Архайут, «Хуыцауы сыгъдӕг тых кӕй дӕтты, уыцы иудзинады цӕрыныл»
АПОСТОЛ Павел Ефесы цӕрӕг чырыстӕттӕм ныффыста: «Уарзондзинады фӕрцы кӕрӕдзийӕн барут, зӕрдиагӕй архайут, Хуыцауы сыгъдӕг тых кӕй дӕтты, уыцы иудзинады цӕрыныл ӕмӕ кӕрӕдзийыл баст ут фарны тӕгтӕй» (Еф. 4:2, 3).
Не ’хсӕн цы «иудзинад» ис, уый нын ис «Хуыцауы сыгъдӕг тыхы» фӕрцы. Фӕлӕ, Павел куыд загъта, афтӕмӕй уыцы иудзинад хъӕуы хъахъхъӕнын. Ӕмӕ йӕ чи хъуамӕ хъахъхъӕна? «Хуыцауы сыгъдӕг тых кӕй дӕтты», уыцы фарн хъахъхъӕнын у чырыстӕттӕй алкӕй хӕс дӕр.
Зӕгъӕм, чидӕр дын ног машинӕ балӕвар кодта. Чи йӕм хъуамӕ зила? Кӕй зӕгъын ӕй хъӕуы, дӕхӕдӕг. Уый дӕ хӕс у. Фӕлӕ йӕм куы нӕ зилай, ӕмӕ куы фехӕла, уӕд куыд хъуамӕ аххосджын кӕнай, чи дын ӕй балӕвар кодта, уый?
Афтӕ, чырыстӕтты ’хсӕн цы иудзинад ис, уый дӕр лӕвар у – Хуыцауы лӕвар. Ӕмӕ уыцы иудзинад хъахъхъӕнын махӕй алкӕй хӕс дӕр у. Кӕд хо кӕнӕ ’фсымӕримӕ кӕрӕдзимӕ цӕйдӕр тыххӕй фӕхӕрам стӕм, уӕд хъуамӕ ахъуыды кӕнӕм: «Мӕнӕй цы кӕнгӕ у, уый сарӕзтон, цӕмӕй ӕмбырды фарн ма фехӕла?»
«ЗӔРДИАГӔЙ АРХАЙУТ» ИУДЗИНАД ХЪАХЪХЪӔНЫНЫЛ
Павелы ныхӕстӕй бӕрӕг у, алкӕд ӕнцон кӕй нӕ вӕййы ӕмбырды фарн бахъахъхъӕнын, уӕлдайдӕр та нын кӕд хо кӕнӕ ӕфсымӕр нӕ зӕрдӕ истӕмӕй фӕриссын кодта, уӕд. Цымӕ алы хатт ӕнӕмӕнг вӕййы, цы ’рцыд, ууыл аныхас кӕнын? Нӕ. Ахъуыды-иу кӕн: «Йемӕ куы аныхас кӕнон, уӕд уавӕр хуыздӕр фӕуыдзӕн ӕви фыддӕр?» Хатт хуыздӕр вӕййы, адӕймагӕн йӕ рӕдыд куы ницӕмӕ ӕрдариккам кӕнӕ йын куы ныххатыр кӕниккам (Ӕмб. 19:11; Мар. 11:25).
Ахъуыды кӕн: «Чи мӕ фӕхъыг кодта, уыимӕ куы аныхас кӕнон, уӕд уавӕр хуыздӕр фӕуыдзӕн ӕви фыддӕр?»
Уӕдӕ архайӕм апостол Павелы уынаффӕмӕ гӕсгӕ, «уарзондзинады фӕрцы кӕрӕдзийӕн барут», зӕгъгӕ (Еф. 4:2). Иу чиныджы фыст ис, ацы ныхӕстӕ ма кӕй ис ратӕлмац кӕнӕн афтӕ дӕр: «цахӕмтӕ сты, ахӕмтӕй сӕ уарзут». Уый ууыл дзурӕг у, ӕмӕ хъуамӕ ӕмбарӕм, не ’мчырыстӕттӕ дӕр кӕй рӕдийынц, мах куыд рӕдийӕм, афтӕ. Мах не ’ппӕт дӕр архайӕм, цӕмӕй нӕ «удыхъӕд ногмӕ раивӕм» (Еф. 4:23, 24). Фӕлӕ нӕ уӕддӕр ӕнӕрӕдигӕ ничи у (Ром. 3:23). Уый нӕ зӕрдыл куы дарӕм, уӕд нын ӕнцондӕр уыдзӕн кӕрӕдзиимӕ фидауын ӕмӕ кӕрӕдзийӕн хатыр кӕнын, ӕмӕ, «Хуыцауы сыгъдӕг тых кӕй дӕтты, уыцы иудзинады» цӕрын.
Иннӕтӕн-иу сӕ рӕдыдтытӕ куы ницӕмӕ ӕрдарӕм кӕнӕ-иу сын сӕ куы ныххатыр кӕнӕм, уӕд ӕмбырд уыдзӕн «фарны тӕгтӕй» баст. Ефесӕгтӕм 4:3 стихы «фарны тӕгтӕ»-й цы грекъаг дзырд ратӕлмац кодтой, уый Колоссӕгтӕм 2:19 стихы та ратӕлмац кодтой дзырдӕй «уӕнгбӕттӕнтӕ». Уӕнгбӕттӕнтӕ стджытӕ кӕрӕдзийыл фидар бӕттынц. Афтӕ мах дӕр фарнмӕ куы тырнӕм ӕмӕ хоты ӕмӕ ’фсымӕрты куы уарзӕм, уӕд нын уый ӕххуыс кӕндзӕн семӕ хӕларӕй цӕрынӕн, кӕд хатт, нӕ зӕрдӕмӕ цы нӕ цӕуы, ахӕм исты саразынц, уӕддӕр.
Уӕдӕ дын де ’мчырыстӕттӕй исчи дӕ зӕрдӕ куы фӕриссын кӕна, куы дӕ фӕхъыг кӕна кӕнӕ дӕ куы смӕсты кӕна, уӕд-иу ӕм фаутӕ хӕссыны бӕсты бацархай, цӕмӕй йӕ бамбарай (Кол. 3:12). Иууылдӕр ӕнӕххӕст стӕм. Ӕмӕ хатт ды дӕр, ӕвӕццӕгӕн, кӕйдӕр фӕхъыг кӕныс. Уый дӕ зӕрдыл куы дарай, уӕд дын ӕнцондӕр уыдзӕн, дӕ бон цы у, уый аразын, цӕмӕй, «Хуыцауы сыгъдӕг тых кӕй дӕтты, уыцы иудзинад» хъахъхъӕнай.