Ombisita Tayod Indonesia

SAY Indonesia et naapag-apag ed 17,000 iran isla. Saray totoo et makaaro, maanos, magalang, tan maparawes.

Agnaaandid panangan na saray Indonesian so prutas, niluto, tan ipapangan ya maslak et anagasang. Diad arum a lugar et akalespak ed ikamen iray pamilya tan mankamot iran mangan. Parad dakel ya Indonesian, mas mananam so panangan no mankamot.

Labalabay day art, sayaw, tan musika. Say anklong et sakey ed saray instrumento rad musika. Gawa itan ed pigaran piraso na bulo a nandarasig ya imbotbot tan imbitin ed sakey ya bislak. Itotono iray bulo pian mamawala na nota sano yegyegen. Pian makabuo na musika, kaukolan ya mankoopera so pigaran mantogtog, tan i-timing dan panmayegmegen so anklong da.

Baleg so impluensyad Indonesia na Hinduismo, insan Budismo anggad 15th century C.E. Kasabi balet na 16th century, inimpluensyaan na Islam so kultura na Indonesia. Insan sinmabi iray taga Europe ya manaanap na pampananam ed putahe, tan impakabat day relihyon na Kakristianoan.

Manlapu la nen 1931, saray Tasi nen Jehova, ya kabkabat ed interon mundo lapud pambabangat day Biblia, et makulikulin manpupulong ed Indonesia. Natan, wala lay masulok ya 22,000 a Tasi diman, tan pansasagpotan da met ya ibangat iray emel. Diad agano ni et masulok ya 500 so inmatendid sign-language ya pantitipon na saray Tasi pian nodnonoten so impatey nen Jesu-Kristo.