Ӕфхӕрд чи ӕййафы, уыцы сылгоймӕгтӕн куыд ис баххуыс кӕнӕн?

Афтӕ райдайы сайты jw.org статья «Сылгоймӕгты ӕдасдзинад. Библи ныфс цӕмӕй ӕвӕры?». Статьяйы кӕрон цы ссылкӕ ис, ууыл куы ныххӕцай, уӕд дӕ бон уыдзӕн рафыссын уыцы статья PDF форматы. Уый фӕстӕ йӕ дӕ бон уыдзӕн афтӕ бакъӕдзтӕ кӕнын, цӕмӕй дзы цыппарфарсон буклет рауайа. Афтӕ бакодта хо Сте́йси Америкӕйы Иугонд Штаттӕй. Уый загъта: «Не ’мбырды территорийы ис, ӕфхӕрд чи баййӕфта, уыцы сылгоймӕгтӕн ӕдас кӕм у, ахӕм бынатa. Ӕмӕ иу хоимӕ уырдӕм цалдӕр буклеты ахастам».

Уыцы бынаты кусӕг сын загъта, цӕмӕй ма сын уыцы буклеттӕй ноджыдӕр ӕрбахастаиккой. Гъемӕ иннӕ хатт, чи дзы цард, уыцы сылгоймӕгтӕн радтой 40 буклетӕй фылдӕр ӕмӕ нӕ сайты визиткӕтӕй та – 30. Фӕстӕдӕр та сын центры администратор загъта, цӕмӕй сылгоймӕгтӕн равдыстаиккой, Йегъовӕйы Ӕвдисӕнтӕ адӕмимӕ Библи куыд фӕахуыр кӕнынц, уый.

Стейси ма дыууӕ хоимӕ ноджыдӕр иу ахӕм бынат бабӕрӕг кодта. Уым та радтой фондз буклеты. Ӕмӕ та сын уым дӕр загътой, цӕмӕй ма сын ноджыдӕр ӕрбахастаиккой. Кусджытӕй сын иу загъта: «Цы фыст дзы ис, уый ацы сылгоймӕгтӕн тынг баххуыс кӕндзӕн. Ахӕм информаци нӕ тынг хъуыди». Хотӕ сӕм иннӕ хатт куы бацыдысты, уӕд цалдӕр сылгоймаджы бафӕндыд фенын, Библийы ахуыр куыд фӕцӕуы, уый. Дыууӕйӕ дзы загътой, иннӕ къуырийы кӕрон сӕ Паддзахады залмӕ ӕмбырдмӕ ацӕуын кӕй фӕнды.

Стейси радзырдта: «Уый ӕнхъӕл нӕ уыдыстӕм, ӕмӕ уыцы статья сӕ зӕрдӕмӕ афтӕ тынг фӕцӕудзӕн. Рафыссӕн ӕй кӕй ис ӕмӕ дзы буклет скӕнӕн кӕй ис, уый фӕрцы ӕнцондӕр у уыцы ӕфхӕрд сылгоймӕгтимӕ Хуыцауы Паддзахады тыххӕй ныхас кӕнын. Буклеты цы фыст ис, уый-иу куы бакастысты, уӕд-иу сӕ цӕсгӕмттӕ куыд барухс сты, уымӕ кӕсын диссаг уыд. Мах дарддӕр дӕр ахӕм сылгоймӕгтӕн хорз хабары тыххӕй дзурдзыстӕм. Ӕмӕ нӕ тынг фӕнды фенын, Йегъовӕ нын куыд арфӕ кӕндзӕн».