APOCALIPSIS YA INAWAT NEN JUAN

1 Say panangiparungtal* nen Jesu-Kristo, ya inter na Dios ed sikato,+ pian ipanengneng ed saray aripen to+ no anto ray magano lan nagawa. Et imbaki toy anghel to tan diad panamegley na saray simbolo* et impaamta to itan ed aripen ton si Juan,+ 2 a tinasian toy salita ya inter na Dios tan say impantasi nen Jesu-Kristo, on, amin a bengatlan anengneng to. 3 Maliket imay manbabasan maksil tan saramay ondedengel ed saray salita na sayan propesiya tan samay manguunor ed saray nisulat ditan,+ ta asingger lay aturon panaon.

4 Siak, si Juan, so nansulat ed pitoran kongregasyon+ a walad probinsya na Asia:

Nawalaan kayo komon na agnaparaan a kaabigan tan kareenan a manlalapud “Dios a wala natan tan wala la nensaman tan onsabi la,”+ tan manlalapud pitoran espiritu+ a walad arap na trono to, 5 tan manlalapud si Jesu-Kristo, “say Matoor a Tasi,”+ “say panguloan manlapud inaatey,”+ tan “say Manuley na saray arari ed dalin.”+

Diad sikato a mangaaro ed sikatayo+ tan angibulos ed sikatayo ed saray kasalanan tayo diad panamegley na dala to+— 6 tan ginawa to itayon sakey a panarian+ tan saserdote+ na Dios tan Ama to—on, niiter komon ed sikato so gloria tan biskeg ya anggad angga. Amen.

7 Sikatoy onsabi a walad saray lurem,+ tan sikatoy nanengneng na amin a mata, tan saramay nanduyok ed sikato; tan say amin a tribu ed dalin et tapoktapoken da ray pagew da lapud ermen nisengeg ed sikato.+ On, seguradon nagawa iya. Amen.

8 “Siak so Alfa tan say Omega,*+ say Dios a wala natan tan wala la nensaman tan onsabi la, say Makapanyarin-amin,”+ kuan nen Jehova* a Dios.

9 Siak, si Juan, ya agi yo tan kaiba yo ed kairapan+ tan panarian+ tan panagsungdo+ bilang patumbok nen Jesus,+ et wala ak ed isla a tatawagen a Patmos lapud pansasalitak nipaakar ed Dios tan pantatasik nipaakar ed si Jesus. 10 Diad panamegley na masanton espiritu, niyakar ak diad agew na Katawan, tan diad benegan ko et nadngel ko so maksil a boses a singa tanol na trumpeta, 11 a kuan to: “Isulat mo ed sakey a lukot no antoy nanengneng mo tan ipawit mo itan ed pitoran kongregasyon: diad Efeso,+ Smirna,+ Pergamo,+ Tiatira,+ Sardis,+ Filadelfia,+ tan Laodicea.”+

12 Linmingaw ak pian nengnengen no siopa may mitotongtong ed siak, tan kalingaw ko et anengneng koy pitoran balitok a kandelero,+ 13 tan diad pegley na saray kandelero et walay sakey a singa anak na too,+ a say kawes to et anggad sali, tan walay balitok a balkes ya akabariber ed pagew to. 14 Ontan met, say ulo to tan saray buek to et amputi a singa kaputi na bagoy karnero, singa niebe, tan saray mata to et singa mandarlang ya apoy,+ 15 tan saray sali to et singa puron gansa+ a masmasnag sano walad hurnoan, tan say boses to et singa tanol na manag-agus iran danum. 16 Tan diad kawanan a lima to et walay pitoran bitewen,+ tan diad sangi to et ompapaway so sakey a makdem tan andukey ya espadan duaray-tarem,+ tan say lupa to et singa agew sano onsisinag a masmasnag.+ 17 Sanen sikatoy anengneng ko, abaktar ak a singa inatey diad salian to.

Tan intapew tod siak so kawanan a lima to tan inkuan to: “Agka natatakot. Siak so Unaan+ tan say Unor,+ 18 tan say sakey a mabilay,+ insan inatey ak,+ balet, mabilay ak lawas ya anggad angga,+ tan walad siak iray tombok na patey tan say Lubok.*+ 19 Kanian isulat mo ray anengneng mo, tan saray nagagawa natan, tan saray nagawa kayari na saraya. 20 Say sagradon sekreto nipaakar ed pitoran bitewen ya anengneng mo diad kawanan a limak tan nipaakar ed pitoran balitok a kandelero: Say pitoran bitewen et ontutukoy ed saray anghel na pitoran kongregasyon, tan say pitoran kandelero et ontutukoy ed pitoran kongregasyon.+

2 “Isulat mo ed anghel+ na kongregasyon ed Efeso:+ Saraya so imbaga na samay sankabembenan tod kawanan a lima to so pitoran bitewen tan manaakar ed pegley na pitoran balitok a kandelero:+ 2 ‘Amtak iray gagawaen mo, tan say pansasagpot mo tan pansusungdom, tan agmo kokonsintien iray mauges a totoo, tan susuboken mo iramay mangibabagan apostol ira+ anta andi, tan naamtaan mon matila ra. 3 Mansusungdo ka met, tan nantepel ka nisengeg ed ngaran ko+ tan agka kinmesaw.+ 4 Balet say nanenengneng kon kakulangan mo et pinaulyan mon naandi so panangaron walad sika diad gapo.

5 “‘Nonot mo sirin no antoy walad sika balet ta abalang mo,* tan magbabawi ka+ tan gawam iray ginawam diad gapo. Ta no andi, onla ak ed sika, tan ekalen koy kandelerom+ ed pasen to, likud labat no magbabawi ka.+ 6 Balet, saya so maabig ed sika: a bubusolen mo iray gagawaen na sekta nen Nicolaus,+ a bubusolen ko met. 7 Samay walaan na layag et ondengel komon ed ibabaga na espiritu ed saray kongregasyon:+ Samay manalo+ et abuloyan kon mangan ed kiew na bilay,+ a walad paraiso na Dios.’

8 “Tan isulat mo ed anghel na kongregasyon ed Smirna: Saraya so imbaga na ‘samay Unaan tan samay Unor,’+ ya inatey tan abilay lamet:+ 9 ‘Amtak so kairapan mo tan say irap na bilay mo—balet mayaman ka+—tan say panagmudmora ed sika na saramay mangibabagan Judio ira balet ta diad tua et andi, noagta wala rad grupo* nen Satanas.+ 10 Agmo tatakotan iray magano lan sagmaken mo.+ Say Diablo et agto tundaan ya ipriso so arum ed sikayo pian sigpot kayon nasubok, tan manirap kayo ed samploran agew. Paneknekan mon matoor ka anggad patey, tan iter kod sika so korona na bilay.+ 11 Samay walaan na layag et ondengel komon+ ed ibabaga na espiritu ed saray kongregasyon: Samay manalo+ et agton balot nasagmak so komaduan ipapatey.’+

12 “Isulat mo ed anghel na kongregasyon ed Pergamo: Saraya so imbaga na samay walaan na makdem tan andukey ya espadan duaray-tarem:+ 13 ‘Amtak no iner so panaayaman mo, salanti, diad kawalaan na trono nen Satanas; ingen ta matoor kad siak,*+ tan agmo imburi so pananisiam ed siak+ anggan diad saray agew nen Antipas, a matoor a tasik,+ samay pinatey+ diad kawalaan yo, a panaayaman nen Satanas.

14 “‘Balet, walay pigaran bengatla a nanenengneng kon kakulangan mo, a wala ra ditan ed sika so ontutumbok ed bangat nen Balaam,+ samay angibangat ed si Balak+ a mangiyan na pakagapolan ed saray ananak na Israel, pian kanen da ray imbagat ed saray idolo tan manggawa ray seksual ya imoralidad.*+ 15 Mipadpara, wala met ditan ed sika iray ontutumbok ed bangat na sekta nen Nicolaus.+ 16 Kanian magbabawi ka. Ta no andi, onla ak a tampol ed sika, tan milaban ak ed sikara diad panamegley na andukey ya espada na sangik.+

17 “‘Samay walaan na layag et ondengel komon ed ibabaga na espiritu ed saray kongregasyon:+ Samay manalo+ et ikdan ko na akaamot a mana,+ tan ikdan ko na amputin bato, tan akasulat ed satan a bato so balon ngaran ya anggapoy makaamta noag samay mangawat ed satan.’

18 “Isulat mo ed anghel na kongregasyon ed Tiatira:+ Saraya so imbaga na Anak na Dios, a saray mata to et singa mandarlang ya apoy+ tan saray sali to et singa puron gansa:+ 19 ‘Amtak iray gagawaen mo, tan say panangarom tan pananisiam tan panlilingkor mo tan pansusungdom, tan sarayay unor a gagawaen mo et magmaong ni nen saramay ginawam diad gapo.

20 “‘Balet, say nanenengneng kon kakulangan mo et kokonsintien mo may bii a si Jezebel,+ a tatawagen ton propetesa so sarili to, tan ibabangat to tan ibabalang to ray ariripen ko pian manggaway seksual ya imoralidad*+ tan mangan na saray imbagat ed saray idolo. 21 Tan sikatoy inikdan koy panaon pian magbabawi, balet agto labay so magbabawi ed gagawaen ton seksual ya imoralidad.* 22 Idapok la so graben sakit ed sikato, tan say baleg a kairapan ed saramay mikakalugoran ed sikato, likud labat no magbabawi ra ed saray kagagawa ya insagyat ton gawaen da. 23 Tan pateyen ko ray ananak to diad panamegley na makapatey a salot, pian naamtaan na amin a kongregasyon a siak imay manguusisa ed saray sankaaraleman a kanonotan* tan puso, tan iter kod balang sakey ed sikayo so unong ed gagawaen to.+

24 “‘Balet, ibagak ed sikayo ran arum ni a walad Tiatira, amin iramay ag-ontutumbok ed sayan bangat tan saramay agmakaamta ed ibabaga ran “aralem iran bengatla nen Satanas”:+ Agak la mangiter ed sikayo na arum nin sasakbaten. 25 Balet, siansia nin bembenan yon malet iray bengatlan walad sikayo anggad isabik.+ 26 Tan samay manalo tan ontumbok ed saray gagawaen ko anggad kasampotan et ikdan koy pakauley ed saray nasyon+ 27 unong ya inawat ko ed Amak, tan pastolan to ray totoo diad panamegley na baston a balatyang+ pian namisimisi ira a singa saray banga a gawad pitek. 28 Tan iter kod sikato so bitewen ed kabuasan.+ 29 Samay walaan na layag et ondengel komon ed ibabaga na espiritu ed saray kongregasyon.’

