaneknekan a tua so sakey a testamento. Wala met iray situasyon ya ompan kaukolan ya idemanda na sakey ya agi so angidemanda ed sikato pian naprotektaan toy sarili to.a

No say gagala na pangidemanda et aliwan pian mikolkol, nayarin agmet itan kontra ed samay insimbawa nen Pablo.b Anggaman ontan, nepeg a say sankaimportantian ed sakey a Kristiano et say pamasanto ed ngaran nen Jehova tan napansiansia so kareenan tan pankakasakey na kongregasyon. Say manunan pakabidbiran na saray papatumbok nen Kristo et say aroan da, tan “say aro et . . . agto aanapey dilin pankaabigan to.”​—1 Corinto 13:4, 5; Juan 13:34, 35.