TEPET 6
Antoy impropesiya na Biblia nipaakar ed Mesias?
PROPESIYA
“Sika, O Betlehem Efrata, . . . ompaway ed sika imay turoen kon magmaliw a manuley ed Israel.”
KASUMPALAN
“Kayari inkiyanak nen Jesus ed Betlehem na Judea diad panaon nen Herodes ya ari, wala ray astrologo a nanlapud bukig a linma ed Jerusalem.”
PROPESIYA
“Nanaapagan day kawes ko, tan nampapalaranan da itan.”
KASUMPALAN
“Natan, sanen si Jesus et nipasak la na saray sundalo diad poste, inala ray kawes to tan impankapat da, . . . tan inala ra met so lalatopan a kawes to. Balet anggapoy nansaipan na sayan lalatopan a kawes, a nilaga manlapud tagey ya anggad saloy. Kanian inkuan dad balang sakey: ‘Agtayo iya pipilaten, noagta manpapalaranan itayo no siopay makala.’”
PROPESIYA
“Proprotektaan Toy amin a pukel to; anggapoy anggan sakey ed saratan so aputer.”
KASUMPALAN
“Sanen isublay da lay Jesus, anengneng dan inatey la, kanian agda la pinuter iray bikking to.”
PROPESIYA
“Sikatoy dinuyok lapud kasalanan mi.”
KASUMPALAN
“Dinuyok na sakey ed saray sundalo so diking to diad panamegley na gayang, tan pinmaway a tampol so dala tan danum.”
PROPESIYA
“Inter da so upak, 30 piraso na pilak.”
KASUMPALAN
“Insan samay tatawagey Judas Iscariote, a sakey ed Labindua, et linmad saray manunan saserdote, tan inkuan to: ‘Antoy iter yod siak no sikatoy iyawat kod sikayo?’ Insipan dan sikatoy ikdan day 30 piraso na pilak.”