3 “Isulat mo ed anghel na kongregasyon ed Sardis: Saraya so imbaga na samay walaan na pitoran espiritu na Dios+ tan pitoran bitewen:+ ‘Amtak iray gagawaen mo, a kabkabat a mabilay ka, balet diad tua et inatey ka.+ 2 Manbantay ka,+ tan pabiskeg mo ray bengatlan akeraan a ngalngali la ompatey, ta nalmoan ko ya agmo nagagawaan ya amin* so kimey mo diad arap na Dios ko. 3 Kanian, nonot mon naynay no antoy inawat mo tan no antoy nadngel mo, tan itultuloy mon sumpalen itan, tan magbabawi ka.+ Segurado, no agka onliing, onsabi ak a singa sakey a matakew,+ tan agmon balot naamtaan no anton oras so isabik.+

4 “‘Balet, wala ray pigaran totoo* ditan ed Sardis ya agda dinutakan iray kawes da,+ tan kaibak iran manakar ya akakawes na amputi,+ lapud makanepegan ira. 5 Samay manalo+ et mansulong sirin na amputin kawes,+ tan agkon balot buralen* so ngaran to ed libro na bilay,+ noagta bidbiren koy ngaran to diad arap nen Amak tan diad arap na saray anghel to.+ 6 Samay walaan na layag et ondengel komon ed ibabaga na espiritu ed saray kongregasyon.’

7 “Isulat mo ed anghel na kongregasyon ed Filadelfia: Saraya so imbaga na samay masanto,+ samay tua,+ a walad sikato so tombok nen David,+ a mangilulukas pian anggapoy mangikapot tan mangikakapot pian anggapoy mangilukas: 8 ‘Amtak iray gagawaen mo—nia! nilukasan ko so sakey a puerta ed arapan mo,+ ya anggapo so makapangikapot. Tan amtak a walay daiset a pakayarim, tan sinumpal mo so salitak tan pinaneknekan mon matoor ka ed ngaran ko. 9 Saramay nanlapud grupo* nen Satanas a mangibabagan Judio ira balet ta andi,+ noagta mantitila ra—padagoen ko ra ed sika tan padakmomoen ko ra ed arapan mo tan ipaamtak ed sikara ya inaro ta ka. 10 Lapud sinumpal moy salitan nadngel mo nipaakar ed impansungdok,*+ salimbengan ta ka diad oras na subok+ ya onsabi ed interon dalin pian suboken iramay manaayam ditan. 11 Magano ak lan onsabi.+ Bembenan mon malet so bengatlan walad sika, pian anggapoy makaala ed koronam.+

12 “‘Samay manalo et gawaen kon lusek diad templo na Dios ko, tan sikatoy aglan balot ompaway ditan, tan isulat ko ed sikato so ngaran na Dios ko+ tan say ngaran na syudad na Dios ko, say Balon Jerusalem+ ya onleleksab manlapud tawen, manlapud Dios ko, tan say balon ngaran ko.+ 13 Samay walaan na layag et ondengel komon ed ibabaga na espiritu ed saray kongregasyon.’

14 “Isulat mo ed anghel na kongregasyon ed Laodicea:+ Saraya so imbaga na samay Amen,+ say matoor tan tuan+ tasi,+ say gapoan na impamalsa na Dios:+ 15 ‘Amtak iray gagawaen mo, ya aliwa kan ambetel odino ampetang. Labay ko komon ya ambetel ka odino ampetang ka. 16 Kanian lapud malainem-em ka+ tan agka ampetang+ odino ambetel, iyula ta ka. 17 Lapud ibabagam a “Mayaman ak+ tan akatipon ak na kayamanan tan anggapo lan balot so nakaukolan ko,” balet agmo amta a miserable tan pakaskasi tan pobri tan bulag tan lakseb ka, 18 say bilin kod sika et mangaliw kad siak na balitok a pinapuro ed apoy pian magmaliw kan mayaman, tan amputin kawes pian walay isulong mo tan agnanengneng so makapabaing ya inkalakseb mo,+ tan puyok a parad matam+ pian makanengneng ka.+

19 “‘Amin iramay aaroen ko et ipepetek tan didisiplinaen ko.+ Kanian magmaliw kan maseseg tan magbabawi ka.+ 20 Akaalagey ak lad puerta tan ontotoktok ak. No walay siopaman a makarengel ed boses ko tan lukasan toy puerta, onloob ak ed abung to tan mipangdem ak ed sikato tan midungo ed siak. 21 Samay manalo+ et abuloyan kon onyurong a kaibak ed tronok,+ no panon ya analo ak tan yinmurong ak+ a kaiba na Amak diad trono to. 22 Samay walaan na layag et ondengel komon ed ibabaga na espiritu ed saray kongregasyon.’”

4 Kayari na satan et anengneng ko a walay akalukas a puerta ed tawen, tan say unaan a boses a nadngel ko, a mitotongtong ed siak, et singa tanol na trumpeta, a kuan to: “Segep ka dia, tan ipanengneng kod sika iray bengatlan nepeg a nagawa.” 2 Kayari na satan et tampol a niwala ak ed pakayari na espiritu, tan walay sakey a trono ed tawen, tan walay akayurong ed satan a trono.+ 3 Tan say itsura na samay akayurong et singa baton jaspe+ tan baton sardio,* tan akapaliber ed trono so bunlalakaw a singa esmeralda so itsura to.+

4 Say trono et apaliberan na 24 a trono, tan diad sarayan trono et anengneng kon akayurong so 24 a mamatatken+ ya akasulong na amputin kawes, tan wala ray balitok a korona ed ulo ra. 5 Manlapud trono et ompapaway iray kirmat+ tan boses tan karol;+ tan walay pitoran mandarlang a silew diad arap na trono, tan say kabaliksan na saraya et pitoran espiritu na Dios.+ 6 Diad arap na trono et walay miparad salming a dayat, a singa kristal.+

Diad pegley na trono* tan diad paliber na trono et walay apatiran mabilay a pinalsa+ a napno na saray mata diad arap tan beneg. 7 Say unonan mabilay a pinalsa et singa leon,+ tan say komaduan mabilay a pinalsa et singa malangwer a kalakian a baka,+ tan say komatlon mabilay a pinalsa+ et walaan na lupa a singa lupa na too, tan say komapat a mabilay a pinalsa+ et singa ontitikyab ya agila.+ 8 Kada sakey ed saray apatiran mabilay a pinalsa et walaan na anemiran payak; napno na saray mata so paliber tan dalem na saratan.+ Tan ag-ira ontutunda ed agew tan labi a mangibabagay: “Masanto, masanto, masanto si Jehova*+ a Dios, say Makapanyarin-amin, a wala la nensaman tan wala natan tan onsabi la.”+

9 Kapagno iglogloria tan igagalang tan pisasalamatan na saray mabilay a pinalsa imay akayurong ed trono, samay mabilay ya anggad angga,+ 10 say 24 a mamatatken+ et ondadakmomo tan mandadayew ed samay akayurong ed trono, samay mabilay ya anggad angga, tan ibubuntok da ray korona ra diad arap na trono, ya ibabaga ra: 11 “Sika so makanepegan, Jehova* a Dios mi, a mangawat na gloria+ tan galang+ tan pakayari,+ lapud pinalsam so amin a bengatla,+ tan lapud linawam et niwala tan apalsa iratan.”

5 Tan anengneng ko diad kawanan a lima na samay akayurong ed trono+ so sakey a lukot ya asulatan ed arap tan beneg, a malet ya aselyadoan na pitoran tatak. 2 Tan anengneng koy sakey a mabiskeg ya anghel a maksil so boses ton mangiyaabawag: “Siopa so makanepegan a mangilukas na lukot tan mangekal ed saray tatak na satan?” 3 Balet anggapoy anggan sakey ed tawen odino diad dalin odino diad dalem na dalin a makayarin mangilukas ed lukot odino onnengneng ed satan. 4 Nanakis ak a maong lapud anggapoy aromog a makanepegan a mangilukas ed lukot odino onnengneng ed satan. 5 Balet inkuan ed siak na sakey ed saray mamatatken: “Agka la onaakis. Say Leon a nanlapud tribu nen Juda,+ say lamot+ nen David,+ et analo+ pian lukasan so lukot tan ekalen so pitoran tatak na satan.”

6 Tan anengneng kon akaalagey diad pegley na trono tan saray apatiran mabilay a pinalsa tan diad pegley na mamatatken+ so sakey a kordero+ a singano pinatey,+ a walaan na pitoran saklor tan pitoran mata, tan say kabaliksan na saray mata et pitoran espiritu na Dios+ ya imbaki diad interon dalin. 7 Sikatoy tampol ya inmasingger tan inala to so lukot ed kawanan a lima na samay akayurong ed trono.+ 8 Sanen inala na Kordero so lukot, dinmakmomo ed arapan to so apatiran mabilay a pinalsa tan say 24 a mamatatken,+ tan kada sakey et walaan na arpa tan balitok iran yaong a napno na insenso. (Say kabaliksan na insenso et saray pikakasi na saray masanto.)+ 9 Tan angansion ira na sakey a balon kansion,+ a mangibabagan: “Sika so makanepegan a mangala ed lukot tan mangekal ed saray tatak na satan, ta pinatey ka tan diad panamegley na dalam et angaliw ka na saray totoon parad Dios+ manlapud balang tribu tan lenguahe tan rasa tan nasyon,+ 10 tan ginawam iran sakey a panarian+ tan saserdote na Dios tayo,+ tan manuley ira bilang arari+ ed dalin.”

11 Tan anengneng ko, tan nadngel ko so boses na dakdakel ya anghel diad paliber na trono tan saray mabilay a pinalsa tan saray mamatatken, tan say bilang da et samplon libolibo a samplon libolibo tan nilibolibo a nilibolibo,+ 12 tan makmaksil so boses dan mangibabaga: “Say Kordero a pinatey+ et makanepegan a mangawat na pakayari tan kayamanan tan karunongan tan biskeg tan galang tan gloria tan bendisyon.”+

13 Tan nadngel ko so balang pinalsa a walad tawen tan diad dalin tan diad dalem na dalin+ tan diad dayat, tan amin a bengatlan walad saratan, a mangibabaga: “Say bendisyon tan galang tan gloria tan biskeg et niwala komon ya anggad angga ed Dios ya akayurong ed trono+ tan ed samay Kordero.”+ 14 Say apatiran mabilay a pinalsa et ibabaga ra: “Amen!” tan saray mamatatken et dinmakmomo tan nandayew.

