Nen Pebrero 2026, masulok lan 259 ya Tasi nen Jehova ed interon mundo so akapriso lapud pananisia ra.
Base ed Article 18 na International Covenant on Civil and Political Rights, kaukolan ya iter ed totoo so kanepegan dan nawalaan na kawayangan ed panagnonot, konsiensia, tan relihyon. Balet diad arum ya bansa, agniiiter ed saray Tasi nen Jehova iratan ya kanepegan tan nababaliwalay hustisya ta napripriso tan namamaltrato ira lapu labat ed pandadayew da, odino lapud agnaako na konsiensia ra so pansundalo.
Crimea
Nen Abril 2017, imbawal na saray autoridad na Russia iray legal ya korporasyon na saray Tasi nen Jehova ta labay dan patundaen so mareen ya panagdayew da. Akasabi anggad Crimea iyan graben isusumpa. Dakdakel so naaresto tan agawan impan-raid kanian 14 ya Tasi nen Jehova so akapriso natan, tan amin da et naakusaan ya manggagawa na kimey na saray extremist.
I-click iya pian ni-download so listaan na amin ya Tasi nen Jehova ya akapriso natan ed Crimea lapud pananisia ra.
Eritrea
Nen 1994, kinansela nen Presidente Isaias Afwerki so citizenship na saray Tasi nen Jehova diad Eritrea ta ag-ira binmoto pian pagmaliwen ya bulos so bansan Eritrea nen 1993 tan ag-ira nansundalo ta ag-itan naako na konsiensia ra. Manlapu lad saman et ipipriso, papairapen, tan mamaltratoen la na gobierno iray Tasi, anggan saray bibii, matatken la, tan saray menor de edad, anggano agni ra alitis odino akasoan. Natan et 64 ya Tasi nen Jehova so walad prisoan, tan anggapoy anggan sakey ed sikara so dinmalan ed panaglitis tan ag-ira naikday sentensia.
I-click iya pian ni-download so listaan na amin ya Tasi nen Jehova ya akapriso natan ed Eritrea lapud pananisia ra.
Russia
Nen Abril 2017, imbawal na Korte Suprema na Russia iray legal ya korporasyon na saray Tasi nen Jehova ta manggagawa ra kunoy extremist iran kimey. Impasara tan kinompiska na gobierno iray pasen na panagdayewan da tan imbawal met iray literatura da. Insan ginapoan dan inimbestigaan, inaresto, tan tinepet-tepetan iray indibidual ya Tasi nen Jehova. Papapawayen na gobiernoy Russia ya ilegal so gagawaen na saray Tasi nen Jehova ya pandadayew ed Dios. Kada no man-raid iray pulis ed kaabungan na saray Tasi, mabetbet et mamaltratoen tan maruksa da ran tetepet-tepetan insan da ra aarestoen. Natan et manga 158 so bilang na saray Tasi nen Jehova ya balanglan wala nid pretrial detention, puersaan ya mankikimey, odino susumpalen day sentensia da.
I-click iya pian ni-download so listaan na amin ya Tasi nen Jehova ya akapriso natan ed Russia lapud pananisia ra.
Singapore
Impaakseb na Singapore so kapilitan ya pansundalo na saray lalaki ed bansa ra, tan agbibidbiren na gobierno so kanepegan na sakey ya agto labay so mansundalo lapud agnaako na konsiensia to. Lapud satan et nayarin nasentensiaan so sakey ya napriso na anggad 30 ya bulan. Anggano pigaran dekada lan kekerewen na United Nations ed Singapore ya abuloyan dan agmansundalo so sakey ya too no ag-itan naako na konsiensia to lapud relihyon to, impaawet na Singapore ya agto umanen iray totontonen to tan kaukolan ya amin ya lalaki et mibiang ed militar. Natan et 11 ya kabataan ya Tasi nen Jehova so akapriso lapud agnaako na konsiensia da so pansundalo, tan 5 ed sikara so komadua lan asentensiaan.
I-click iya pian ni-download so listaan na amin ya Tasi nen Jehova ya akapriso natan ed Singapore lapud pananisia ra.
South Korea
Nen Oktubre 26, 2020, first time ed South Korea ya naikday pankanawnawa ya manggawa na alternative civilian service (ACS) odino alternatibon serbisyo ya anggapoy koneksion to ed militar, iramay agda labay so mansundalo lapud agnaako na konsiensia da. Pero kukuestionen na arum iyan ginawan alternatibon serbisyo na South Korea ta ambelbelat kuno itan. Say panggaway alternatibon serbisyo ed loob na 36 ya bulan et doble so karukey to ed aktual ya panserbi ed militar. Balet imbasura labat na Constitutional Court na South Korea nen 2024 so amin ya reklamo ed korte. Inawat na kaslakan ed saray Tasi nen Jehova so alternatibon serbisyo anggano mair-irap itan. Pero 14 ya kabataan ya brother so ag-angawat ed sayan programa na alternatibon serbisyo. Sakey ed sikara so walad prisoan tan pigarad sikara so peles ya lilitisen tan nayarin nasentensiaan met ira na pakapriso.
I-click iya pian ni-download so listaan na amin ya Tasi nen Jehova ya akapriso natan ed South Korea lapud pananisia ra.
Ukraine
Diad loob na ngalngali taloran dekada, minanabang iray Tasi nen Jehova ed Ukraine ed sakey ya ganggan ya aabuloyan ton agmansundalo iramay agnaako na konsiensia ra so mibiang ed guerra. Sarag day manggawa na alternatibon serbisyo ya anggapoy koneksion to ed militar. Balet manlapu la nen ginmapo so guerra nen Pebrero 24, 2022, agla malinew no panon ya naala iray legal ya karapatan parad alternatibon serbisyo legan na guerra, tan aawiten dad korte iramay agda labay so mansundalo insan da ra ipipriso. Natan et anemiran Tasi so akapriso tan limara ni so walad pretrial detention. Mapagpaga so taloran UN Special Rapporteurs kanian imbaga da ya kaukolan kuno ya iter na gobierno imay probisyon parad alternatibon serbisyo.
I-click iya pian ni-download so listaan na amin ya Tasi nen Jehova ya akapriso natan ed Ukraine lapud pananisia ra.
“Nodnonot yo iramay walad prisoan a singano kaiba da kayon apriso.”—Hebreo 13:3 .