6 Tan anengneng kon inekal na Kordero+ so sakey ed saray pitoran tatak,+ tan nadngel kon imbaga na sakey ed saray apatiran mabilay a pinalsa+ a singa karol so boses to: “Gala!” 2 Tan anengneng ko so sakey ya amputin kabayo,+ tan samay akakabayo ed satan et walay pana to; tan niiter ed sikato so sakey a korona,+ tan sikatoy linma a manatalo tan pian sumpalen so panatalo to.+

3 Sanen inekal to so komaduan tatak, nadngel kon imbaga na komaduan mabilay a pinalsa:+ “Gala!” 4 Wala ni sananey a sinmabi, sakey ya ambalbalangan kabayo, tan samay akakabayo ed satan et naikday autoridad a mangekal na kareenan ed dalin pian manpapateyan ira, tan inikdan na sakey a baleg ya espada.+

5 Sanen inekal to so komatlon tatak,+ nadngel kon imbaga na komatlon mabilay a pinalsa:+ “Gala!” Tan anengneng koy sakey ya andeket a kabayo, tan samay akakabayo ed satan et akaegna na simbangan. 6 Walay nadngel kon singano sakey a boses diad pegley na saray apatiran mabilay a pinalsa ya angibaga: “Sakey quarto* a trigo so nasaliw na sakey a denario*+ tan taloran quarto a sebada so nasaliw na sakey a denario; tan agmo aabuloyan a naupot so larak na olibo tan say alak.”+

7 Sanen inekal to so komapat a tatak, nadngel koy boses na komapat a mabilay a pinalsa+ ya angibaga: “Gala!” 8 Tan anengneng koy sakey a pusisaw a kabayo, tan samay akakabayo ed satan et Patey so ngaran to. Tan manumtumbok ed sikato so Lubok.* Tan niiter ed sikara so autoridad ed kakapat na dalin, a mamatey ed panamegley na andukey ya espada tan eras+ tan makapatey a salot tan saray atap ya ayayep diad dalin.+

9 Sanen inekal to so komaliman tatak, anengneng ko ed leksab na altar+ iray kamarerwa*+ na saray pinatey lapud salita na Dios tan lapud impantasi ra.+ 10 Inyeyag da ed maksil a boses: “O Soberanon Katawan, a masanto tan tua,+ kapigan ka mangukom tan ombales ed saray manaayam ed dalin nisengeg ed dala mi?”+ 11 Tan kada sakey ed sikara et naikdan na amputin kawes,+ tan imbaga ed sikara a manpainawa ni ran magano, anggad nakompleto so bilang na kapara ran aripen tan agagi ra, a pateyen met a singa ginawad sikara.+

12 Tan anengneng kon inekal to so komanem a tatak, tan walay agawan maksil a yegyeg; tan say agew et binmilunget a singa andeket a sakon abel a gawad bago,* tan say interon bulan et binmalangan singa dala,+ 13 tan saray bitewen ed tawen et naplag diad dalin, a singano apalagapag iran maetan bunga na kiew ya igos a yinmugayog lapud maksil a dagem. 14 Tan say tawen et naandi a singa sakey a pahina a nilukot,+ tan say kada palandey tan kada isla et nakal ed pasen to.+ 15 Insan saray arari ed dalin, saray atagey ya opisyal, saray komandante na militar, saray mayaman, saray mabiskeg, kada aripen, tan kada bulos a too et inmamot ed saray ungib tan angkakabaleg a bato ed kapalandeyan.+ 16 Tan ibabaga ra ed saray palandey tan ed saray bato: “Saniban yo kami+ tan iyamot yo kami ed Dios ya akayurong ed trono+ tan ed sanok na Kordero,+ 17 lapud sinmabi lay baleg ya agew na sanok da,+ tan siopa so makaliktar?”+

7 Kayari na saya, anengneng koy apatiran anghel ya akaalagey ed apatiran suyok na dalin, a popokpokan da so apatiran dagem na dalin, pian anggapoy dagem ya onsiplog ed dalin odino ed dayat odino ed dinanman a kiew. 2 Tan anengneng koy sakey nin anghel a mamapaatagey manlapud bubutayan na agew,* a walad sikatoy panagtatak na mabilay a Dios; tan diad maksil a boses et imbaga tod saray apatiran anghel a naikday autoridad a maneral ed dalin tan dayat: 3 “Agyo dederalen so dalin odino say dayat odino saray kiew, anggad agmi natatakan+ iray moling na saray ariripen na Dios tayo.”+

4 Tan nadngel ko so bilang na saramay tinatakan, 144,000,+ a tinatakan a nanlapud balang tribu na saray ananak nen Israel:+

9 Kayari na saya, anengneng koy sakey a baleg ya ulop, ya agnayarian a bilangen na too, a nanlapu ra ed amin a nasyon tan tribu tan rasa tan lenguahe,+ ya akaalagey ira diad arap na trono tan arap na Kordero, ya akasulong ira na amputin kawes;+ tan wala ray sankabembenan dan sanga na palma.+ 10 Tan diad maksil a boses et ibabaga ra: “Say kililiktar tayo et utang tayo ed Dios tayo, ya akayurong ed trono,+ tan ed Kordero.”+

11 Amin ya anghel et akaalagey ed paliber na trono tan saray mamatatken+ tan saray apatiran mabilay a pinalsa, tan dinmakmomo ra ed arap na trono tan nandayew ira ed Dios, 12 ya ibabaga ra: “Amen! Komon ta say dayew tan gloria tan karunongan tan pisasalamat tan galang tan pakayari tan biskeg et niwala ya anggad angga ed Dios tayo.+ Amen.”

13 Et oniay imbagad siak na sakey ed saray mamatatken: “Siopa irayay akasulong na amputin kawes+ tan iner so nanlapuan da?” 14 Kanian tampol ya inkuan kod sikato: “Katawan ko, sika so makaamta.” Tan inkuan to ed siak: “Saraya may nanlapud baleg a kairapan,+ tan nilinisan da ray kawes da tan pinaputi da iratan ed dala na Kordero.+ 15 Kanian wala rad arap na trono na Dios, tan agew-labi iran manlilingkor* ed sikato diad templo to; tan samay akayurong ed trono+ et tarongan to ra na tolda to.+ 16 Agla ran balot naerasan odino napaet, tan agla ra pasakitan na agew odino antokaman a mansasnit a petang,+ 17 lapud say Kordero,+ a walad pegley na trono, so manpastol ed sikara+ tan itonton to ra diad saray subol na danum na bilay.+ Tan punasen na Dios so amin a lua ed kamataan da.”+

8 Sanen inekal to+ so komapiton tatak,+ dinmeen ed tawen a ngalngali kapalduay oras. 2 Tan anengneng ko so pitoran anghel+ ya akaalagey ed arap na Dios, tan inikdan ira na pitoran trumpeta.

3 Sinmabi so sakey nin anghel, a walay awit ton balitok a pananginan* na insenso, tan inmalagey ed abay na altar,+ tan naikdan na dakdakel ya insenso+ pian niyapay to diad balitok ya altar+ a walad arap na trono legan a manpipikasi so amin a masanto. 4 Say asewek na insenso ed lima na anghel pati saray pikakasi+ na saray masanto et amaatagey diad arap na Dios. 5 Balet tampol ya inala na anghel so pananginan na insenso, tan pinano to itan na apoy na altar tan imbantak to diad dalin. Tan kinmarol tan kinmirmat+ tan yinmegyeg tan wala ray nadngel kon boses. 6 Tan saray pitoran anghel a walaan na pitoran trumpeta+ et namparaan lan mamaknol ed saratan.

7 Pinaknol na unonan anghel so trumpeta to. Tan pinmelag ed dalin so uran a kristal tan apoy ya alaokan iraya na dala;+ tan say kakatlo na dalin et apoolan, tan say kakatlo na saray kiew et apoolan, tan amin a birdin karikaan et apoolan.+

8 Pinaknol na komaduan anghel so trumpeta to. Tan walay singa mandarlang a baleg a palandey a nibantak diad dayat.+ Tan say kakatlo na dayat et nagmaliw a dala;+ 9 tan say kakatlo na saray mabilay a pinalsa* diad dayat et inatey,+ tan say kakatlo na saray barko et agaygay.

10 Pinaknol na komatlon anghel so trumpeta to. Tan sakey a baleg a bitewen a mandarlang a singa silew et naplag manlapud tawen, tan naplag itan ed kakatlo na saray ilog tan ed saray subol na danum.+ 11 Tan say ngaran na bitewen et Ahenho. Tan say kakatlo na saray danum et nagmaliw ya ahenho, tan dakel ed saray totoo so inatey ed danum, lapud nagmaliw iyan ampait.+

12 Pinaknol na komapat ya anghel so trumpeta to. Tan say kakatlo na agew+ tan kakatlo na bulan tan kakatlo ed saray bitewen et kinabil, pian ombilunget so kakatlo na saratan+ tan no agew et agnaliwawaan so kakatlo na satan, tan ontan met no labi.

13 Tan anengneng ko, tan nadngel ko so sakey ya agila ya ontitikyab ed pegley na tawen tan dalin a kuan to ed maksil a boses: “Kasi la, kasi la, kasi la+ iramay manaayam ed dalin lapud saray nakekeraan a tanol na saray trumpeta na taloran anghel a magano lan mamaknol ed saratan!”+

9 Pinaknol na komaliman anghel so trumpeta to.+ Tan anengneng kon naplag ed dalin so sakey a bitewen manlapud tawen, tan niiter ed sikato so tombok na dadalanan* a mamaarap ed kaaralman.+ 2 Nilukasan to so dadalanan* a mamaarap ed kaaralman, tan amaatagey so asewek manlapud dadalanan* a singa asewek na baleg a hurnoan, tan binmilunget so agew+ pati say dagem, lapud asewek ed dadalanan.* 3 Tan pinmaway ed asewek iray duron tan linma ra ed dalin,+ tan naikdan ira na autoridad, a singa say autoridad a walad saray alakdan ed dalin. 4 Imbagad sikara ya agda sasakitan iray dika ed dalin odino dinanman a birdin tanaman odino dinanman a kiew, noagta saraman labat so totoon anggapoy tatak na Dios ed saray moling da.+

5 Tan saray duron et naikdan na autoridad, aliwan pian mamatey, noagta pian mamairap ed sikara diad loob na limay bulan, tan say pamairap ed sikara et singa panamairap na alakdan+ sano ketketen na satan so too. 6 Diad saratan ya agew, saray totoo et anapen day patey balet agda naromog, tan labay da lay ompatey, balet arawian ira na patey.

7 Tan say itsura na saray duron et singa kabayo ya akaparaan lan miguerra;+ diad ulo ra et wala ray singa koronan balitok, tan say lupa ra et singa lupa na too, 8 balet say buek da et singa buek na bibii. Tan saray ngipen da et singa saray ngipen na leon,+ 9 tan wala ray samben da ed pagew a singa balatyang a samben ed pagew. Tan say tanol na saray payak da et singa tanol na saray karwahen walay akasintan kabayo a maples ya ombabatik paonlad guerra.+ 10 Ontan met, wala ray ikol da tan maditay ketket da a singa saray alakdan, tan walad ikol da so pakayarin mamasakit ed totoo ed loob na limay bulan.+ 11 Walay ari ra, say anghel na kaaralman.+ Diad Hebreo, say ngaran to et Abaddon,* balet diad Griego, say ngaran to et Apollyon.*

12 Linmabas lay sakey a kairapan. Et duara nin kairapan+ so onsabi kayari na sarayan bengatla.

13 Pinaknol na komanem ya anghel+ so trumpeta to.+ Tan nadngel koy sakey a boses manlapud saray saklor na balitok ya altar+ a walad arap na Dios 14 ya angibaga ed komanem ya anghel a walaan na trumpeta: “Ukbaran moy apatiran anghel ya abalor diad baleg ya ilog na Eufrates.”+ 15 Tan naukbaran so apatiran anghel ya akaparaan la ed oras tan agew tan bulan tan taon a mamatey ed kakatlo na saray totoo.

16 Say bilang na saray armadan akakabayo et duaran samplon libolibo a samplon libolibo;* nadngel ko so bilang da. 17 Tan onia so impakanengneng ko ed saray kabayo diad pasingawey tan ed saramay akakabayo ed saratan: Saray samben ed pagew da et ambalbalanga tan asul tan duyaw, tan saray ulo na saray kabayo et singa ulo na saray leon,+ tan ompapaway ed sangi ra so apoy tan asewek tan asupre. 18 Kakatlo na saray totoo so inatey lapud sarayan taloran salot, say apoy tan asewek tan asupre ya ompapaway ed sangi ra. 19 Ta say pakayari na saray kabayo et walad saray sangi ra tan walad saray ikol da, ta saray ikol da et singa uleg tan walaay ulo, tan uusaren da iraya ed pamasakit da.

20 Balet saray akeran totoo ya ag-inatey ed sarayan salot et agnagbabawi ed saray ginawa ra; ag-ira tinmundan nandayew ed saray demonyo tan saray idolo a gawad balitok tan pilak tan gansa tan bato tan kiew, ya agmakanengneng tan agmakarengel tan agmakaakar.+ 21 Tan ag-ira nagbabawi ed saray gagawaen dan panagpatey tan espiritismo tan seksual ya imoralidad* tan panagtakew.

10 Tan anengneng ko so sakey nin mabiskeg ya anghel ya onleleksab manlapud tawen, ya abalkot na lurem, tan walay bunlalakaw ed ulo to, tan say lupa to et singa agew,+ tan saray bikking* to et singa ra lusek ya apoy, 2 tan sankaegnaan toy melag a lukot ya alukasan. Tan say kawanan a sali to et indakat tod dayat, balet say kawigin sali to et diad dalin, 3 tan sikatoy tinmawag ed maksil a boses a singa panaglem na leon.+ Tan sanen sikatoy tinmawag, nansalita so pitoran karol.+

4 Natan sanen nansalita so pitoran karol, mansulat ak la komon, balet nadngel koy sakey a boses manlapud tawen+ ya angibaga: “Isekretom* iray bengatlan imbaga na pitoran karol, tan agmo iratan isusulat.” 5 Say anghel ya anengneng kon akaalagey diad dayat tan diad dalin et intagey toy kawanan a lima to diad tawen, 6 tan oniay insamba to ed samay mabilay ya anggad angga,+ samay amalsa ed tawen tan saray bengatlan wadtan, tan ed dalin tan saray bengatlan wadtan, tan ed dayat tan saray bengatlan wadtan:+ “Agla kaukolay manalagar. 7 Balet diad saray agew sano paknolen la na komapiton anghel+ so trumpeta to,+ say sagradon sekreto+ na Dios ya inyabawag to bilang maong a balita ed saray aripen to a propeta+ et asumpal la.”

8 Tan nadngel ko so boses manlapud tawen+ a nansalita lamet ed siak tan kuan to: “La ka, alam so alukasan a lukot a sankabembenan na anghel ya akaalagey diad dayat tan diad dalin.”+ 9 Linma ak ed samay anghel tan imbagak ed sikato ya iter tod siak so melag a lukot. Inkuan tod siak: “Nia, akan mo,+ tan paagasangen na satan* so eges mo, balet diad sangim et masamit itan a singa dilo.” 10 Inalak so melag a lukot ed lima na samay anghel tan inakan ko,+ tan diad sangik et masamit itan a singa dilo,+ balet sanen naakmon ko la, inmagasang so eges ko. 11 Tan oniay inkuan ed siak: “Nepeg a manpropesiya ka lamet nipaakar ed saray rasa tan saray nasyon tan saray lenguahe tan dakel ya arari.”

11 Tan niiter ed siak so sakey a tanubong a singa baston*+ tan inkuan to: “La ka tan sukat mo so santuaryo na templo na Dios tan say altar tan saramay mandadayew ditan. 2 Balet say sular a walad paway na santuaryo na templo et labsanan mo tan agmo susukaten, lapud inter la itan ed saray nasyon, tan igatin-gatin day masanton syudad+ ed loob na 42 bulan.+ 3 Pampropesiyaen ko so duaran tasik ed loob na 1,260 agew, ya akasulong ira na sakon abel.” 4 Sikaray isisimbolo na duaran kiew ya olibo+ tan duaran kandelero+ tan akaalagey ira ed arap na Katawan na dalin.+

5 No walay malabay a mamasakit ed sikara, ompaway so apoy ed sangi ra a mangupot ed saray kakabusol da. No walay malabay a mamasakit ed sikara, onia so pamatey ed sikato. 6 Walaan iray pakayari a mangisara ed tawen+ pian ag-onuran+ legan na saray agew na pampropropesiya ra, tan walaan iray pakayari ed saray danum a pagmaliwen iratan a dala+ tan mangidapo ed dalin na amin a klase na salot kapiganman a labay da.

7 Sano asumpal da lay pantatasi ra, say atap ya ayep ya ompaway ed kaaralman et milaban ed sikara tan taloen tan pateyen to ra.+ 8 Tan saray bangkay da et iyakar ed manunan karsada na baleg a syudad a diad simbolikon paraan et tatawagen a Sodoma tan Ehipto, a ditan met impasak ed poste so Katawan da. 9 Tan saray totoo ed nanduruman rasa tan tribu tan lenguahe tan nasyon et onnengneng ed saray bangkay da ed talora tan kapalduan agew,+ tan agda abuloyan a niponpon iray bangkay da. 10 Tan saramay manaayam ed dalin et manliket tan manselebra ed impatey da, tan manreregaloan ira, lapud pinairap ira na sarayan duaran propeta.

11 Kayari na talora tan kapalduan agew, say espiritu na bilay a nanlapud Dios et niwalad sikara,+ tan inmalagey ira, tan tinmakot a maong iramay akanengneng ed sikara. 12 Tan nadngel da so maksil a boses manlapud tawen ya angibaga ed sikara: “Segep kayo dia.” Tan sinmegep ira ed tawen diad lurem, tan anengneng ira na* kakabusol da. 13 Diad saman ya oras et yinmegyeg a maksil, tan nagba so kakaplo na syudad; tan 7,000 totoo so inatey ed yegyeg, tan saray akera et ataktakot tan inggloria ra so Dios na tawen.

14 Linmabas lay komaduan kairapan.+ Et maples ya onsasabi so komatlon kairapan.

15 Pinaknol na komapiton anghel so trumpeta to.+ Tan wala ray maksil a boses ed tawen a mangibabagan: “Say panarian na mundo et nagmaliw a Panarian na Katawan tayo+ tan say Kristo to,+ tan sikatoy manuley bilang ari ya anggad angga.”+

16 Tan say 24 a mamatatken+ ya akayurong ed saray trono ra diad arap na Dios et dinmakmomo tan nandayew ed Dios, 17 ya ibabaga ran: “Misasalamat kami ed sika, Jehova* a Dios, say Makapanyarin-amin, samay wala natan+ tan wala la nensaman, lapud inalam la so baleg a pakayarim tan ginmapo ka lan manuley bilang ari.+ 18 Balet sinmanok iray nasyon, tan impaway moy sanok mo, tan sinmabi so aturon panaon pian ukomen iray inaatey tan pian ikdan na tumang+ iray aripen mo a propeta+ tan saray masanto tan saramay ontatakot ed ngaran mo, saray abeba tan atagey so kipapasen da, tan pian deralen iramay manederal ed dalin.”+

19 Tan alukasan so santuaryo na templo na Dios ed tawen, tan say kaban na sipanan to et anengneng ed santuaryo na templo to.+ Tan wala ray kirmat tan boses tan karol tan yegyeg tan maksil ya uran na kristal.

12 Insan sakey a baleg a tanda so anengneng ed tawen: Walay sakey a biin+ akawesan na agew, tan say bulan et walad silong na saray sali to, tan say ulo to et akoronaan na 12 bitewen, 2 tan sikatoy malukon. Tan sikatoy oneeyag ta manpapasakit tan maniirap lapud mananak la.

3 Sakey nin tanda so anengneng ed tawen. Nia! Sakey a baleg ya ambalbalangan dragon,+ a walaan na pitoran ulo tan samploran saklor tan saray ulo to et walaan na pitoran korona; 4 tan ingguyor na ikol to so kakatlo na saray bitewen+ ed tawen, tan imbantak to rad dalin.+ Tan nanalagey so dragon ed arapan na bii+ a magano lan mananak, pian sano nananak la et akmonen to so ugaw.

5 Tan say bii et angiyanak na sakey a laki,+ on, sakey ya ugaw a laki, a pastolan toy amin a nasyon diad panamegley na baston a balatyang.+ Tan say anak to et tampol ya inyakar ed Dios tan diad trono to. 6 Tan say bii et binmatik ed kalawakan, a diman et walay pasen to ya imparaan na Dios tan diman da pakanen ed 1,260 ya agew.+

7 Tan walay agawan guerra ed tawen: Si Miguel*+ tan saray anghel to et akilaban ed dragon, tan say dragon tan saray anghel to et akilaban 8 balet ag-ira analo,* tan anggapo lay pasen da ed tawen. 9 Kanian imbantak so baleg a dragon,+ say sankaunaan ya uleg,+ samay tatawagen a Diablo+ tan Satanas,+ a mangibabalang ed interon mundo;*+ sikatoy imbantak diad dalin,+ tan saray anghel to et imbantak a kaiba to. 10 Walay nadngel kon maksil a boses ed tawen, ya angibaga:

“Natan et sinmabi lay panangiliktar+ na Dios tayo, nipatnag lay pakayari to, tan niletneg lay Panarian to+ tan ginmapo lay pakauley na Kristo to, lapud nibantak lay manag-akusa ed saray agagi tayo, samay mangaakusa ed sikara ed agew tan labi diad arap na Dios tayo!+ 11 Tan sikatoy tinalo ra+ lapud dala na Kordero+ tan lapud mensahe ya ipupulong da,+ tan agda pinabli iray kamarerwa* da+ anggano nipaarap ira ed ipapatey. 12 Lapud saya et manliket kayo katawenan tan sikayo ran manaayam ditan! Kasi lay dalin tan say dayat,+ lapud linmeksab ed sikayo so Diablo, ya agaylay pasnok to, ta amta ton antikey lay panaon to.”+

13 Natan sanen nibantak la diad dalin so dragon,+ pinasegsegang to so bii+ ya angiyanak ed ugaw a laki. 14 Balet say duaran payak na baleg ya agila+ et inter ed bii, pian makatikyab diad pasen to ed kalawakan, a diman et sikatoy pakanen ed sakey a panaon tan saray panaon tan kapaldua na sakey a panaon*+ ya arawi ed uleg.+

15 Tan say uleg et angibuga na danum a singa ilog diad benegan na bii, pian sikatoy nalener ed ilog. 16 Balet say dalin et tinmulong ed bii, tan sinmangi so dalin tan inakmon toy ilog ya imbuga na dragon. 17 Kanian say dragon et sinmanok a maong ed bii tan linma a milaban ed saray nakekeraan ya ilalak* na bii,+ a manguunor ed saray ganggan na Dios tan walaan na kimey a panagtasi nipaakar ed si Jesus.+

13 Tan nanalagey itan* diad buer na dayat.

Tan anengneng ko so sakey ya atap ya ayep+ ya onsasakbit manlapud dayat,+ a walaan na samploran saklor tan pitoran ulo, tan diad saray saklor to et walay samploran korona, balet diad saray ulo to et wala ray ngaran a manmumudmora ed Dios. 2 Natan say atap ya ayep ya anengneng ko et singa sakey a leopardo, balet saray sali to et singa saray sali na oso, tan say sangi to et singa sangi na leon. Tan inter na dragon+ ed atap ya ayep so pakayari tan trono tan baleg a pakauley to.+

3 Anengneng ko a sakey ed saray ulo to et singano graben asugatan, balet anggano makapatey so sugat to,+ inmabig itan, tan say interon dalin et mandinayew a tinmumbok ed atap ya ayep. 4 Tan nandayew ira ed dragon lapud inter to so pakauley ed atap ya ayep, tan nandayew ira ed atap ya ayep, a kuan da: “Siopa so mipara ed atap ya ayep, tan siopa so makapilaban ed sikato?” 5 Sikatoy inikdan na sangi a mapaatagey a mansasalita tan manmumudmora, tan sikatoy inikdan na pakauley ya onkiwas ed 42 bulan.+ 6 Tan say sangi to et nansalita na saray panagmudmora+ ed Dios pian mudmoraen so ngaran to tan say ayaman to, anggan saramay manaayam ed tawen.+ 7 Sikatoy naabuloyan a milaban ed saray masanto tan taloen ira,+ tan sikatoy inikdan na pakauley ed kada tribu tan rasa tan lenguahe tan nasyon. 8 Tan amin iramay manaayam ed dalin et mandayew ed sikato. Manlapu lad inkiletneg na mundo, anggapoy anggan sakey ed ngaran da so nisulat ed lukot na bilay+ na Kordero a pinatey.+

9 Siopaman a walaan na layag, sikatoy ondengel komon.+ 10 Siopaman a niganan naerel, sikatoy naerel. Siopaman a mamatey ed panamegley na espada,* sikatoy nepeg a pateyen ed panamegley na espada.+ Dia et nakaukolan na saray masanto+ so panagsungdo+ tan pananisia.+

11 Insan anengneng ko so sakey nin atap ya ayep ya ompapaway manlapud dalin, tan sikatoy walaan na duaran saklor a singa kordero, balet sikatoy nansalita a singa dragon.+ 12 Uusaren to so amin a pakauley na inmunan atap ya ayep+ diad pakanengneng na saya. Tan say dalin tan saramay manaayam ditan et pandadayewen to ed inmunan atap ya ayep, ya inmabig so makapatey a sugat to.+ 13 Tan sikatoy manggagawa na angkakabaleg a tanda, a papepelagen to ni ingen ed dalin so apoy manlapud tawen diad pakanengneng na katooan.

14 Papalikdoen to iramay manaayam diad dalin, lapud saray tanda a niyabuloy a gawaen to ed pakanengneng na atap ya ayep, tan ibabaga to met ed saramay manaayam ed dalin ya igawaan da na sakey ya imahen+ so atap ya ayep ya asugat na espada ingen ta abilay.+ 15 Tan sikatoy naabuloyan a mangiter na linawa* ed imahen na atap ya ayep, pian say imahen na atap ya ayep et mansalita tan papatey to so amin ya agmalabay a mandayew ed imahen na atap ya ayep.

16 Papasooten to so amin a totoo—abeba man odino atagey so kipapasen da, mayaman man odino pobri, bulos man odino aripen—pian namarkaan iraya diad kawanan a lima ra odino diad moling da,+ 17 tan pian anggapo so makapangaliw odino makapanlako nilikud ed samay toon walaan na marka, say ngaran+ na atap ya ayep odino say numero na ngaran to.+ 18 Dia et nakaukolan so karunongan: Samay walaan na aralem a pakatalos et kuentaen to komon so numero na atap ya ayep, ta numero itan na too; tan say numero to et 666.+

14 Insan anengneng ko so Kordero+ ya akaalagey diad Palandey Sion,+ tan kaiba to so 144,000,+ ya akasulat ed saray moling da so ngaran to tan say ngaran na Ama to.+ 2 Walay nadngel kon tanol a manlalapud tawen a singa ungol na amayamay a danum tan singa tanol na maksil a karol; tan say tanol a nadngel ko et singa boses na saray managkansion legan dan totogtogen iray arpa ra. 3 Tan kakansionen da so singa sakey a balon kansion+ diad arap na trono tan diad arap na apatiran mabilay a pinalsa+ tan saray mamatatken,+ tan anggapoy anggan sakey a marunong ed satan a kansion noag say 144,000,+ a sinaliw manlapud dalin. 4 Saraya may agda dinutakan so inkasikara ed saray bibii; diad tua et malinis* ira.+ Saraya may nantultuloy a tinmumbok ed Kordero anggan iner so laen to.+ Sinaliw iraya+ ed limog na katooan bilang unona iran bunga+ a parad Dios tan parad Kordero, 5 tan anggapoy aromog a panamalikdo diad saray sangi ra; anggapoy pakabalawan da.+

6 Tan anengneng ko so sakey nin anghel ya ontitikyab ed pegley na tawen tan dalin, tan walay andi-anggaan a maong a balita ya iyabawag to ed saramay manaayam diad dalin, diad kada nasyon tan tribu tan lenguahe tan rasa.+ 7 Ibabaga to ed maksil a boses: “Takotan yoy Dios tan igloria yo, lapud sinmabi lay oras na panangukom to,+ kanian mandayew kayo ed samay nanggawa ed tawen tan dalin tan dayat+ tan saray subol na danum.”

8 Wala ni sakey a tinmumbok, say komaduan anghel, ya ibabaga to: “Naplag la! Naplag la so Makapanyarin Babilonia,+ samay amainum ed amin a nasyon na alak na mabiskeg a pilalek* ton manggaway seksual ya imoralidad!”*+

9 Wala ni sakey a tinmumbok ed sikara, say komatlon anghel, ya ibabaga to ed maksil a boses: “No walay siopaman a mandadayew ed atap ya ayep+ tan ed imahen to tan mangaawat na marka diad moling to odino diad lima to,+ 10 inumen to met so alak na sanok na Dios, a saya et imbales ya anggapoy laok diad kopa na sanok To,+ tan sikatoy napairap ed apoy tan asupre+ diad pakanengneng na saray masanton anghel tan Kordero. 11 Tan say asewek na panamairap ed sikara et onatagey ya anggad angga,+ tan diad agew tan labi et anggapoy painawa ra, saramay mandadayew ed atap ya ayep tan ed imahen to tan siopaman a mangaawat na marka na ngaran to.+ 12 Dia et nakaukolan na saray masanto so panagsungdo,+ saramay manguunor ed ganggan na Dios tan mangaalig ed pananisia+ nen Jesus.”

13 Tan nadngel koy sakey a boses manlapud tawen, a mangibabagan, “Isulat mo: Maliket iramay inatey a nikasakey ed Katawan+ manlapud sayan panaon. On, ibabaga na espiritu, manpainawa la ra ed saray pansasagpot da, ta saray agawaan da et agnalingwanan.”*

14 Insan anengneng koy sakey ya amputin lurem, tan diad lurem et walay akayurong a singa anak na too,+ a walay balitok a korona diad ulo to tan akaegna na sakey a makdem a palot.

15 Pinmaway ed santuaryo na templo so sakey nin anghel, a diad maksil a boses et imbaga tod samay akayurong diad lurem: “Usar moy palot mo tan manani ka, lapud asabi lay oras na panani, ta mataktakken la so aanien diad dalin.”+ 16 Tan samay akayurong diad lurem et insingwat toy palot to diad dalin, tan naani so dalin.

17 Tan pinmaway so sakey nin anghel manlapud santuaryo na templo a walad tawen, tan wala met so makdem a palot to.

18 Tan pinmaway ed kawalaay altar so sakey nin anghel, tan sikatoy walaan na autoridad ed apoy. Tan diad maksil a boses et imbaga tod samay walaan na makdem a palot: “Usar moy makdem a palot mo tan tipon moy kumpog na sengeg na ubas na dalin, ta aluto la ray bunga na satan.”+ 19 Insingwat na anghel so palot to diad dalin tan tinipon to so sengeg na ubas na dalin, tan imbantak to itan ed baleg a panagpespesan na sanok na Dios.+ 20 Say panagpespesan na ubas et ginatin-gatinan diad paway na syudad, tan diad panagpespesan na ubas et pinmaway so dala, a say kaatagey na satan et anggad saray renda na kabayo diad distansian 1,600 ya estadyo.*

15 Tan anengneng ko ed tawen so sakey nin tanda, a baleg tan makapakelaw, saray pitoran anghel+ a walaan na pitoran salot. Sampot la irayan salot, ta diad panamegley na saraya et mangangga la so sanok na Dios.+

2 Tan walay anengneng kon singa dayat a salming+ a nanlaok na apoy, tan saramay akatalo+ ed atap ya ayep tan ed imahen to+ tan ed numero na ngaran to+ et akaalagey ira diad abay na dayat a salming, a wala ray sankaegnaan dan arpa na Dios. 3 Kakansionen da so kansion nen Moises+ ya aripen na Dios tan say kansion na Kordero,+ a mangibabaga:

“Alay abig tan makapakelkelaw iray gawam,+ Jehova* a Dios, say Makapanyarin-amin.+ Matunong tan napanmatalkan iray dalan mo,+ O andi-anggaan ya Ari.+ 4 Siopa so ag-ontakot ed sika, Jehova,* tan agmangigloria ed ngaran mo, ta sika labat so matoor?+ Ta amin a nasyon et ondago tan mandayew ed arapan mo,+ lapud niparungtal la ray matunong a ganggan mo.”

5 Kayari na saya, anengneng ko ya alukasan ed tawen so santuaryo na tolda na testimonya,+ 6 tan say pitoran anghel a walaan na pitoran salot+ et pinmaway ed santuaryo, ya akakawes ira na linen a malinis tan masnag, tan wala ray balitok a balkes ya akabariber ed pagew da. 7 Sakey ed saray apatiran mabilay a pinalsa et inter tod pitoran anghel so pitoran yaong a napno na sanok na Dios,+ samay mabilay ya anggad angga. 8 Tan say santuaryo et apano na asewek lapud gloria na Dios+ tan lapud pakapanyari to, tan anggapo so akaloob ed santuaryo anggad impakasumpal na pitoran salot+ na pitoran anghel.

16 Tan walay nadngel kon maksil a boses manlapud santuaryo+ ya angibaga ed pitoran anghel: “La kayo tan ikalbo yo ed dalin so pitoran yaong na sanok na Dios.”+

2 Say unonan anghel et linma tan inkalbo to ed dalin so yaong to.+ Tan adapoan na grabe tan makapatey a giri+ iray totoon walaan na marka na atap ya ayep+ tan mandadayew ed imahen na satan.+

3 Say komaduan anghel et inkalbo toy yaong to diad dayat.+ Tan nagmaliw itan a dala+ a singa dala na inatey a too, tan inatey so amin a mabilay a pinalsa,* on, amin a walad dayat.+

4 Say komatlon anghel et inkalbo toy yaong to diad saray ilog tan diad saray subol na danum.+ Tan nagmaliw iratan a dala.+ 5 Nadngel ko so anghel a walaan na autoridad ed saray danum, ya imbaga to: “Sika so matoor a Dios,+ samay wala natan tan wala la nensaman.+ Sika so matunong, ta inter mo irayan panangukom,+ 6 lapud inyibung da so dala na saray masanto tan dala na saray propeta,+ tan inikdan mo ra na dala ya inumen da;+ manepeg itan ed sikara.”+ 7 Tan nadngel kon imbaga na altar: “On, Jehova* a Dios, say Makapanyarin-amin,+ matua tan matunong iray panangukom* mo.”+

8 Say komapat ya anghel et inkalbo toy yaong to diad agew,+ tan say agew et naabuloyan a siniten iray totoo diad panamegley na apoy. 9 Tan asinit iray totoo lapud graben petang, balet minudmora day ngaran na Dios, samay walaan na autoridad ed sarayan salot, tan ag-ira nagbabawi tan agda inggloria so Dios.

10 Say komaliman anghel et inkalbo toy yaong to diad trono na atap ya ayep. Tan say panarian to et binmilunget,+ tan kinetket na saray totoo iray dila ra lapud sakit a nalilikna ra, 11 balet minudmora day Dios na tawen lapud saray sakit a nalilikna ra tan saray giri da, tan ag-ira nagbabawi ed saray ginawa ra.

12 Say komanem ya anghel et inkalbo toy yaong to diad baleg ya ilog na Eufrates,+ tan inmekat so danum na satan+ pian niparaan so dalan parad saray arari+ a manlapud bubutayan na agew.*

13 Tan walay anengneng kon taloran marutak ya impuyan iran balikas* a singa ra patang a pinmaway ed sangi na dragon+ tan ed sangi na atap ya ayep tan ed sangi na palson propeta. 14 Diad tua, saraya et balikas ya impuyan na saray demonyo tan manggagawa iraya na saray tanda,+ tan oonla iraya ed saray arari na interon dalin, pian tiponen da ra ed guerra+ a nagawa ed baleg ya agew na Dios a Makapanyarin-amin.+

15 “Nia! Onsabi ak a singa sakey a matakew.+ Maliket imay mansiasiansian aliing+ tan aalwaran ton agnalakseb so ilalatop a kawes to, pian agmanakar a lakseb tan agnanengneng na totoo so kababaingan to.”+

16 Tan tinipon da ra ed pasen a tatawagen ed Hebreo ya Armagedon.*+

17 Say komapiton anghel et inkalbo toy yaong to diad dagem. Et walay maksil a boses a nanlapud santuaryo,+ diman ed trono, ya angibaga: “Asumpal la!” 18 Tan wala ray kirmat tan boses tan karol, tan walay maksil a yegyeg ya agnin balot agawa manlapud inkiwala na too diad dalin.+ Sayan yegyeg et malaklaknab tan makmaksil. 19 Say baleg a syudad+ et nankatlo, tan saray syudad na saray nasyon et nagba; tan ninonot na Dios so Makapanyarin Babilonia,+ pian ipainum tod sikato so kopa na alak na pinasyan sanok to.+ 20 Ontan met, naandi so amin ya isla, tan agla naromog iray palandey.+ 21 Insan manlapud tawen et pinmelag ed totoo so maksil ya uran a kristal,+ a kada sakey et manbelat na manga sakey a talento,* tan minudmora na totoo so Dios lapud salot na uran a kristal,+ ta talagan grabe iyan salot.

17 Sinmabi so sakey ed saray pitoran anghel a walaan na pitoran yaong+ tan imbaga tod siak: “Gala, ipanengneng kod sika so pangukom ed maimpluensyan imoral a bii* ya akayurong ed amayamay a danum,+ 2 samay nanggawaan na seksual ya imoralidad* na saray arari na dalin,+ tan saray manaayam ed dalin et abuek ed alak na panggagawa toy seksual ya imoralidad.”*+

3 Tan diad pakayari na espiritu et inawit to ak ed kalawakan. Tan anengneng koy sakey a bii ya akayurong ed ambalbalangan atap ya ayep a napno na saray ngaran a manmumudmora ed Dios tan walaay pitoran ulo tan samploran saklor. 4 Say bii et akasulong na kolor-ube+ tan ambalbalangan kawes, tan saray alahas a balitok, mablin bato, tan perlas,+ tan walay sankabembenan ton balitok a kopa a napno na saray makapadimlan bengatla tan marutak a bengatla na panggagawa toy seksual ya imoralidad.* 5 Diad moling to et akasulat so sakey a ngaran, sakey a misteryo: “Makapanyarin Babilonia, say ina na saray imoral a bibii+ tan saray makapadimlan bengatla diad dalin.”+ 6 Tan anengneng ko a say bii et abuek ed dala na saray masanto tan ed dala na saray tasi nen Jesus.+

Sanen sikatoy anengneng ko et mankelaw ak a maong. 7 Kanian inkuan na anghel ed siak: “Akin et mankelaw ka? Ibagak ed sika so misteryo nipaakar ed bii+ tan ed atap ya ayep ya akayurongan to, a walaay pitoran ulo tan samploran saklor:+ 8 Say atap ya ayep ya anengneng mo et wala nensaman, balet anggapo la, ingen ta magano lan ompaway manlapud kaaralman,+ tan naderal itan. Tan saray manaayam ed dalin—saramay agnisulat ed lukot na bilay so ngaran da+ manlapu lad inkiletneg na mundo—et mankelaw ira sano nanengneng da no panon a say atap ya ayep et wala nensaman, balet anggapo la, ingen ta niwala lamet.

9 “Dia et nakaukolan so kakabatan tan karunongan: Say pitoran ulo+ et mankabaliksan na pitoran palandey, ya akayurongan na samay bii. 10 Tan walay pitoran arari: Say limara et naandi la,* say sakey et wala natan, tan say sakey et agni sinmabi; balet sano onsabi, sikatoy mansiansian magano. 11 Tan say atap ya ayep a wala nensaman balet anggapo la,+ satan met so komawalon ari, balet nanlapu itan ed pitora, tan naderal itan.

12 “Say samploran saklor ya anengneng mo et mankabaliksan na samploran arari ya agni akaawat na sakey a panarian, balet mangawat ira na autoridad bilang arari ed sakey oras a kaiba na atap ya ayep. 13 Walaan ira na saksakey a kanonotan, kanian say pakayari tan autoridad da et iter da ed atap ya ayep. 14 Milaban ira ed Kordero,+ balet lapud sikato so Katawan na saray katawan tan Ari na saray arari,+ taloen ira na Kordero.+ Tan taloen met ira na saramay kaiba to a tinawag tan pinili tan matoor.”+

15 Imbaga tod siak: “Saray danum ya anengneng mo, ya akayurongan na samay imoral a bii,* et mankabaliksan na saray rasa tan grupo na totoo tan nasyon tan lenguahe.+ 16 Tan say samploran saklor+ ya anengneng mo tan say atap ya ayep+ et busolen da may imoral a bii*+ tan sikatoy deralen tan lakseban da, tan upoten day laman to tan sigpot dan poolan.+ 17 Ta inyan na Dios ed kapusoan da so panggawa ed samay walad kanonotan to,+ salanti, gawaen imay saksakey a kanonotan da, ya iter da ed atap ya ayep so panarian da,+ anggad nasumpal iray salita na Dios. 18 Tan say bii+ ya anengneng mo et mankabaliksan na baleg a syudad a walaan na sakey a panarian a manuuley ed saray arari na dalin.”

18 Kayari na saya et anengneng koy sakey nin anghel ya onleleksab manlapud tawen, a sikatoy walaan na baleg ya autoridad, tan say dalin et aliwawaan na gloria to. 2 Tan diad maksil a boses et ibabaga to: “Naplag la! Naplag la so Makapanyarin Babilonia,+ tan sikatoy nagmaliw ya ayaman na saray demonyo tan pasen a kawalaay amin a marutak ya espiritu* tan amin a marutak tan didimlaen a manok!+ 3 Ta lapud alak na mabiskeg a pilalek* ton manggaway seksual ya imoralidad* et abiktima so amin a nasyon,+ tan saray arari na dalin et nanggaway seksual ya imoralidad ed sikato,+ tan saray negosyante* ed dalin et yinmaman lapud pakayari na dakel a mablin kaykayarian to ya agto ibabaing.”

4 Tan nadngel ko so sakey nin boses manlapud tawen, a mangibabaga: “Paway kayo ed sikato, sikayo ran totook,+ no agyo labay so makapibiang ed saray kasalanan to, tan no agyo labay so nalanor a mangawat ed saray salot to.+ 5 Ta saray kasalanan to et atipon ya anggad tawen,+ tan ninonot na Dios iray ag-inkahustisya* a ginawa to.+ 6 Ibales yod sikato so unong ed impantrato tod arum,+ on, doble ibales yod sikato lapud saray ginawa to;+ diad kopa+ a nantimplaan toy iinumen, mantimpla kayoy mamiduan karakel parad sikato.+ 7 No kaunongan so impangigloria tod sarili to tan impanbilay ton maluho ya anggapoy baing, ontan met so kabaleg na pamairap tan pamaermen yo ed sikato. Ta naynay ton ibabaga ed sarili to: ‘Akayurong ak bilang reyna, tan aliwa ak a balo, tan agak balot manermen.’+ 8 Kanian diad sakey ya agew et onsabi iray salot to, say ipapatey tan panermen tan eras, tan sikatoy sigpot a napoolan,+ lapud si Jehova* a Dios, ya angukom ed sikato, et mabiskeg.+

9 “Tan saray arari na dalin ya akibiang ed sikato a manggaway seksual ya imoralidad* tan kaiba to ed andi-baing a maluhon panagbilay et onakis tan tapoktapoken day pagew da lapud panermen da ed sikato sano nanengneng day asewek na pakakapoolan to. 10 Onalagey ira ed arawi lapud takot da ed pamapairap ed sikato tan ibaga ra: ‘Pakaskasi ka la, pakaskasi ka la, baleg a syudad,+ sika, Babilonia a mabiskeg a syudad, lapud diad sakey oras et sinmabi so panangukom ed sika!’

11 “Ontan met, saray negosyante ed dalin et manak-akis tan maneermen ed agawad sikato, lapud anggapo lay mangaliw ed amin a lako ra, 12 amin a lako ran balitok, pilak, mablin bato, perlas, marakep a klase na linen, kolor-ube ya abel, seda, tan ambalbalangan abel; tan amin a bengatlan gawad ambalingit a kiew; tan amin a klase na bengatlan gawad garing,* tan ed mablin kiew, gansa, balatyang, tan marmol; 13 ontan met ed sinamon, tanaman a pampabalingit a nanlapud India, insenso, ambalingit a larak, olibano, alak, larak na olibo, pinon arina, trigo, saray baka, karnero, kabayo, karwahe, ariripen, tan bilay* na totoo. 14 On, naandi lad sika so maabig a bunga a pinirawat mo,* tan anggapo lad sika so amin ya espisyal tan mararakep a bengatla, tan aglan balot naromog iratan.

15 “Saray negosyante a nanlako ed sarayan bengatla, a yinmaman lapud sikato, et onalagey ed arawi lapud takot da ed pamapairap ed sikato tan onakis tan manermen ira, 16 a kuan da: ‘Pakaskasi la, pakaskasi la so baleg a syudad, a samay sulong to et gawad marakep a klase na linen, kolor-ube tan ambalbalangan kawes tan walaan na dakel ya alahas a balitok, mablin bato, tan perlas,+ 17 ta diad sakey oras, say ontan karakel a kayamanan et aderal!’

“Tan amin a kapitan na barko tan amin a manbiabiahe ed dayat tan saray marino tan amin iramay manaanap na pambilay da diad dayat et inmalagey irad arawi 18 tan maneyag ira legan dan nenengnengen so asewek na pakakapoolan to tan inkuan da: ‘Wala ta ni syudad a mipara ed baleg a syudad?’ 19 Angisabuyag iray dabok ed ulo ra tan maneyag ira a manak-akis tan maneermen, tan inkuan da: ‘Pakaskasi la, pakaskasi la so baleg a syudad, a yinmaman so amin a walaan na saray barko ed dayat lapud saray kayamanan to, ta diad sakey oras et sikatoy aderal!’+

20 “Panliketan yo so agawad sikato, O tawen,+ pati sikayo ran masanto+ tan apostol tan propeta, ta parad sikayo et inyabawag na Dios so panangukom ed sikato!”+

21 Tan sakey a mabiskeg ya anghel so angalsa na bato a singa sakey a baleg a baton gilingan tan imbantak to itan ed dayat, a kuan to: “Oniay kapeles na kibasileng na baleg a syudad a Babilonia, tan sikatoy aglan balot naromog.+ 22 Tan diad sika, Babilonia, et aglan balot narengel so boses na saray managkansion a mantotogtog na arpa, ontan met ed pantotogtog na saray musikero, saray managplauta, tan saray managtrumpeta. Tan anggapo lan balot so naromog ed sika a marunong a komikimey ya amta toy antokaman a trabaho, tan anggapo lan balot so narengel ed sika a tanol na baton gilingan. 23 Anggapo lan balot so onsinag ed sika a liwawa na lamparaan, tan anggapo lan balot so narengel ed sika a boses na nobyo tan nobya; ta saray negosyantem et sankaprominentian a totoo diad dalin, tan diad panamegley na espiritismo+ et apalikdom so amin a nasyon. 24 On, aromog ed sikato so dala na saray propeta, saray masanto,+ tan amin iramay pinatey diad dalin.”+

19 Kayari na saya et walay nadngel kon singa maksil a boses na sakey a baleg ya ulop ed tawen. Inkuan da: “Idayew yoy Jah!*+ Say panangiliktar tan say gloria tan say pakayari et kayarian na Dios tayo, 2 lapud matua tan matunong iray panangukom to.+ Ta indapo to lay panangukom ed samay maimpluensyan imoral a bii,* samay pinagmaliw ton mauges so dalin lapud panggagawa toy seksual ya imoralidad,* tan binales to la nisengeg ed dala na saray aripen to.”+ 3 Tan tampol ya inkuan da ed komaduan pankanawnawa: “Idayew yoy Jah!*+ Tan say asewek a manlalapud Babilonia et onaatagey ya anggad angga.”+

4 Tan say 24 a mamatatken+ tan say apatiran mabilay a pinalsa+ et dinmakmomo tan nandayew ed Dios ya akayurong ed trono tan inkuan da: “Amen! Idayew yoy Jah!”*+

5 Ontan met, walay sakey a boses a nanlapud trono ya angibaga: “Idayew yoy Dios tayo, amin yon ariripen to+ ya ontatakot ed sikato, saray ordinaryo tan saray prominente.”+

6 Tan walay nadngel kon singa boses na sakey a baleg ya ulop tan singa ungol na amayamay a danum tan singa tanol na maksil iran karol. Inkuan da: “Idayew yoy Jah,*+ lapud si Jehova* a Dios tayo, say Makapanyarin-amin,+ et ginmapo lan manuley bilang ari!+ 7 Manggayaga tan manliket itayon maong, tan sikatoy igloria tayo, lapud asabi lay kasal na Kordero tan akaparaan lay nobya to. 8 On, say nobya et naabuloyan a mangisulong na masnag, malinis, tan marakep a klase na linen—ta say marakep a klase na linen et mankabaliksan na saray matunong a ginawa na saray masanto.”+

9 Tan inkuan na anghel ed siak, “Isulat mo: Maliket iramay naimbitaan ed pangdem diad kasal na Kordero.”+ Tan inkuan to ni ed siak: “Saraya so tuan salita na Dios.” 10 Diad saman et dinmakmomo ak ed salian to pian idayew ko. Balet inkuan tod siak: “Manalwar ka! Agmo itan gagawaen!+ Sakey ak labat ya aripen a singa sika tan saray agagim a walaan na kimey a panagtasi nipaakar ed si Jesus.+ Mandayew kad Dios!+ Ta say panagtasi nipaakar ed si Jesus so gagala na saray propesiya.”+

11 Anengneng kon alukasan so tawen, tan walay sakey ya amputin kabayo.+ Tan samay akakabayo ed satan et tatawagen a Matoor+ tan Matua,+ tan sikato so manguukom tan milalaban unong ed inkatunong.+ 12 Saray mata to et mandarlang ya apoy,+ tan diad ulo to et walay dakel a korona. Walay akasulat a ngaran to ya anggapoy makaamta noag sikato labat, 13 tan sikatoy akasulong na ilalatop a kawes ya amantsaan* na dala, tan sikatoy tatawagen ed ngaran a Say Salita+ na Dios. 14 Ontan met, ontutumbok ed sikato iray armada ed tawen ya akalugan ira ed saray amputin kabayo, tan akakawes ira na amputi, malinis, tan marakep a klase na linen. 15 Tan diad sangi to et ompapaway so sakey a makdem tan andukey ya espada+ a pangabil tod saray nasyon, tan pastolan to ra diad panamegley na baston a balatyang.+ Ontan met, igagatin-gatin to so panagpespesan na baleg a sanok na Dios a Makapanyarin-amin.+ 16 Diad ilalatop a kawes to, on, diad bandad ulpo to et akasulat so ngaran ton, Ari na saray arari tan Katawan na saray katawan.+

17 Anengneng ko met so sakey ya anghel ya akaalagey ed pegley na agew, tan diad maksil a boses et inkuan tod amin a manok ya ontitikyab ed pegley na tawen tan dalin: “Gali dia, mantitipon kayo parad baleg a pangdem na Dios,+ 18 pian kanen yoy laman na saray arari tan laman na saray komandante na militar tan laman na saray mabiskeg a lalaki+ tan laman na saray kabayo tan saramay akalugan ed saratan,+ tan saray laman na amin, say laman na bulos a totoo ontan met ed saray ariripen tan saray ordinaryo tan saray prominente.”

19 Tan anengneng ko so atap ya ayep tan saray arari na dalin tan saray armada ra a nantitipon pian milaban ed samay akalugan ed kabayo tan ed armada to.+ 20 Tan narel so atap ya ayep, pati say palson propeta+ a nanggawa ed arapan to na saray tanda, ya impamalikdo to ed saramay angawat ed marka na atap ya ayep+ tan saramay mandadayew ed imahen to.+ Legan a mabilay ni ra, nibantak ira ed mandarlang a dayat a manliob ed asupre.+ 21 Balet saray arum et pinatey ed panamegley na andukey ya espada a pinmaway ed sangi na samay akalugan ed kabayo.+ Tan amin a manok et naksel ed saray laman da.+

20 Tan anengneng koy sakey ya anghel ya onleleksab manlapud tawen a sankaegnaan toy tombok na kaaralman+ tan sakey a baleg a gulonggulong. 2 Inerel to so dragon,+ say sankaunaan ya uleg,+ say Diablo+ tan Satanas,+ tan binalor to ed 1,000 taon. 3 Tan sikatoy imbantak to ed kaaralman+ tan sinaraan to itan tan inikdan toy tatak, pian agto la napalikdo iray nasyon anggad kasumpal na 1,000 taon. Kayari na saya, sikatoy ibulos a magano.+

4 Tan akanengneng ak na saray trono, tan saramay akayurong ed saratan et naikdan na autoridad a mangukom. On, anengneng ko ray kamarerwa* na saramay pinatey* lapud impantasi ra nipaakar ed si Jesus tan impanpulong da nipaakar ed Dios, tan saramay agnandayew ed atap ya ayep odino ed imahen to tan agmet angawat ed marka diad moling da tan diad lima ra.+ Tan sikaray abilay tan nanuley bilang arari a kaiba na Kristo+ diad 1,000 taon. 5 (Saray arum ya inatey+ et ag-abilay anggad kasumpal na 1,000 taon.) Saya so unonan kioli.+ 6 Maliket tan masanto so siopaman a kabiangan ed unonan kioli;+ diad sikara et anggapoy pakayari na komaduan ipapatey,+ balet magmaliw iran saserdote+ na Dios tan say Kristo, tan manuley ira bilang arari a kaiba to diad 1,000 taon.+

7 Natan kasumpal na 1,000 taon, ibulos si Satanas ed akaprisoan to, 8 tan sikatoy ompaway pian palikdoen iramay nasyon diad apatiran suyok na dalin, say Gog tan Magog, pian tiponen to ra parad guerra. Say karakel da et singa buer ed dayat. 9 Tan kinmayat ira ed interon dalin tan pinaliberan day kampo na saray masanto tan say inad-aron syudad. Balet pinmelag so apoy manlapud tawen tan inupot ira na satan.+ 10 Tan say Diablo a mamapalikdo ed sikara et imbantak ed dayat na apoy tan asupre, a ditan so kawalaan la na atap ya ayep+ tan say palson propeta;+ tan pairapen* ira ed agew tan labi ya anggad angga.

11 Tan anengneng ko so baleg ya amputin trono tan samay akayurong ed satan.+ Diad arapan to et naandi so dalin tan say tawen,+ tan agla iraya naromog. 12 Tan anengneng ko ray inaatey, saray ordinaryo tan saray prominente, ya akaalagey ed arap na trono, tan wala ray alukasan a lukot. Balet wala ni sananey a lukot ya alukasan; satan so lukot na bilay.+ Diad panamegley na saray akasulat ed saray lukot, saray inaatey et inukom unong ed saray gawa ra.+ 13 Tan inter na dayat iray inaatey a wadtan, tan say patey tan say Lubok* et inter da ray inaatey da, tan sansakey iran inukom unong ed saray gawa ra.+ 14 Tan say patey tan say Lubok* et imbantak ed dayat na apoy.+ Say dayat na apoy+ et mankabaliksan na komaduan ipapatey.+ 15 Ontan met, siopaman ya ag-akasulat ed libro na bilay+ et imbantak ed dayat na apoy.+

21 Tan anengneng koy sakey a balon tawen tan sakey a balon dalin;+ ta naandi la imay datin tawen tan samay datin dalin,+ tan anggapo la so dayat.+ 2 Anengneng ko met so masanton syudad, say Balon Jerusalem, ya onleleksab manlapud tawen, manlapud Dios,+ tan sikatoy akaparaan la bilang sakey a nobyan akapales la parad nobyo to.+ 3 Diad saman et walay nadngel kon maksil a boses manlapud trono, ya angibaga: “Say tolda na Dios et walad katooan, tan sikatoy manayam a kaiba ra, tan magmaliw iran totoo to. Tan say Dios a mismo et niwala ed sikara.+ 4 Tan punasen to so amin a lua ed kamataan da,+ tan anggapo lay patey,+ anggapo met lay panermen tan panakis tan panotot.+ Saray datin bengatla et linmabas la.”

5 Tan inkuan na samay akayurong ed trono:+ “Gagawaen kon balo so amin a bengatla.”+ Inkuan to ni: “Isulat mo, ta sarayan salita et napanmatalkan tan tua.” 6 Tan inkuan tod siak: “Agawa la iraya! Siak so Alfa tan say Omega,* say gapo tan say sampot.+ Siopaman a napgaan et ikdan ko na libren danum manlapud subol na danum na bilay.+ 7 Siopaman a manatalo et tawiren to irayan bengatla, tan siak so magmaliw a Dios to tan sikatoy magmaliw ya anak ko. 8 Balet nipaakar ed saray payakot tan saramay andian na pananisia+ tan saramay makapadimla so inkarutak da tan saray managpatey+ tan saray manggagaway seksual ya imoralidad*+ tan saramay mibibiang ed espiritismo tan saray mandadayew ed idolo tan amin a matitila,+ say betang da et say dayat a manliob ed apoy tan asupre.+ Saya et mankabaliksan na komaduan ipapatey.”+

9 Sinmabi so sakey ed saramay pitoran anghel a walaan na pitoran yaong a napno na pitoran unor a salot,+ tan inkuan tod siak: “Gala, ipanengneng kod sika so nobya, say magmaliw ya asawa na Kordero.”+ 10 Kanian diad pakayari na espiritu et inyakar to ak ed baleg tan atagey a palandey, tan impanengneng tod siak so masanton syudad a Jerusalem ya onleleksab manlapud tawen, manlapud Dios,+ 11 tan walaan na gloria na Dios.+ Mankirlap itan a singa mabmablin bato, singa baton jaspe a maliwliwawan singa kristal.+ 12 Walaan itan na baleg tan atagey a padir tan 12 puerta a walaay 12 anghel, tan diad saray puerta et akaukit so ngaran na 12 tribu na ananak na Israel. 13 Diad bukig et walay taloran puerta, tan diad amianen et taloran puerta, tan diad abalaten et taloran puerta, tan diad sagur et taloran puerta.+ 14 Say padir na syudad et walaan met na 12 pundasyon a bato, tan diad saratan et akaukit so 12 ngaran na 12 apostol+ na Kordero.

15 Natan, samay mitotongtong ed siak et akaegna na balitok a tanubong a panagsukat, pian sukaten to so syudad tan saray puerta tan say padir na satan.+ 16 Tan say syudad et kuadrado, tan say karukey to et miparad kalapar to. Tan sinukat toy syudad diad panamegley na tanubong, 12,000 ya estadyo;* say karukey tan kalapar tan katagey to et nampapara. 17 Sinukat to met so padir, 144 a kasiko,* unong ed panagsukat na too, tan unong met ed panagsukat na anghel. 18 Natan, say padir et gawad baton jaspe,+ tan say syudad et puron balitok a singa malinew a salming. 19 Saray pundasyon na padir na syudad et adekorasyonan na amin a klase na mablin bato: say unonan pundasyon et jaspe, say komadua et safiro, say komatlo et calcedonia, say komapat et esmeralda, 20 say komalima et sardonica, say komanem et sardio, say komapito et crisolito, say komawalo et berilo, say komasiam et topacio, say komasamplo et crisopraso, say koma-labinsakey et jacinto, say koma-labindua et amatista. 21 Ontan met, say 12 puerta et 12 perlas; kada sakey ed saray puerta et gawad sakey a perlas. Tan say manunan karsada na syudad et puron balitok, singa salming a malinlinew.

22 Anggapoy anengneng kon templo ditan, ta say templo na satan et si Jehova* a Dios a Makapanyarin-amin,+ pati say Kordero. 23 Tan agla nakaukolan na syudad so sinag na agew odino bulan, ta liliwawaan itan na gloria na Dios,+ tan say silew na satan et say Kordero.+ 24 Tan saray nasyon et manakar diad panamegley na liwawa na satan,+ tan saray arari na dalin et awiten da ditan so gloria ra. 25 Saray puerta na satan et agbalot ikapot no agew, ta anggapoy labi ditan.+ 26 Tan awiten ditan so gloria tan say galang na saray nasyon.+ 27 Balet agbalot makaloob ditan so antokaman a marutak tan siopaman a makapadimla tan mapalikdoy kagagawa to;+ say makaloob labat et saramay akasulat ed lukot na bilay na Kordero.+

22 Tan impanengneng tod siak so ilog na danum na bilay,+ a malinlinew a singa kristal, ya onaagus manlapud trono na Dios tan trono na Kordero+ 2 paonlad pegley na manunan karsada na satan. Diad biek tan biek na ilog et wala ray kiew na bilay a 12 danay a manbubunga ed kada taon, a binulan iratan a manbubunga. Tan saray bulong na saray kiew et mamaabig ed saray nasyon.+

3 Tan anggapo lay nagawan panangisamba. Balet say trono na Dios tan say trono na Kordero+ et niwala ed syudad, tan manlingkor ed Dios iray ariripen to; 4 tan nanengneng day lupa to,+ tan nisulat ed moling da so ngaran to.+ 5 Ontan met, anggapo lay labi,+ tan agda la nakaukolan so liwawa na silew odino agew, ta liwawaan ira nen Jehova* a Dios,+ tan manuley ira bilang arari ya anggad angga.+

6 Inkuan tod siak: “Sarayan salita et napanmatalkan tan tua;+ on, si Jehova* a Dios, samay nampuyan ed saray propeta,+ et angibaki na anghel to pian ipanengneng ed ariripen to iray bengatlan magano lan nagawa. 7 Magano ak lan onsabi.+ Maliket so siopaman a manguunor ed saray salita na propesiya na sayan lukot.”+

8 Siak, si Juan, so akarengel tan akanengneng ed sarayan bengatla. Sanen nadngel tan anengneng ko iraya, dinmakmomo ak pian idayew so anghel ya angipanengneng ed siak na sarayan bengatla. 9 Balet inkuan tod siak: “Manalwar ka! Agmo itan gagawaen! Sakey ak labat ya aripen a singa sika tan saray agagim a propeta tan saramay manguunor ed saray salita na sayan lukot. Mandayew kad Dios.”+

10 Inkuan to nid siak: “Agmo isesekreto* iray salita na saray propesiya na sayan lukot, ta asingger lay aturon panaon. 11 Samay agmatunong et paulyan nid gagawaen ton ag-inkatunong, tan samay marutak et paulyan nid inkarutak to; balet samay matunong et paulyan ed gagawaen ton inkatunong, tan samay masanto et paulyan ed pagmaliw ton masanto.

12 “‘Magano ak lan onsabi, tan say tumang ya iter ko et wala lad siak, pian iter ko ed kada sakey so unong ed gawa to.+ 13 Siak so Alfa tan say Omega,*+ say unaan tan say unor, say gapo tan say sampot. 14 Maliket iramay nilinisan da ray kawes da,+ pian nawalaan ira na kanepegan ya onla ed saray kiew na bilay+ tan pian makaloob ira ed syudad ya ondalan irad saray puerta na satan.+ 15 Diad paway et wadman iray aso* tan saramay mibibiang ed espiritismo tan saramay manggagaway seksual ya imoralidad* tan saray managpatey tan saray mandadayew ed idolo tan amin a mangaaro tan manggagawa na katilaan.’+

16 “‘Siak, si Jesus, et imbakik so anghel ko pian mantasi ed sikayo nipaakar ed sarayan bengatla parad saray kongregasyon. Siak so lamot tan say ilalak nen David+ tan say maliwawan bitewen ed kabuasan.’”+

17 Tan ibabaga na espiritu tan say nobya,+ “Gala!” tan siopaman ya ondedengel et ibaga to komon, “Gala!” tan siopaman a napgaan et ondago komon;+ siopaman a malabay et mangala komon na libren danum na bilay.+

18 “Tatasian ko ed amin ya ondedengel ed saray salita na propesiya na sayan lukot: No walay mangaarum ed sarayan bengatla,+ iyarum na Dios ed sikato iray salot a nisulat ed sayan lukot;+ 19 tan no walay mangeekal na antokaman manlapud saray salita ed lukot na sayan propesiya, ekalen na Dios so betang to manlapud saray kiew na bilay+ tan manlapud masanton syudad,+ saray bengatla a nisulat ed sayan lukot.

20 “Samay mantatasi nipaakar ed sarayan bengatla et inkuan to, ‘On, magano ak lan onsabi.’”+

“Amen! Onsabi ka la komon, Katawan a Jesus.”

21 Niwala komon ed saray masanto so agnaparaan a kaabigan na Katawan a Jesus.